Hesekiel 24:1-27
24 Di ari na pasappuluhon, di bulan na pasappuluhon, di taon na pasiahon, makkatai ma muse Jahowa tu au. Didok ma,
2 “Ale anak ni jolma, surat ma tanggal ni ari sadari on. Ai di tanggal on do raja ni Babel mulai menyerang Jerusalem.+
3 Paboa ma sada uppasa taringot tu bangso pangalo i, dokkon ma,
“‘Songon on do hata ni Jahowa Tuan Natumimbul i,
“Peakkon ma sada hudon di ginjang ni api jala isi ma aek tu hudon i.+
4 Pamasuk ma akka bagian na dumenggan sian jagal naung diseati tu bagasan hudon i,+Pamasuk ma hae-hae bagian jolo dohot hae-hae bagian pudi, jala pamasuk ma akka holi-holi na undenggan tu hudon i sappe gok.
5 Susun ma soban tu toru ni hudon i, jala buat ma biru-biru na dumenggan,+
Robus ma jagalna i jala loppa ma holi-holi na di hudon i.”’
6 “Songon on do hata ni Jahowa Tuan Natumimbul i,
‘Marjea ma kota na mangusehon mudar ni godang halak,+ hudon naung tasikon i, jala tasikna dang boi dipaias!
Pakaluar ma sude isina, pakaluar ma sada-sada,+ unang pola dipilliti.
7 Ai di bagasanna dope mudar na use na binahen ni kota i,+ diusehon ibana do i tu atas ni batu.
Dang diusehon tu tano asa boi ditutupi dohot tano.+
8 Hupasombu do use mudar i di atas ni batu,Jala dang ditutupi pakke tano,Asa ro rimashu lao mambalosson.’+
9 “Alani i, songon on ma hata ni Jahowa Tuan Natumimbul i,
‘Marjea ma kota na mangusehon mudar ni godang halak!+
Susunokku ma disi soban sappe timbo.
10 Tambai ma sobanna jala pagalak ma api,Robus ma jagal i sappe masak, usehon ma huana i, jala pasombu ma holi-holina i sappe mosok.
11 Peakkon ma di atas ni gara hudon na sian tombaga na kosong i asa gabe mohopAsa marrara hudon i,
Asa malala akka na kotor na di bagasanna,+ jala asa matutung tasikna.
12 Alai gabe jut do roha jala loja mangulahon i,Ai dang olo lokkang tasikna na hapal i.+
Alani i, sappatton ma hudon na tasikon i tu bagasan ni api!’
13 “‘Nungnga ramun* be ho alani pangalahom na so umboto ila i.+ Hucoba do lao paiasson ho, alai dang olo ho ias sian ulaonmu na ramun i. Dang na lao ias be ho sahat tu na sae rimashu tu ho.+
14 Au do Jahowa, Au sandiri do naung mandok i. Ikkon saut do i jala dang tahanokku dirikku lao mangulahon i. Dang lungun rohakku jala dang manolsoli Au molo dung huulahon i.+ Hukumon ni nasida ma ho hombar tu pangalahom dohot tu pambahenanmu,’ ninna Jahowa Tuan Natumimbul i.”
15 Dung i didok Jahowa ma muse tu au,
16 “Ale anak ni jolma, holan di bagasan satokkin boi do bahenokku mate halak na dihaholongi ho.+ Unang pola mangandungi ho,* unang ho tangis, jala unang pola manetek ilum.
17 Unang tarbege soaram di tikki morong-orong. Jala unang pola bahen acara tu na mate i.+ Pakke ma sorbanmu+ dohot solopmu,+ unang pola tutup pamanganmu.*+ Jala unang allang roti na diboan halak tu ho.”+
18 Di manogotna i makkatai ma au tu bangso i, jala mate ma istrikku di bornginna i. Jadi marsogotna i, di tikki manogot, huulahon ma songon na diparettahon i tu au.
19 Dung i didok akka halak ma tu au, “Aha do lapatan ni na diulahonmon tu hami? Paboa ma tu hami.”
20 Hualusi ma nasida, “Makkatai do Jahowa tu au. Didok do,
21 ‘Dokkon ma songon on tu halak Israel, “Songon on do hata ni Jahowa Tuan Natumimbul i, ‘Bahenokku nama ramun inganakku na badia i,+ inganan na sai dipuji-puji hamu, inganan na massai arga di hamu, jala inganan na massai dihalomohon rohamuna. Mate hona podang ma akka anak dohot borumuna na ditadikkon hamu di luat i.+
22 Ikkon diulahon hamu do songon na diulahon si Hesekiel. Dang boi ditutup hamu pamanganmuna,* jala dang boi allangonmuna roti na binoan ni halak tu hamu.+
23 Ikkon torus do pakkeonmuna sorbanmuna dohot solopmuna. Dang boi hamu mangandungi manang tangis. Massai susa situtu ma rohamuna alani hasalaanmuna.+ Jala morong-orong ma hamu sama hamu.
24 Sada tanda do di hamu si Hesekiel i.+ Songon dia na diulahon ibana, ikkon songon i do na diulahon hamu. Tikki masa i, botoonmuna ma na Au do Jahowa Tuan Natumimbul i.’”’”
25 “Ale anak ni jolma, tikki hubuat anak dohot boru ni nasida+ rap dohot benteng ni nasida, i ma inganan na uli na mambahen las roha ni nasida, na arga di nasida, dohot na massai dihalomohon roha ni nasida i,
26 mandapot barita ma ho sian halak na selamat.+
27 Di ari i, bukkaonmu ma pamanganmu jala makkatai ma ho tu halak na selamat i. Dang gabe bisu be ho+ jala gabe tanda ma ho di nasida. Sian i botoon ni nasida ma na Au do Jahowa.”
