5 Musa 28:1-68
28 “Molo toktong do ditangihon hamu hata ni Jahowa Debatamuna, jala marsitutu hamu mangulahon sude parettana, songon na hupaboa tu hamu sadari on, pasti do bahenon ni Jahowa Debatamuna i hamu ussangap sian sude bangso na adong di tano on.+
2 Molo ditangihon hamu sude hata ni Jahowa Debatamuna i, ro ma sude pasu-pasu on tu hamu jala dang boi hamu lari sian i:+
3 “Dipasu-pasu ma hamu na di kota dohot na di ladang.+
4 “Dipasu-pasu ma akka anakkonmuna,*+ hasil ni tanomuna, akka anak ni binatang na dipiaro hamu, anak ni lombumuna, dohot anak ni biru-birumuna.+
5 “Dipasu-pasu ma karanjangmuna+ dohot baskom ingananmuna mambahen adonan.*+
6 “Dipasu-pasu ma hamu manang tudia pe hamu lao jala manang aha pe na diula hamu.
7 “Bahenon ni Jahowa ma talu akka musu na mangalo hamu di jolomuna.+ Sian sada dalan do nasida ro mangalo hamu, alai sian pitu dalan do nasida lari sian hamu.+
8 Pasu-pasuon ni Jahowa do akka gudangmuna+ dohot ganup ulaonmuna, jala pasti do pasu-pasuonna hamu di luat na dilehon Jahowa Debatamuna tu hamu.
9 Molo toktong dioloi hamu paretta ni Jahowa Debatamuna jala diihutton hamu akka dalanna, bahenon ni Jahowa ma hamu gabe bangsona na badia,+ songon sumpana tu hamu.+
10 Idaon ni sude bangso na di tano on ma, hamu do bangso na dipillit lao mamakke goar ni Jahowa.+ Gabe mabiar ma nasida tu hamu.+
11 “Bahenon ni Jahowa ma massai godang anakkonmuna, binatang na dipiaro hamu, dohot hasil ni tanomuna+ di luat na dijanjihon Jahowa tu akka ompumuna lao lehononna tu hamu.+
12 Dos songon sahalak bawa na mambukka gudangna na marisi gok arta, bukkaon ni Jahowa ma langit. Paroonna ma udan tu luatmuna di tikkina,+ jala pasu-pasuonna ma sude ulaonmuna. Lehononmuna ma pinjaman tu godang bangso, alai hamu sandiri dang hea maminjam tu manang ise pe.+
13 Molo toktong dioloi hamu paretta ni Jahowa Debatamuna na hupaboa tu hamuna sadari on lao dioloi jala diulahon hamu, bahenon ni Jahowa ma hamu gabe di jolo, dang di pudi.* Jala bahenonna ma hamu di ginjang,+ dang di toru.
14 Unang manirpang hamu sian sude hata na huparettahon tu hamu sadari on. Unang manirpang hamu tu kanan manang tu kiri,+ lao mangihutton jala manomba akka debata na asing.+
15 “Alai molo dang ditangihon hamu hata ni Jahowa Debatamuna, dang marsitutu hamu lao mangulahon sude paretta, dohot aturan na hupaboa tu hamu sadari on, ro ma akka bura on tu hamu, jala dang boi hamu lari sian i:+
16 “Hona bura ma hamu akka na di kota, dohot hamu na di ladang.+
17 “Hona bura ma karanjangmuna+ dohot baskom ingananmuna mambahen adonan.*+
18 “Hona bura ma akka anakkonmuna,*+ hasil ni tanomuna, anak ni lombumuna, dohot biru-birumuna.+
19 “Hona bura ma hamu manang tudia pe hamu lao jala manang aha pe na diula hamu.
20 “Paroon ni Jahowa ma bura tu sude ulaonmuna, bahenonna ma hamu gaor jala paroonna do tu hamu hukuman sahat tu na mate hamu sude jala dipasuda di bagasan satokkin. Ai diulahon hamu do na jahat jala ditadikkon hamu do Ibana.*+
21 Toktong ma adong bahenon ni Jahowa sahit di hamu sahat tu na mate hamu sude di luat na lao buatonmuna i.+
22 Paroon ni Jahowa ma tu hamu sahit tuberkulosis,* demam tinggi,+ radang, las ni ari na massai mohop,* podang,+ dohot alogo na mohop. Bahenonna ma mate suan-suananmuna alani jamur.+ Leleon ni akka i ma hamu sahat tu na mate hamu sude.
23 Bahenokku ma langitmuna i songon tombaga,* jala tanomuna i songon bosi.*+
24 Paroon ni Jahowa ma udan pasir dohot orbuk sian langit tu luatmuna i, sahat tu na mate hamu sude.
25 Bahenon ni Jahowa ma hamu talu dibahen akka musumuna.+ Sian sada dalan do hamu ro mangalo nasida, alai sian pitu dalan ma hamu lari sian nasida. Marsisir ma ibbulu ni sude harajaon di portibi on mangida na masa tu hamu.+
26 Gabe sipanganon ni akka pidong na di langit, dohot akka binatang na di tano on ma bakkemuna. Jala dang adong na mambahen akka binatang i mabiar.+
27 “Bahenon ni Jahowa ma tu hamu sahit bisul na masa tu halak Mesir, ambeien, korengan,* dohot radang kulit na so boi malum.
28 Bahenon ni Jahowa ma hamu rittik, mapitung,+ jala maoto.*
29 Dadap-dadap ma hamu di tikki arian dos songon halak na mapitung dadap-dadap di na golap.+ Dang na lao marhasil hamu di sude ulaonmuna. Jala toktong ma hamu dioto-otoi jala dirampok halak, alai dang adong na lao mangurupi hamu.+
30 Martunangan do hamu dohot sahalak borua, alai diperkosa bawa na asing do borua i. Dipajongjong hamu do jabu, alai dang hamu na mangingani.+ Disuan hamu do anggur, alai dang na lao buatonmuna hasilna.+
31 Diseat do lombumuna di jolomuna, alai dang hamu mangallang jagalna. Di jolomuna do ditakko halodemuna, alai dang na lao mulak i tu hamu. Buaton ni akka musumuna ma biru-birumuna, alai dang adong na mangurupi hamu.
32 Buaton ni bangso na asing ma anak dohot borumuna sian jolomuna,+ sai masihol ma hamu tu nasida, alai dang adong na boi sibahenonmuna.
33 Allangon ni akka halak na so ditanda hamu ma hasil ni tanomuna dohot sude hasil na niulamuna.+ Jala torus ma hamu dioto-otoi jala disiksa.
34 Rittik ma hamu alani sude na niidamuna.
35 “Hukumon ni Jahowa ma hamu, paroonna ma bisul na massai haccit jala na so boi dipamalum. Bahenonna ma i di lututmuna, di patmuna, mulai sian ujung ni patmuna sahat tu ujung ni ulumuna.
36 Usiron ni Jahowa ma hamu rap dohot raja na pinillitmuna i. Usironna ma hamu tu sada bangso na so ditanda hamu dohot na so ditanda akka ompumuna.+ Gabe manomba akka debata na asing ma hamu disi, i ma akka debata na dibahen sian hau dohot batu.+
37 Marsisir ma ibbulu ni sude halak mangida na masa tu hamu. Gabe direhei* jala dileai halak ma hamu di tonga-tonga ni bangso di luat ingananmuna dung diusir Jahowa.+
38 “Godang do diboan hamu boni tu ladang, alai otik do hasil na lao dipapungu hamu.+ Ai habis do parbuena i diallang sihapor.
39 Disuan hamu do anggur jala diurus hamu, alai dang adong buatonmuna parbuena. Jala dang inumonmuna hasilna.+ Ai diallang gilok-gilok do i sude.
40 Godang do hau jetun di luatmuna, alai dang adong miakna i lao tu dagingmuna. Ai marurus do sude parbuena.
41 Maranak marboru do hamu, alai dang boi nasida toktong rap dohot hamu. Ai takkupon ni musu do nasida jala diboan tu luat ni musu.+
42 Segaan ni akka serangga ma sude hau dohot hasil ni tanomuna.
43 Lam sangap ma halak na sian bangso na asing na adong di tonga-tongamuna. Alai lam tu leana ma hamu.
44 Dilehon nasida do pinjaman tu hamu. Alai dang hea hamu na mangalehon pinjaman tu nasida.+ Nasida ma di jolo, alai hamu ma di pudi.*+
45 “Pasti paroonna do sude bura i+ tu hamu, dilele bura i ma hamu, jala dang boi hamu lari sian i sahat tu na mate hamu sude.+ Ai dang ditangihon hamu hata ni Jahowa Debatamuna. Jala dang toktong diulahon hamu parettana dohot aturan na dilehon Ibana tu hamu.+
46 Torus ma i ro tu hamu dohot tu pinopparmuna, jala gabe tanda dohot sipasingot+ ma i saleleng ni lelengna.
47 Ai tikki dipasu-pasu Debata sude ulaonmuna, dang marlas ni roha hamu manomba Jahowa Debatamuna i, jala dang sonang rohamuna manomba Ibana.+
48 Suruon ni Jahowa ma musu mangalo hamu. Ikkon karejo do hamu gabe hatoban ni nasida+ nang pe male hamu,+ mauas, salang-salang, jala hurangan di sasudena. Bahenonna ma auga* na sian bosi tu rukkungmuna sahat tu na mate hamu sude.
49 “Paroon ni Jahowa ma sada bangso sian na dao,+ sian ujung ni tano on lao mangalo hamu. Takkupon ni bangso i ma hamu dos songon panakkup ni lali.+ Songon i ma bahenon ni bangso i tu hamu, i ma bangso na so diattusi hamu bahasana.+
50 Ganas do akka halak na sian bangso i. Dang parduli nasida tu na matua jala dang asi roha ni nasida tu na poso.+
51 Allangon ni nasida ma akka binatang na dipiaro hamu, dohot hasil ni ladangmuna sahat tu na mate hamu sude. Dang adong ditadikkon nasida gandum,* anggur na baru, miak, anak ni lombu, dohot anak ni biru-biru di hamu sahat tu na mate hamu sude.+
52 Dikepung nasida ma hamu. Jala dang dipaloas nasida hamu kaluar sian sude kotamuna* na adong di luatmuna, sahat tu na ruppak akka tembok na timbo jala na togu na diasakkon hamu. Pasti dikepung nasida do hamu di sude kota na di luat na nilehon ni Jahowa Debatamuna i tu hamu.+
53 Tikki dikepung hamu, massai susa do hamu dibahen musumuna. Alani i, sappe diallang hamu do anakmuna dohot borumuna sandiri,+ i ma akka anak* na nilehon ni Jahowa Debatamuna tu hamu.
54 “Haru bawa na ullambok jala na parasi roha pe dang parduli be tu haha anggina, manang tu istri na dihaholongi ibana, manang tu anakna na mangolu dope.
55 Dang olo ibana mambagi daging ni anakna na lao allangonna i tu nasida. Ai dang adong be siallangonna ala na dikepung musu i nasida, jala ala massai susa do ngolu ni nasida dibahen musu di akka kotamuna.+
56 Songon i nang borua na ullambok, na parasi roha, jala na so hea olo mandege tano alani manjana+ pe, dang asi rohana tu suami na dihaholongi ibana, tu anakna manang tu boruna,
57 dohot tu anggi-anggi* na kaluar sian holang-kolang ni patna, dohot tu akka anak na ditubuhon ibana pe. Ai sipsip do ibana mangallang i, alani haccitna dikepung musu jala disiksa musu di akka kotamuna.
58 “Molo dang marsitutu hamu mangulahon sude hata na di Patik ni Debata, na disurat di bukku on,+ jala molo dang dipasangap hamu goar ni Debata na mulia dohot goarna na sangap i,+ i ma Jahowa+ goar ni Debatamuna i,
59 paroon ni Jahowa ma tu hamu dohot tu pinopparmuna akka jea na borat, i ma jea na massai hebat jala na so marna so,+ jala paroonna do sahit na ganas na so marna malum.
60 Paroonna ma muse tu hamu sude sahit na masa di Mesir, i ma sahit na dihabiari hamu, jala toktong ma sahit i masa tu hamu.
61 Jala paroon ni Jahowa do sude sahit manang tulah na so tarsurat di bukku Patik on, sahat tu na mate hamu sude.
62 Nang pe nungnga songon bintang na di langit godangmuna,+ alai holan saotik do hamu na tinggal.+ Ai dang ditangihon hamu hata ni Jahowa Debatamuna.
63 “Songon las ni roha ni Jahowa mambahen hamu lam godang, jala mambahen lam denggan ngolumuna, dos songon i ma las ni roha ni Jahowa mambahen hamu hancur jala pamatehon hamu sude. Usironna ma hamu sian luat na satokkin nai gabe appunamuna.
64 “Bahenon ni Jahowa ma hamu marserak tu sude bangso, tu ujung ni tano na sada sahat tu ujung ni tano na sada nai.+ Disi gabe manomba akka debata na asing ma hamu, i ma akka debata na sian hau dohot batu, na so ditanda hamu dohot akka ompumuna.+
65 Di tonga-tonga ni akka bangso i,+ dang dapotmuna dame ni roha dohot inganan lao tinggal. Bahenon ni Jahowa ma sai holsoan rohamuna,+ loja matamuna, jala bahenonna ma hamu mandele.+
66 Tarancam do torus ngolumuna. Mabiar do hamu arian dohot borngin. Jala dang hea pos rohamuna atik na boi do hamu selamat manang na dang.
67 Molo dung manogot dohononmuna ma, ‘Autsugari ma borngin on!’ Jala molo dung borngin, dohononmuna ma, ‘Autsugari ma manogot on!’ Didok hamu do songon i alani biar ni rohamuna dohot ala na niida ni matamuna.
68 Pasti boanon ni Jahowa do hamu muse mulak tu Mesir pakke kapal. Hape nungnga hudok na so hea be hamu mulak tusi. Disi, jualonmuna ma dirimuna tu musu lao gabe hatoban, alai dang adong na manuhor hamu.”
Surat na di toru
^ As. “parbue ni rahimmuna”.
^ Lapatanna, toktong do adong gandum manang barli di karanjang jala toktong do adong na diadon di baskom ni nasida.
^ As. “gabe ulu ma hamu jala nasida ma na gabe ihur”.
^ Lapatanna, dang adong gandum manang barli di karanjang jala dang adong na diadon di baskom ni nasida.
^ As. “parbue ni rahimmuna”.
^ As. “Au”.
^ Di bahasa Heber, hata on boi do patuduhon sahit mohop.
^ Manang “sahit na so haubatan”.
^ Lapatanna, dang ro be udan sian langit.
^ Lapatanna, gabe koring ma tano i ala dang ro udan.
^ Manang “eksim”.
^ Manang “bobang-bobangon”.
^ Manang “Dibahen ma na masa i gabe uppasa lao mangarehei”.
^ As. “Gabe ulu ma nasida jala hamu ma na gabe ihur”.
^ Manang na nidokna dison boi do “barli”.
^ As. “gerbangmuna”.
^ As. “parbue ni rahimmuna”.
^ Manang “ari-arina”.
