Hesekiel 23:1-49
23 Dung i didok Jahowa ma muse tu au,
2 “Ale anak ni jolma, adong dua borua tubu ni sada ina. Na marhaha maranggi do nasida.+
3 Mulai sian na poso nungnga gabe boru-boru na so hasea nasida di Mesir.+ Disi ma nasida mangulahon seks na so patut jala dang perawan be nasida.
4 Goar ni nasida si Ohola* dohot si Oholiba.* Appunakku do nasida jala ditubuhon nasida do anak dohot boru. Si Ohola, i ma Samaria.+ Jala si Oholiba, i ma Jerusalem.
5 “Alai nungnga gabe boru-boru na so hasea si Ohola.+ Tikki appunakku dope ibana, nungnga marsigorgor hisap-hisap ni dagingna tu akka halletna,+ i ma halak Asiria+ tetanggana i.
6 Akka gubernur na marbaju warna balau do nasida jala akka wakil ni pejabat. Akka bawa na poso jala ganteng do nasida sude, na hundul di atas ni hoda.
7 Sai torus do ibana mangulahon seks na so patut dohot sude anak ni Asiria na sangap i. Jala dibahen ibana do ramun* dirina+ marhite akka patung na huhagigihon* i, i ma silomo ni rohana i.
8 Dang ditinggalhon ibana ulaonna gabe boru-boru na so hasea naung diulahon ibana tikki di Mesir. Ai mulai sian na poso nungnga mangulahon seks ibana dohot nasida. Dang perawan be ibana dibahen nasida, jala diulahon nasida do akka hisap-hisap ni daging ni nasida tu ibana.*+
9 Alani i, hupasahat ma ibana tu tangan ni akka halletna, akka anak ni Asiria,+ i ma akka silomo ni rohana i.
10 Dibahen nasida ma ibana salang-salang.+ Ditakkup ma akka anak dohot boruna,+ jala dipamate pakke podang. Gabe marlea ma ibana di tonga-tonga ni akka borua jala dihukum nasida ma ibana.
11 “Tikki diida si Oholiba na masa i, gabe unjorbut ma pangalahona, gabe boru-boru na so hasea ma ibana unjorbut sian kakakna.+
12 Marsigorgor ma hisap-hisap ni dagingna tu tetanggana, i ma akka anak ni Asiria,+ akka gubernur, akka wakil ni pejabat, na mamakke pakkean hasangapon, jala na hundul di atas ni hoda. Sude nasida akka bawa na poso jala na ganteng.
13 Tikki huida dibahen ibana ramun dirina, huboto ma sarupa do pangalaho ni nasida na dua.+
14 Alai lam jorbut do dibahen ibana ulaonna gabe boru-boru na so hasea i. Diida ibana ma akka gambar ni bawa halak Kasdim na diukir di tembok jala na dibahen marwarna merah.
15 Mamakke ikat pinggang do nasida jala adong do sorban na ganjang di ulu ni nasida. Jala songon tentara do nasida idaon. Sude nasida manggombarhon halak Babel na tubu di luat ni halak Kasdim.
16 Tikki diida ibana akka gambar i pittor marsigorgor ma hisap-hisap ni dagingna mangida nasida. Pittor disuru ibana ma halak lao mandapotton nasida tu Kasdim.+
17 Sai marroan ma akka anak ni Babel tu podomanna. Dibahen nasida ma ibana ramun alani hisap-hisap ni daging nasida.* Dung ramun ibana dibahen nasida, lao ma ibana ala nungnga magigi ibana mangida nasida.
18 “Dung gabe boru-boru na so hasea na so umboto ila ibana, jala dung dibahen ibana dirina salang-salang,+ hutinggalhon ma ibana. Hutinggalhon ma ibana songon Au maninggalhon kakakna, ala nungnga magigi Au tu nasida.+
19 Sai torus do diulahon ibana ulaonna gabe boru-boru na so hasea.+ Sai diingot ibana do na masa di tikki poso ibana, tikki gabe boru-boru na so hasea ibana di luat Mesir.+
20 Sai marsigorgor do hisap-hisap ni dagingna tu nasida, songon gundik ni sahalak bawa na hisap-hisap ni dagingna songon hisap-hisap ni halode dohot hoda.
21 Ale Oholiba, sai masihol do ho tu pangalahom na so umboto ila i na niulahonmu di Mesir+ tikki poso dope ho. Masihol do ho tikki mangulahon seks na so patut nasida dohot ho di tikki poso dope ho.+
22 “Alani i Oholiba, songon on ma hata ni Jahowa Tuan Natumimbul i, ‘Nungnga ditinggalhon ho akka halletmi+ jala nungnga magigi ho tu nasida. Bahenokku ma nasida mangalo ho sian sude inganan,+
23 i ma akka anak ni Babel,+ sude halak Kasdim,+ halak na sian Pekod,+ sian Soa, sian Koa dohot sude anak ni Asiria. Akka bawa na poso jala ganteng do nasida na hundul di atas ni hoda. Akka gubernur do nasida, wakil ni pejabat, tentara, dohot akka halak na tarpillit.
24 Pakkeon ni nasida ma godang kareta porang dohot pasukan tentara lao mangalo ho. Pakkeon ni nasida ma perisai na balga, perisai na gelleng, dohot takkuluk bosi. Dikepung nasida ma ho jala paloasokku ma nasida manghukum ho. Jala lomo-lomo ni nasida ma manghukum ho.+
25 Patuduhonokku ma murukku tu ho jala dihukum nasida ma ho di bagasan muruk. Seaton ni nasida ma igung dohot pinggolmu. Manang ise na mangolu dope, pamateonna ma pakke podang. Buaton ni nasida ma akka anak dohot borum. Jala manang ise na mangolu dope, tutungonna ma pakke api.+
26 Bukkaon ni nasida ma pakkeanmu+ jala rampason ni nasida ma akka perhiasanmu na bagak i.+
27 Marujung ma bahenokku akka ulaonmu na so umboto ila i dohot ulaonmu na melacur i+ naung dipukka ho sian Mesir.+ Dang idaonmu be nasida jala dang ingotonmu be Mesir.’
28 “Songon on ma hata ni Jahowa Tuan Natumimbul i, ‘Pasahatonku nama ho tu akka halak na marsogo ni roha tu ho, i ma akka halak naung ditinggalhon ho ala nungnga magigi ho.+
29 Jahat ma nasida tu ho, ala nungnga sogo roha ni nasida tu ho. Buaton ni nasida ma sude hasil ni halojaonmi.+ Ditinggalhon nasida ma ho salang-salang jala dang marpakkean. Pailaonna ma ho jala paboaonna ma akka ulaon seks na so patut na diulahon ho, akka ulaonmu tikki gabe boru-boru na so hasea, dohot akka ulaonmu na so umboto ila i.+
30 Masa ma sudena i tu ho ala nungnga dijonoki ho akka bangso na asing songon boru-boru na so hasea.+ Ai nungnga dibahen ho ramun dirim alani akka patung ni nasida na huhagigihon i.+
31 Ditiru ho do pangalaho ni kakakmu.+ Alani i, bahenokku ma makkuk ni kakakmi tu tanganmu.’+
32 “Songon on ma hata ni Jahowa Tuan Natumimbul i,
‘Bagas jala balga do makkuk ni kakakmu na lao pakkeonmu minum,+Sirehean jala siparekkelan ni halak ma ho, ai i do isi ni makkuk i.+
33 Inumonmu ma sude isi ni makkuk ni kakakmu Samaria i,Gabe mabuk ma ho jala lungun ma roham,Mabiar ma ho jala ditinggalhon.
34 Inumonmu ma i sappe habis,+ jala diharat ho ma ropuk-ropuk ni makkuk i,Diribaki ho ma susum.
“Ai Au do na mandok i,” ninna Jahowa Tuan Natumimbul i.’
35 “Alani i, songon on ma hata ni Jahowa Tuan Natumimbul i, ‘Ala nungnga dilupahon ho Au, jala dang dipasangap ho Au,+ taononmu ma akibat ni pangalahom na so umboto ila i, dohot pangalahom ala nungnga gabe boru-boru na so hasea.’”
36 Dung i didok Jahowa ma tu au, “Ale anak ni jolma, olo do ho paboahon hukuman tu si Ohola dohot tu si Oholiba?+ Jala olo do ho paboahon akka pambahenan ni nasida na huhagigihon i?
37 Dang setia nasida tu Au,*+ jala gok mudar do tangan ni nasida. Alai dang holan dang setia nasida tu Au, ditutung nasida do muse akka anak na ditubuhon nasida di Au. Ditutung nasida do i gabe pelean tu debata na so sittong.+
38 Asing ni i, on ma na diulahon nasida tu Au: Di ari i, dibahen nasida do ramun bagas jorokku, jala dibahen nasida do ramun akka ari Sabat na hutottuhon i.
39 Dung diseat nasida akka anak ni nasida lao gabe pelean tu debata ni nasida na huhagigihon i,+ ro ma nasida tu bagas jorokku. Jala dibahen nasida ma i ramun+ di ari i. Songon i ma na dibahen nasida di bagas jorokki.
40 Disuru nasida do halak lao manjou akka bawa sian luat na dao.+ Di tikki ro akka bawa i ale Oholiba, maridi do ho. Dipakke ho do celak di matam jala dipakke ho do akka perhiasanmu.+
41 Dung i hundul ma ho di hundulan na bagak.+ Jala di jolona adong do meja.+ Di meja i dipeakkon ho ma dupa+ dohot miak na lao tu Au.+
42 Tarbege ma soara ni akka bawa na marsonang-sonang disi. Di tonga-tonga ni nasida adong do akka parmabuk na diboan sian gurun. Dipakkehon nasida ma golang tu tangan ni borua na dua i dohot mahkota na bagak tu ulu ni nasida.
43 “Taringot tu borua naung loja ala na mangalakkup i, hudok ma, ‘Nang pe songon i, torus do ibana gabe boru-boru na so hasea.’
44 Alani i, torus do nasida ro tu ibana, dos songon halak na ro tu boru-boru na so hasea. Songon i ma nasida ro mandapotton si Ohola dohot si Oholiba, akka borua na mangulahon pangalaho na so umboto ila.
45 Alai hukumon ni halak na mangulahon na sittong* nama nasida. Lehononna ma tu nasida hukuman na patut jaloon ni halak na mangalakkup+ dohot na mambunu.+ Ai nungnga mangalakkup nasida, jala gok mudar do tangan ni nasida.+
46 “Songon on do hata ni Jahowa Tuan Natumimbul i, ‘Ro nama akka tentara lao mangalo nasida. Dibuat nama akka arta ni nasida. Jala mabiar ma manang ise pe ala mangida na masa tu nasida.+
47 Didangguri akka tentara i ma nasida pakke batu.+ Dipamate ma nasida pakke podang. Dipamate ma akka anak dohot boru ni nasida.+ Jala ditutung ma jabu ni nasida.+
48 Marujung ma bahenokku sude pangalahomuna na so umboto ila na diulahon hamu di luat i. Idaon ni sude borua ma na masa tu hamu jala dang tiruon ni nasida pangalahomuna na so umboto ila i.+
49 Bahenon ni akka tentara i ma hamu manaon akibat ni pangalahomuna na so umboto ila i dohot akibat ni dosamuna alani akka debatamuna na huhagigihon i. Sian i botoonmuna ma Au do Jahowa Tuan Natumimbul i.’”+
Surat na di toru
^ Lapatanna, “Kemahku di bagasan ni Ibana”.
^ Lapatanna, “Kemahna”.
^ Molo di bahasa Heber istilah on berkaitan tu hata “kotoran” jala on patuduhon na magigi situtu do tu sada ulaon.
^ Manang “Jala mangulahon seks na so patut do nasida dohot ibana”.
^ Manang “Mangulahon seks na so patut do nasida dohot ibana”.
^ As. “Mangalakkup do nasida”.
