Hesekiel 32:1-32
32 Di ari na parjolo di bulan na pasappulu duahon di taon na pasappulu duahon, makkatai ma muse Jahowa tu au. Ninna ma,
2 “Ale anak ni jolma, endehon ma ende andung-andung taringot tu si Firaun raja ni Mesir. Dok ma tu ibana,‘Najolo songon singa na poso jala na gogo do ho di tonga-tonga ni akka bangso,Alai nungnga hancur be ho.
Dos songon binatang raksasa+ do ho na mangamuk di akka sunge,Dibahen patmi do kotor aek na di sunge i.’
3 Songon on do hata ni Jahowa Tuan Natumimbul i,
‘Marhite punguan ni godang bangso, husappatton ma jaring tu ho,Takkupon ni nasida ma ho di bagasan ni jaring i.
4 Husappatton nama ho tu tanoJala hupasombu ma ho di ladang.
Bahenokku ma sude pidong na di langit tinggal di atasmu,Jala bahenokku ma butong sude binatang buas na di tano on mangallang jagalmu.+
5 Husappatton ma akka bakkem tu akka dolok,Jala gok ma akka rura dibahen bakkemi.+
6 Banjir ma luat i alani mudarmu sahat tu akka dolok,Jala gok mudar ma akka sunge na di luat i.’
7 ‘Tikki na dipamate i ho, hututupi ma langit jala gabe golap ma akka bintang.
Hubahen ma ombun manutupi mataniari,Jala dang na lao marsinondang be bulan.+
8 Alani pangalahom bahenokku ma golap sude akka benda penerang na di langit,Bahenokku ma golap luatmi,’ ninna Jahowa Tuan Natumimbul i.
9 ‘Bahenokku ma marsak roha ni godang bangso tikki huboan akka rakyatmu tu luat ni musum,Tu luat na so ditanda ho dope.+
10 Bahenokku ma tarsonggot godang bangso,Makkahitir ma raja ni nasida alani biarna tikki hupakaluar podangku di jolo ni nasida lao mangalo ho.
Di ari tikki na huhancurhon i ho,Makkahitir ma nasida ala mabiar dipamate.’
11 Ai songon on do hata ni Jahowa Tuan Natumimbul i,
‘Ro nama podang ni raja ni Babel lao marporang mangalo ho.+
12 Pamateonna ma pakke podang akka pasukanmu dohot akka tentaram na massai gogo i,Mate ma nasida alani podang ni tentara ni sude bangso na massai kejam.+
Bahenon ni nasida ma hancur akka na dihaginjangkon halak Mesir, jala pamateonna ma sude akka tentarana.+
13 Pamateonku ma sude binatang na dipiaro ibana na adong di topi ni sungena na balga i,+Jala dang kotor be sungena i bahenon ni pat ni jolma manang binatang.’+
14 ‘Di tikki i, ias ma bahenokku akka aek ni sunge na di luat i,Bahenokku ma aek na di sunge ni nasida mardalan songon miak,’ ninna Jahowa Tuan Natumimbul i.
15 ‘Tikki hubahen gabe tarulang luat Mesir, dang adong be na mangingani i,+Jala di tikki hupamate sude pangisi ni luat i,Botoon ni nasida ma na Au do Jahowa.+
16 On ma ende andung-andung, endehonon ni akka halak ma i,Endehonon ni akka borua na sian godang bangso.
Endehonon ni nasida ma i alani na masa tu Mesir dohot tu sude akka tentarana,’ ninna Jahowa Tuan Natumimbul i.”
17 Di ari na pasappulu limahon di bulan i, di taon na pasappulu duahon, didok Jahowa ma muse tu au,
18 “Ale anak ni jolma, mangandungi ma ho alani tentara ni Mesir. Boan ma ibana turun tu toru ni tano. Boan ma ibana turun rap dohot akka halak na sian bangso na gogo, rap dohot akka halak na turun tu kuburan.
19 “‘Na dirippu ho do na ubbagak ho sian na asing? Turun ma ho tu kuburan, jala peak ma ho rap dohot akka halak na so marsunat!’
20 “‘Mate nama nasida rap dohot akka halak naung mate dibahen podang.+ Ai nungnga dipasahat ibana tu podang. Sarat ma ibana rap dohot sude tentarana i.
21 “‘Sian Kuburan* na bagas, makkatai ma akka tentara na umgogo tu ibana dohot tu pangurupina. Lao dibunu nama halak Mesir pakke podang jala peak ma nasida rap dohot akka halak na so marsunat.
22 Disi do Asiria rap dohot sude pasukanna. Nungnga mate be nasida dibahen podang jala dibahen do kuburan ni akka pasukanna di sakaliling ni kuburan ni rajana.*+
23 Tung massai bagas do kuburanna jala di sakalilingna i do kuburan ni sude pasukanna. Sude nasida nungnga mate dibahen podang. Ai tikki mangolu nasida, dibahen nasida do mabiar akka halak.
24 “‘Disi do Elamit+ jala di sakalilingna i do kuburan ni akka pasukanna. Nungnga mate nasida sude dibahen podang. Dang marsunat nasida jala turun tu toru ni tano. Najolo dibahen nasida do mabiar akka halak. Saonari maila ma nasida rap dohot akka halak na turun tu kuburan.
25 Nungnga dibahen nasida podoman di ibana di tonga-tonga ni akka halak naung mate tarbunu. Dikalilingi kuburan ni sude pasukanna i do ibana. Dang marsunat nasida sude jala nungnga mate dibahen podang. Ai di tikki mangolu nasida sude, nungnga dibahen nasida mabiar akka halak. Maila ma nasida rap dohot akka halak na turun tu kuburan. Nungnga dibahen be ibana di tonga-tonga ni akka halak naung mate tarbunu.
26 “‘Disi do Mesek dohot Tubal,+ rap dohot sude akka tentarana. Dibahen do kuburan ni nasida di sakaliling ni kuburanna. Dang marsunat nasida sude jala ditusuk pakke podang. Ai di tikki mangolu nasida dibahen nasida do mabiar akka halak.
27 Na lao peak do nasida rap dohot akka tentara na gogo, na so marsunat jala naung mate, naung turun tu Kuburan.* Dipeakkon ma akka podang ni nasida di toru ni ulu ni nasida dohot akka dosa ni nasida di toru ni holi-holi ni nasida. Ai nungnga dibahen akka tentara na gogo i mabiar akka halak di tikki mangolu nasida.
28 Alai anggo ho, diropukkon nama ho di tonga-tonga ni akka halak na so marsunat. Jala peak nama ho rap dohot akka halak na mate dibahen podang.
29 “‘Disi do Edom,+ akka rajana, dohot sude akka pamimpinna. Nang pe gogo nasida alai peak do nasida di tonga-tonga ni akka halak naung mate dibahen podang. Jala peak do nasida rap dohot akka halak na so marsunat,+ dohot akka halak naung turun tu kuburan.
30 “‘Disi do sude akka pamimpin na sian utara rap dohot sude halak Sidon.+ Nang pe nungnga dibahen nasida mabiar akka halak alani gogo ni nasida, alai marlea do nasida di tikki turun rap dohot halak naung tarbunu. Dang marsunat nasida jala peak rap dohot halak naung mate dibahen podang. Jala marlea do nasida rap dohot akka halak naung turun tu kuburan.
31 “‘Idaon ni si Firaun ma sude na masa i. Las ma rohana alani na masa tu sude tentarana.+ Mate hona podang do si Firaun dohot sude tentarana,’ ninna Jahowa Tuan Natumimbul i.
32 “‘Di tikki mangolu si Firaun, dibahen ibana dohot akka tentarana i do mabiar akka halak. Alani i, mate ma ibana rap dohot akka halak na so marsunat naung mate dibahen podang,’ ninna Jahowa Tuan Natumimbul i.”
Surat na di toru
^ Ra na nidokna dison, i ma raja ni Asiria.
