Hesekiel 13:1-23
13 Dung i didok Jahowa ma muse tu au,
2 “Ale anak ni jolma, paboa ma akka na lao masa tu panurirang ni halak Israel,+ makkatai ma ho tu akka halak na paboahon akka na lao masa sian pikkiranna sandiri.+ Dok ma songon on, ‘Tangihon ma hata ni Jahowa.
3 Songon on ma hata ni Jahowa Tuan Natumimbul i, “Marjea ma akka panurirang na oto, na manurirangi sian pikkiranna, hape dang adong diida nasida parnidaan!+
4 Ale Israel, akka panurirangmi nungnga gabe songon anjing hutan* di kota na ruppak.
5 Dang na lao padengganonmuna akka na sega di tembok i lao di halak Israel.+ Alani i, dang na lao boi be Israel martahan di parporangan di ari ni Jahowa.”+
6 “Dang sittong parnidaan na diida nasida i. Jala gabus do na pinaboa ni nasida i, i ma akka halak na mandok, ‘Songon on do hata ni Jahowa,’ hape dang adong disuru Jahowa nasida. Sai dipaima-ima nasida do asa saut hata ni nasida i.+
7 Dang adong hudok manang aha tu hamu. Alai didok hamu do, ‘Songon on do hata ni Jahowa.’ Dang sittong parnidaan na niidamuna i. Jala gabus do na pinaboamuna i.”’
8 “‘Alani i, songon on ma hata ni Jahowa Tuan Natumimbul i, “‘Ala nungnga didok hamu hata na so sittong, jala gabus do parnidaanmuna i, alookku ma hamu,’ ninna Jahowa Tuan Natumimbul i.”+
9 Angkatokku ma tanganku lao mangalo akka panurirang na paboahon parnidaan na so sittong jala na paboahon gabus.+ Dang adong be nasida di tonga-tonga ni bangso na solhot tu au. Jala dang na lao disurat be goar ni nasida di daftar ni goar ni akka halak Israel. Dang na lao mulak be nasida tu luat ni halak Israel. Sian i botoonmuna ma Au do Jahowa Tuan Natumimbul i.+
10 Masa do sudena i ala nungnga dililuhon nasida bangsokki. Didok nasida do, “Adong do dame.” Hape dang adong dame.+ Tikki dipajongjong halak tembok sian batu na so hasea, dipalester nasida do i mamakke tano kapur.’*+
11 “Dokkon ma tu halak na mamalester pakke kapur i, ruppak nama tembok i. Ai ro nama udan na doras, ro nama udan batu, jala ro nama udan haba-haba lao mangaruppakkon i.+
12 Dung ruppak tembok i, sukkunon ni halak ma ho, ‘Ai aha do guna ni palestermi?’+
13 “Alani i songon on ma hata ni Jahowa Tuan Natumimbul i, ‘Bahenokku ma haba-haba na tung massai gogo dohot udan na doras, ala nungnga muruk situtu Au. Bahenokku ma udan batu lao manghancurhon tembok i ala nungnga muruk situtu Au.
14 Ruppakkonokku ma tembok naung dilappis hamu mamakke tano kapur. Bahenokku ma i dosdos sahat tu tano sappe tarida fondasina. Tikki ruppak kota i, mate ma nang hamu. Sian i botoonmuna ma na Au do Jahowa.’
15 “‘Dung huusehon sude rimashi tu tembok i, dohot tu halak na mangalappis mamakke tano kapur i, dohonokku ma tu hamu, “Dang adong be tembok i, jala nungnga mate be akka halak na mangalappis tembok i.+
16 Nungnga mate be sude panurirang ni Israel. Nasida do na paboahon taringot na lao masa tu Jerusalem. Jala nasida do na paboahon parnidaan taringot na adong dame disi. Hape so adong dame,”’+ ninna Jahowa Tuan Natumimbul i.
17 “Alai anggo ho anak ni jolma, parrohahon ma akka boru ni bangsomi. Dipaboa nasida do taringot na lao masa di ari na naeng ro. Alai sian pikkiran ni nasida sandiri do i. Jala paboa ma aha na lao masa taringot tu nasida.
18 Paboa ma tu nasida, ‘Songon on do hata ni Jahowa Tuan Natumimbul i, “Marjea ma akka borua na manjait pita lao diikkat tu tangan,* jala akka na mambahen kain panutup ni ulu na marragam-ragam ukkuranna, na dipakke lao manjorat hosa ni akka halak. Na naeng dijorat hamu do hosa ni bangsokki? Na dirippu hamu do molo diulahon hamu songon i gabe malua hosamuna?
19 Dileai hamu do Au di jolo ni bangsokki, asa dapotmuna piga-piga gomak barli* dohot piga-piga potong roti.+ Digabusi hamu do bangsokki jala ditangihon nasida do hamu.+ Alani i, gabe dipamate do akka halak na so patut dipamate. Jala dipasombu hamu do mangolu akka halak na patut dipamate.”’
20 “Alani i, songon on ma didok Jahowa Tuan Natumimbul i, ‘Hamu akka borua, sogo do rohakku mangida akka pita na dipakke hamu lao manjorat akka halak. Dibahen hamu do nasida dos songon pidong. Ribakkonokku ma akka pita i sian tanganmuna jala paluaokku ma sude halak naung dijorat hamu songon pidong.
21 Ribakkonokku ma kain panutup ni ulumuna jala paluaokku ma bangsokki sian tanganmuna. Dang boi be nasida takkuponmuna di bagasan joratmuna. Jala sian i botoonmuna ma na Au do Jahowa.+
22 Gabe marmetmet ni roha do halak na sittong alani gabusmuna i.+ Hape so adong hubahen nasida susa.* Jala sai diurupi hamu do akka halak na mangulahon na jahat.+ Gabe dang muba nasida sian pangalaho ni nasida na jahat i. Jala ujungna gabe mate ma nasida.+
23 Alani i hamu akka borua, dang pasahatonmuna be akka parnidaan na so sittong dohot akka ramalan.+ Paluaokku nama bangsokki sian tanganmuna. Jala botoonmuna ma na Au do Jahowa.’”
Surat na di toru
^ Na nidokna dison, i ma dipalester pakke kapur asa songon na togu idaon tembok i.
^ Na nidokna dison, i ma pita na dipakke gabe jimat na diikkatton di siku manang di pargolangan ni tangan.
^ Suan-suanan na songon eme.
^ Manang “nasida makkilala na haccit”.
