5 Musa 34:1-12
34 Dung sian gurun Moab, nakkok ma si Musa tu Dolok Nebo,+ tu pussu ni Pisga+ na di jolo ni Jeriko.+ Dipatudu Jahowa ma tu si Musa sude luat i, mulai sian Gilead sahat tu Dan,+
2 sude luat ni marga Naptali, luat ni marga Epraim dohot Manasse, dohot sude luat ni marga Juda sahat tu laut* na di sabola barat,+
3 dung i Negeb,+ Rura Jordan,+ rura Jeriko, i ma kota hau palem i sahat tu Zoar.+
4 Didok Jahowa ma tu ibana, “On ma luat na hujanjihon mardongan sumpa tu si Abraham, tu si Isak, dohot tu si Jakkob. Nungnga hudok tu nasida na lao lehonokku luat on tu akka pinoppar* ni nasida.+ Hupaloas do ho mangida luat on, alai dang dohot ho manaripar tusi.”+
5 Dung i mate ma si Musa naposo ni Jahowa i di luat Moab, dos songon hata ni Jahowa.+
6 Dikuburhon ma ibana di rura na di luat Moab, na di jolo ni Bet-peor. Alai, dang adong nanggo sahalak pe na mamboto kuburanna sahat tu sadari on.+
7 Marumur 120 taon ma si Musa tikki mate ibana.+ Dang kabur dope matana jala gogo dope ibana tikki i.
8 Mangandungi ma halak Israel alani si Musa di Gurun Moab. Dung salpu 30 ari,+ sae ma nasida mangandungi.
9 Marbisuk situtu do si Josua anak ni si Nun, ala gok do tondi parbadia di ibana. Nungnga diappehon si Musa tanganna tu ibana jala nungnga dilantik ibana.+ Ditangihon halak Israel ma ibana jala diulahon nasida ma aha na diparettahon Jahowa tu si Musa.+
10 Alai dang adong be panurirang* na songon si Musa di Israel,+ na massai solhot+ parale-aleonna dohot Jahowa.*
11 Dibahen si Musa do sude tanda halongangan dohot mukjizat di Mesir, dos songon na disuru Jahowa lao bahenonna tu si Firaun, tu sude parkarejona, dohot tu sude luatna.+
12 Marhite tanganna na gogo i, dibahen si Musa do akka tanda halongangan di jolo ni halak Israel.+
Surat na di toru
^ I ma Laut na Balga manang Laut Tengah.
^ As. “boni”.
^ As. “na mananda Jahowa paadop-adop bohi”.
