Hesekiel 18:1-32
18 Dung i didok Jahowa ma muse tu au,
2 “Aha do lapatan ni uppasa on di luat ni Israel? Didok do, ‘Bapakna do mangallang anggur na asom, alai ngingi ni anakna do na ngilu.’+
3 “‘Songon pastina Au Debata na mangolu,’* ninna Jahowa Tuan Natumimbul i, ‘dang dohononmuna be uppasa i di Israel.
4 Ida ma! Au do nappuna sude na mangolu. Ngolu ni bapakna dohot ngolu ni anakna appunakku do i. Manang ise* na mangulahon dosa, i do na ikkon mate.
5 “‘Uppamana ma, adong sahalak bawa na marroha na tigor, pangalahona denggan, sittong,
6 dang diallang ibana sipanganon naung dipelehon tu debata na so sittong na adong di dolok,+ dang martangiang ibana tu patung na huhagigihon* appuna ni halak Israel, dang olo ibana mangulahon seks dohot istri ni donganna,+ manang mangulahon seks dohot borua na datang bulan,+
7 dang dibahen ibana na jahat tu halak na asing,+ dipaulak ibana do barang jaminan ni halak na marutang tu ibana,+ jala dang dirampok ibana manang ise pe.+ Alai dilehon ibana do sipanganonna tu halak na male,+ jala dilehon ibana do bajuna tu halak na salang-salang.+
8 Tikki dilehon ibana pinjaman, dang dibahen ibana bungana manang dilului ibana uttung tu dirina sandiri.+ Dang diulahon ibana na jahat+ jala adil do ibana mangadili halak na marsoal.+
9 Sai diihutton ibana do akka aturanku jala setia do ibana mangulahon patik na hutottuhon. Halak sisongon i do na marpangalaho na sittong, jala na boi toktong mangolu,’+ ninna Jahowa Tuan Natumimbul i.
10 “‘Alai molo adong anakna bawa na gabe pangarampok,+ pambunu,+ manang mangulahon hajahaton na asing na songon on,
11 (alai dang diulahon bapakna i akka hajahaton sisongon i) diallang anakna i do sipanganon naung dipelehon tu debata na so sittong na adong di dolok. Mangulahon seks do ibana dohot istri ni donganna,
12 jahat do ibana tu halak na marhahurangan dohot tu halak na pogos,+ mangarampok, dang dipaulak ibana barang na gabe jaminan, martangiang do ibana tu patung na huhagigihon i,+ diulahon ibana do akka ulaon na huhagigihon,+
13 jala tikki dilehon ibana pinjaman, dilului ibana do uttung jala dijalo ibana do bungana.+ Alani i, dang boi toktong mangolu anakna i. Ikkon dipamate do ibana alani sude ulaon na huhagigihon na niulahonna i. Alani hasalaanna sandiri do umbahen na dipamate ibana.
14 “‘Molo adong muse gelleng ni sahalak ama na mangida bapakna mangulahon dosa, alai dang diihutton anakna i dosa ni bapakna i nang pe nungnga diida ibana sude dosa na diulahon bapakna i,
15 dang olo ibana mangallang sipanganon naung dipelehon tu debata na so sittong na adong di dolok, dang martangiang ibana tu patung na huhagigihon appuna ni halak Israel, dang mangulahon seks ibana dohot istri ni donganna,
16 dang dibahen ibana na jahat tu manang ise pe, dang dirampas ibana barang na gabe jaminan, dang dirampok ibana manang ise pe, dilehon ibana do sipanganonna tu halak na male, dilehon ibana do bajuna tu halak na salang-salang,
17 dang diulahon ibana na jahat tu halak na pogos, dang dilului ibana uttung tu dirina, manang dipangido ibana bunga ni pinjaman na dilehon ibana, dioloi ibana do sude patik naung hutottuhon, jala diihutton ibana do akka aturanku. Dang dipamate halak sisongon i alani hasalaan ni bapakna. Ikkon toktong do ibana mangolu.
18 Alai anggo bapakna i ikkon dipamate do. Ai nungnga manipu bapakna i, dirampok ibana do akka haha anggina, jala diulahon ibana do na sala di tonga-tonga ni bangsona. Dipamate do bapakna i alani hasalaanna.
19 “‘Alai dohononmuna ma, “Ai boasa dang dohot anakna i dihukum alani hasalaan ni bapakna?” Alana diulahon anakna i do na sittong jala na tigor. Dioloi ibana do sude parettakku jala diulahon. Alani i, toktong ma ibana mangolu.+
20 Manang ise na mangulahon dosa, ibana do na ikkon mate.+ Dang dihukum sahalak anak alani hasalaan ni bapakna. Jala dang dihukum bapakna alani hasalaan ni anakna. Manang ise na mangulahon na sittong, dapotan upa ma ibana alani ulaonna na sittong i. Manang ise na mangulahon na jahat, dihukum ma ibana alani ulaonna na jahat i.+
21 “‘Molo adong halak na jahat muba sian sude dosa na diulahon ibana, dung i dioloi ibana aturanku jala diulahon ibana na tigor dohot na sittong, toktong ma ibana mangolu. Dang na lao mate ibana.+
22 Dang adong nanggo sada pe sian hasalaanna i na lao diingot.+ Toktong ma ibana mangolu ala mangulahon na sittong.’+
23 “‘Dang lomo rohakku molo mate parjahat i,’+ ninna Jahowa Tuan Natumimbul i. ‘Unlomo do rohakku molo muba ibana sian pangalahona na jahat jala toktong mangolu.’+
24 “‘Molo adong halak na sittong manadikkon ulaonna na sittong, jala gabe diulahon ibana na sala,* diulahon ibana sude ulaon na huhagigihon na diulahon parjahat, boi dope ibana toktong mangolu? Dang adong nanggo sada pe sian ulaonna na sittong na lao diingot.+ Ala dang setia be ibana jala ala nungnga diulahon ibana dosa, ikkon mate do ibana.+
25 “‘Alai dohononmuna ma, “Dang sittong na binahen ni Jahowa i.”+ Ale halak Israel tangihon ma! Tutu do dang sittong na hubahen i?+ Manang ulaonmuna i do na so sittong?+
26 “‘Molo adong halak na sittong manadikkon ulaonna na sittong i, jala gabe diulahon ibana na sala, mate ma ibana alani i. Alani hasalaanna sandiri do umbahen na dipamate ibana.
27 “‘Molo adong halak na jahat muba sian pangalahona na jahat i, jala mulai ma diulahon ibana na sittong dohot na tigor, na paluahon ngoluna sandiri do ibana disi.+
28 Dung diboto ibana na sala sude na diulahonna i jala dang diulahon ibana be sudena, toktong ma ibana mangolu. Dang na lao mate be ibana.
29 “‘Alai dohonon ni halak Israel do, “Dang sittong na binahen ni Jahowa i.” Ale halak Israel, tutu do dang sittong na hubahen i?+ Manang ulaonmuna i do na so sittong?’
30 “‘Alani i ale halak Israel, hukumokku ma hamu hombar tu pangalahomuna be,’+ ninna Jahowa Tuan Natumimbul i. ‘Muba ma hamu, muba ma hamu sian sude hasalaanmuna i, asa unang marsala hamu ala dibahen hamu halak na asing mardosa.
31 Tadikkon ma sude ulaon na jahat na niulahonmuna i.+ Pauba hamu ma rohamuna jala pauba hamu ma cara marpikkirmuna.+ Ale halak Israel, boasa pola ikkon mate hamu?’+
32 “‘Dang lomo rohakku molo mate manang ise pe,’+ ninna Jahowa Tuan Natumimbul i. ‘Alani i, muba ma hamu jala toktong ma hamu mangolu.’”+
Surat na di toru
^ Sumpa on patuduhon pasti do ikkon saut janji on, songon pastina Debata mangolu.
^ Molo di bahasa Heber istilah on berkaitan tu hata “kotoran” jala on patuduhon na magigi situtu do tu sada ulaon.
^ Manang “na so tigor”.
