Hesekiel 2:1-10
2 Dung i didok Ibana ma tu au, “Ale anak ni jolma,* jongjong ma ho, asa makkatai Au tu ho.”+
2 Tikki makkatai Ibana tu au, ro ma tondi parbadiana tu au jala dibahen ma au jongjong,+ asa boi hutangihon Ibana na makkatai tu au.
3 Dung i didok Ibana ma, “Ale anak ni jolma, suruokku ma ho tu halak Israel,+ tu bangso pangalo i, na sai mangalo tu Au.+ Nasida dohot akka ompu ni nasida torus do mangalo Au sahat tu sadari on.+
4 Husuru ma ho lao tu bangso sijogal rukkung jala na sai mangalo i.+ Ikkon dohononmu do songon on tu nasida, ‘On ma hata ni Jahowa Tuan Natumimbul i.’
5 Alai anggo bangso i, pangalo do nasida. Ditangihon manang na so ditangihon nasida pe,+ pasti botoon ni nasida do na adong panurirang* di tonga-tonga ni nasida.+
6 “Alai ho anak ni jolma, unang pola mabiar ho tu nasida.+ Unang mabiar ho tu akka hata ni nasida nang pe ho dikalilingi akka ramba na marsuga.*+ Nang pe ho tinggal di tonga-tonga ni kalajengking. Unang mabiar ho tu akka hata ni nasida.+ Unang makkahitir ho mangida bohi ni nasida.+ Ai bangso pangalo do nasida.
7 Ditangihon nasida manang na dang, ikkon paboaonmu do hatakkon tu nasida. Ai pangalo do nasida.+
8 “Alai anggo ho anak ni jolma, tangihon ma na hudok on tu ho. Unang ma mangalo ho songon bangso pangalo i. Bukka ma pamanganmi, allang ma na hulehon on tu ho.”+
9 Dung i huida ma adong tangan na ro tu au.+ Ditiop do sada surat naung digulung.*+
10 Tikki dibukka Ibana gulungan i di jolokku, huida ma timbal balik do disurat gulungan i.+ Disurat do ende na mambahen marsak roha, lungun, jala na mambahen mangandungi.+
Surat na di toru
^ Istilah “anak ni jolma” adong 93 hali di bukku Hesekiel. On ma na parjolo sahali.
^ Manang boi do “nang pe nasida sijogal rukkung jala songon suga na manusuki ho”.
^ As. “sada bukku na digulung”.
