5 Musa 7:1-26
7 “Molo diboan Jahowa Debatamuna i hamu tu luat na lao ingananmuna i, jala na lao gabe appunamuna,+ usironna do sian jolomuna+ halak Het, halak Girgasi, halak Amori,+ halak Kanaan, halak Perisi, halak Hevi, dohot halak Jebus.+ Akka i ma pitu bangso na unggodang rakyatna jala na umgogo sian hamu.+
2 Molo dung dipasahat Jahowa Debatamuna i nasida tu hamu, jala dung ditaluhon hamu nasida,+ ikkon dihancurhon hamu do nasida sude.+ Unang bahen hamu parjanjian tu nasida jala unang asi rohamuna tu nasida.+
3 Unang marhasohotan hamu tu nasida. Unang lehon borumuna lao di anak ni nasida manang unang buat boru ni nasida lao di anakmuna.+
4 Ai boi do bahenon ni nasida gabe dohot anakmuna manomba debata ni nasida.+ Alani i muruk ma Jahowa tu hamu jala pittor pamateonna ma hamu sude.+
5 “Alai ulahon ma songon on tu nasida: Ruppakkon hamu ma langgatan ni nasida, ropukkon hamu ma tugu sisombaon*+ ni nasida, hancurhon hamu ma tiang sisombaon*+ ni nasida, jala tutung hamu ma akka patung na disomba nasida.+
6 Ai bangso na badia do hamu di Jahowa Debatamuna. Sian sude bangso na adong di tano on,+ nungnga dipillit Jahowa Debatamuna hamu gabe bangsona lao gabe appunana na massai arga.*
7 “Dang ala na unggodang hamu sian sude bangso na asing umbahen na dihaholongi jala dipillit Jahowa hamu.+ Ai sasittongna hamu do bangso na ummotik rakyatna.+
8 Alai ala dihaholongi Jahowa hamu, jala ala toktong Ibana setia tu janji naung didok Ibana tu akka ompumuna,+ diboan Jahowa ma hamu kaluar marhite tanganna na massai gogo i. Ditobus Ibana ma hamu sian ingananmuna gabe hatoban i,+ i ma sian tangan ni si Firaun raja ni Mesir.
9 Takkas do diboto hamu, Jahowa Debatamuna i do Debata na sittong, Debata na boi dihaporseai, Debata na setia tu janjina, jala Debata na patuduhon holong na manoktong* tu halak na makkaholongi Ibana jala na mangoloi parettana+ sahat tu marribu sundutna.
10 Alai balosonna do halak na marsogo ni roha tu Ibana. Pamateonna do nasida.+ Langsung do balosonna halak na marsogo ni roha tu Ibana.
11 Alani i, manat ma hamu. Marsitutu ma hamu mangulahon sude paretta, patik, dohot aturan na ditottuhon, naung hupaboa tu hamu sadari on. Oloi hamu ma sudena i.
12 “Molo toktong ditangihon hamu aturan naung ditottuhon i, dioloi hamu jala diulahon hamu sudena i, toktong ma setia Jahowa Debatamuna i tu parjanjian i. Jala patuduhononna ma holong ni rohana* songon na disumpahon Ibana tu akka ompumuna.
13 Haholonganna ma hamu, pasu-pasuonna, jala bahenonna ma hamu lam godang. Bahenonna ma lam godang anakkonmuna.*+ Bahenonna ma godang hasil ni ladangmuna, gandummuna, anggurmuna na baru, miakmuna,+ akka anak ni lombumuna, dohot anak ni biru-birumuna di luat na dijanjihon Ibana tu akka ompumuna na lao lehononna tu hamu.+
14 Dang adong bangso di portibi on na mandapot godang pasu-pasu songon hamu.+ Dang adong nanggo sahalak pe sian hamu na mandul, bawa manang borua, dohot ma i akka binatang na dipiaro hamu.+
15 Padaoon ni Jahowa do sian hamu sude sahit. Jala dang bahenonna tu hamu sahit na posi songon na niidamuna di Mesir.+ Alai bahenonna do i tu sude halak na marsogo ni roha tu hamu.
16 Pamate ma sude bangso naung dipasahat Jahowa Debatamuna tu hamu.+ Unang asi rohamuna tu nasida.+ Unang somba hamu debata ni nasida.+ Ai gabe jorat do i di hamu.+
17 “Molo didok hamu di bagasan rohamuna, ‘Unggodang do nasida sian hami. Boha ma bahenonnami mangusir nasida?’+
18 Unang pola mabiar hamu tu nasida.+ Ikkon ingotonmuna do akka naung dibahen Jahowa Debatamuna i tu si Firaun dohot tu Mesir.+
19 Ingot hamu ma akka hukuman* na borat na niidamuna i, akka tanda, akka mukjizat,+ jala songon dia tanganna na gogo i dohot hagogoonna na tung massai balga i dipakke Jahowa lao mamboan hamu kaluar sian Mesir.+ Songon i ma na lao bahenon ni Jahowa Debatamuna i muse tu sude bangso na dihabiari hamu.+
20 Tikki so sahat dope hamu disi, bahenon ni Jahowa Debatamuna i ma nasida mabiar.* Jala mate do sude akka halak na tinggal,+ dohot ma i akka halak na martabuni sian hamu.
21 Unang pola mabiar hamu alani nasida. Ai didongani Jahowa Debatamuna i do hamu.+ Ai Debata na ikkon dihabiari jolma do Ibana jala ikkon dipasangap.+
22 “Usiron ni Jahowa Debatamuna i do akka bangso i deba-deba sian jolomuna.+ Alani i, dang boi sahali sude pamateonmuna nasida, asa unang lam godang binatang buas di gurun i jala parohon jea tu hamu.
23 Pasahaton ni Jahowa Debatamuna i do nasida tu tanganmuna. Bahenonmuna do nasida talu jala pamateonmuna do nasida sude.+
24 Pasahaton ni Debata ma raja ni nasida tu tanganmuna.+ Sesaonmuna ma goar ni nasida sian tano on.*+ Dang adong na boi martahan mangalo hamu.+ Ai pamateonmuna do nasida sude.+
25 Tutung hamu ma tu api akka patung na disomba nasida.+ Unang lomo rohamuna tu perak dohot mas ni nasida jala unang buat hamuna i lao di hamu,+ asa unang gabe jorat sudena i di hamu. Ai magigi do Jahowa Debatamuna i tu sudena i.+
26 Unang boan hamu tu jabumuna manang aha pe na mambahen sogo roha ni Debata, asa unang dihancurhon Debata hamu rap dohot akka na diboan hamu i. Ikkon magigi situtu do hamu tu sudena i jala ikkon sogo do rohamuna tusi. Ai akka na patut dihancurhon do sudena i.
Surat na di toru
^ Manang “gabe hasianna”.
^ As. “Pasu-pasuonna ma parbue ni rahimmu”.
^ Manang “ujian”.
^ Manang boi do “gaor, tarancam”.
^ As. “sian toru ni langit on”.
