Hesekiel 37:1-28
37 Dung i huhilala ma huaso ni Jahowa. Marhite tondi parbadiana, ditogu-togu Jahowa ma au turun tu tonga-tonga ni rura.+ Gok do holi-holi di rura i.
2 Disuru Ibana ma au makkaliangi rura i. Huida ma massai godang marserakan holi-holi di rura i jala nungnga massai koring holi-holi i.+
3 Disukkun Ibana ma tu au, “Ale anak ni jolma, menurutmu boi do mulak mangolu holi-holi i?” Dung i hudok ma tu Ibana, “Ale Jahowa Tuan Natumimbul, holan Ho do na umboto i.”+
4 Alani i, didok Ibana ma tu au, “Attong paboa ma aha na lao masa taringot tu holi-holi i. Dokkon ma tu nasida, ‘Ale akka holi-holi naung koring, tangihon ma hata ni Jahowa:
5 “‘Songon on do hata ni Jahowa Tuan Natumimbul i tu akka holi-holi on, “Ombussonokku ma hosa tu hamu. Dung i mulak mangolu ma hamu.+
6 Bahenokku ma urat-urat, sibuk, dohot kulit lao manutupi hamu. Dung i lehonokku ma hosa asa mulak mangolu hamu. Sian i botoonmuna ma na Au do Jahowa.”’”
7 Dung i hupaboa ma aha na lao masa dos songon naung diparettahon tu au. Disi sae hupaboa aha na lao masa i, pittor tarbege ma soara na mardarak-darak, jala mardomu ma holi-holi na sada dohot holi-holi na asing.
8 Dung i huida ma akka urat-urat dohot sibuk di akka holi-holi i, jala ditutupi kulit ma nasida. Alai dang adong dope hosa ni nasida.
9 Didok Ibana ma muse tu au, “Ale anak ni jolma, paboa ma aha na lao masa* taringot tu alogo i. Dokkon ma tu alogo i, ‘Songon on do hata ni Jahowa Tuan Natumimbul i, “Ale alogo,* ro ma ho sian sude inganan. Mangullus ma ho tu sude halak naung hona bunu i, asa mulak mangolu nasida.”’”
10 Dung i hupaboa ma aha na lao masa dos songon naung diparettahon Ibana tu au. Masuk ma hosa i tu nasida, gabe mulak mangolu ma nasida jala jongjong.+ Gabe songon pasukan tentara na massai balga situtu do godang ni nasida.
11 Dung i didok Ibana ma muse tu au, “Ale anak ni jolma, akka holi-holi i, i ma sude halak Israel.+ Ai didok nasida do, ‘Nungnga koring be holi-holinami jala dang adong be sipaimaonnami.+ Nungnga hancur situtu be hami.’
12 Alani i, paboa ma aha na lao masa tu nasida. Dokkon ma, ‘Songon on do hata ni Jahowa Tuan Natumimbul i, “Ale bangsokku, bukkaokku nama kuburanmuna+ jala paheheokku nama hamu. Dung i boanokku nama hamu tu luat ni Israel.+
13 Ale bangsokku, di tikki hubukka kuburanmuna i, jala tikki hupahehe hamu sian i, botoonmuna ma na Au do Jahowa.”’+
14 ‘Usehonokku ma tondi parbadiakku tu hamu, jala mulak mangolu ma hamu muse.+ Dung i bahenokku ma hamu tinggal di luatmuna. Jala sian i botoonmuna ma na Au do Jahowa, Au sandiri do naung mandok i dohot na mangulahon i,’ ninna Jahowa.”
15 Didok Jahowa ma muse tu au,
16 “Ale anak ni jolma, buat ma sada tukkot jala surat ma songon on disi, ‘Tu Juda dohot tu akka halak Israel na rap dohot ibana.’+ Buat ma muse sada nai tukkot jala surat ma disi, ‘Tu si Josep, i ma tukkot ni si Epraim, dohot sude halak Israel na rap dohot ibana.’+
17 Dung i golom ma duassa tukkot i asa gabe marsada di tanganmu.+
18 Molo didok donganmu sabangso i tu ho, ‘Na so paboaonmu do tu hami lapatan ni sude na diulahonmon?’
19 Paboa ma tu nasida, ‘Songon on do hata ni Jahowa Tuan Natumimbul i, “Buatokku nama tukkot ni si Josep na di tangan ni si Epraim dohot na di tangan ni akka marga ni Israel na rap dohot ibana. Dung i, bahenokku nama i marsada dohot tukkot ni si Juda. Bahenokku ma i gabe sada tukkot+ jala bahenokku ma i marsada di tanganku.”’
20 Dung disurat ho akka tukkot i, tiop ma i asa boi diida nasida.
21 “Dung i paboa ma tu nasida, ‘Songon on do hata ni Jahowa Tuan Natumimbul i, “Buatokku nama halak Israel sian tonga-tonga ni bangso inganan ni nasida marserak i. Papunguokku ma nasida sian sude inganan jala boanokku ma nasida tu luat ni nasida.+
22 Bahenokku ma nasida gabe sada bangso di luat i,+ di akka dolok ni Israel. Sada ma raja na mamaretta nasida.+ Dang gabe dua bangso be nasida manang tarbagi gabe dua harajaon.+
23 Dang bahenon ni nasida be ramun* diri ni nasida marhite pangalaho dohot patung na huhagigihon* i, rap dohot sude hasalaan ni nasida.+ Urupanku ma nasida manadikkon sude ulaon na parohon dosa. Ai diulahon nasida do i ala dang setia tu Au. Paiasokku ma nasida. Bahenokku ma nasida gabe bangsokku, jala Au sandiri ma na gabe Debata ni nasida.+
24 “‘“Si Daud naposokki ma na gabe raja ni nasida.+ Sada ma parmahan na manjaga nasida sude.+ Diulahon nasida ma patik naung hutottuhon i, jala oloan ni nasida ma sude aturanku sian nasa roha ni nasida.+
25 Na lao tinggal ma nasida di luat naung hulehon i tu naposokku si Jakkob, luat inganan ni akka oppumuna.+ Disi ma nasida tinggal saleleng ni lelengna,+ rap dohot anakna dohot akka pinopparna.+ Jala si Daud naposokki ma na gabe pamimpin ni nasida saleleng ni lelengna.+
26 “‘“Bahenokku ma parjanjian dame dohot nasida,+ jala marlakku do i sahat tu saleleng ni lelengna. Paradeokku ma sada luat lao inganan ni nasida, bahenokku ma nasida lam godang,+ jala pajongjongokku ma inganakku na badia i di tonga-tonga ni nasida saleleng ni lelengna.
27 Bahenokku ma kemah inganakku di tonga-tonga ni nasida. Au ma na gabe Debata ni nasida jala nasida ma na gabe bangsokku.+
28 Dung diida akka bangso hubahen inganakku na badia i di tonga-tonga ni nasida saleleng ni lelengna, botoon ni nasida ma na Au do Jahowa. Botoon ni nasida ma Au sandiri do na pabadiahon halak Israel i.”’”+
Surat na di toru
^ Molo di bahasa Heber istilah on berkaitan tu hata “kotoran” jala on patuduhon na magigi situtu do tu sada ulaon.
