Hesekiel 41:1-26
41 Dung i diboan ibana ma au tu bagian luar ni inganan na badia* i. Diukkur ibana ma akka tiangna. Onom asta* ma ganjang ni tiang na di sabola kanan, jala onom asta ma ganjang ni tiang na di sabola kiri.
2 Bidang ni tiang na di sabola kanan lima asta jala na di sabola kiri pe lima asta. Bidang ni dalan lao masuk tu inganan na badia sappulu asta. Dung i diukkur ibana ma muse ruangan i, ganjangna 40 asta, jala bidangna 20 asta.
3 Masuk ma ibana muse tu ruangan na asing.* Diukkur ibana ma akka tiang na adong di dalan masuk lao tu ruangan i. Bidangna dua asta jala ganjangna pitu asta. Bidang ni dalan lao masuk tusi onom asta.
4 Dung i diukkur ibana ma muse ruangan na menghadap tu ruangan na di luar ni inganan na badia i. Ganjangna 20 asta jala bidangna 20 asta.+ Didok ibana ma tu au, “On ma Inganan na Massai Badia.”+
5 Dung i diukkur ibana ma tembok ni bagas joro i, onom asta ma tobalna. Jala opat asta ma bidang ni akka ruangan na di sapping ni bagas joro i.+
6 Dibahen do tolu tingkat akka ruangan na di sapping ni bagas joro i. Dibahen ma 30 ruangan di sada tingkat. Dibahen do umhapal tembok ni akka ruangan na di tingkat na parjolo sian na paduahon. Jala umhapal do tembok ni ruangan na di tingkat na paduahon sian na patoluhon. Dibahen pe songon i, asa boi do dipasang lante ni akka ruangan i di tembok i. Alani i, dang pola be dibahen lubang di tembok i lao mambahen lante ni akka ruangan i.+
7 Ubbidang do ruangan na di lante na paduahon sian na di lante na parjolo. Jala ubbidang do ruangan na di lante na patoluhon sian na paduahon. Di sabola kanan dohot di sabola kiri ni bagas joro i adong do tangga na marlekkuk-lekkuk.+ Tangga i ma dalan sian lante na parjolo tu lante na paduahon sahat tu lante na patoluhon.
8 Huida ma dibahen do bagas joro i di atas ni sada panggung na timbo. Molo diukkur fondasi ni akka ruangan na di sapping i, sian atas ni tano sahat tu sudut na di ginjang, timbona sada tukkot, i ma onom asta.
9 Tobal ni tembok parluar ni akka ruangan na di sapping ni bagas joro i lima asta. Adong dope na dipasombu kosong* di ginjang ni panggung i di sakaliling ni bagas joro i.
10 Di holang-kolang ni bagas joro i dohot ruang makan*+ adong do dibahen jarakna, 20 asta ma di sabola kiri jala 20 asta ma di sabola kanan.
11 Di holang-kolang ni ruangan na di sapping ni bagas joro i dohot bagian na kosong na di atas ni panggung i adong do pintu masuk. Sada di sabola utara jala na sada nai di sabola selatan. Bidang ni bagian na kosong i lima asta.
12 Di sabola barat ni bagas joro i, adong do muse ruangan na menghadap tu bagian pudi ni bagas joro i. Bidangna 70 asta jala ganjangna 90 asta. Hapal ni tembok ni ruangan i lima asta.
13 Diukkur ibana ma ganjang ni bagas joro i, ganjangna 100 asta. Molo ditambahon ganjang ni alaman na di pudi tu ganjang ni ruangan i* sahat tu tembokna, 100 asta ma sude.
14 Molo ditambahon bidang ni bagian jolo ni bagas joro na menghadap tu sabola timur tu akka alaman na di sappingna, 100 asta ma sude.
15 Diukkur ibana ma muse ruangan na di pudi ni bagas joro i. Diukkur ibana ma ganjang ni ruangan na menghadap tu alaman na di pudi ni bagas joro i, dohot alaman na di sabola kanan dohot na di sabola kirina, 100 asta ma ganjangna sude.
Diukkur ibana do muse Inganan na Badia, Inganan na Massai Badia,+ terras na menghadap tu alaman,
16 dalan lao masuk tusi, akka jandela na kusenna+ umbalga di bagasan sian na di luar, dohot akka alaman na di holang-kolang ni inganan na tolu i. Dilappis do pakke hau+ akka tembok na di dalan masuk lao tusi, mulai sian toru sahat tu jandelana. Jala dilappis do muse sakaliling ni jandelana i pakke hau.
17 Diukkur do sude na di ginjang ni pintu masukna i, na di bagasan ni bagas joro i, na di luarna, dohot tembok na di sakalilingna i.
18 Diukir do gambar ni hau palem+ dohot akka kerubim*+ disi. Di holang-kolang ni dua kerubim dibahen do sada hau palem. Jala ganup kerubim dua bohina.
19 Bohi na songon bohi ni jolma dibahen menghadap tu hau palem na sada. Jala na songon bohi ni singa dibahen menghadap tu hau palem na sada nai.+ Diukir do songon i di sakaliling ni bagas joro i.
20 Diukir do gambar ni hau palem dohot kerubim di tembok ni inganan na badia i, mulai sian toru sahat tu ginjang ni pintu masuk i.
21 Persegi do bentuk ni akka tiang ni pintu+ na di inganan na badia i. Di jolo ni Inganan na Massai Badia adong ma na songon
22 langgatan na sian hau.+ Di akka sudut ni langgatan i adong do tiang. Jala alasna dohot akka dindingna sian hau do dibahen. Timbona tolu asta jala ganjangna dua asta. Dung i didok ibana ma tu au, “On ma meja na di jolo ni Jahowa.”+
23 Adong do dua pintu+ ni Inganan na Badia dohot di Inganan na Massai Badia.
24 Ganup pintu adong dua daun ni pintuna jala boi do marputar pintuna i.
25 Di akka pintu ni inganan na badia i diukir do gambar ni kerubim dohot hau palem songon na adong di tembokna i.+ Di ginjang ni terrasna i di bagian luar dilokkotton do atap na sian hau.
26 Adong do akka jandela jala diukir do gambar ni hau palem di sabola kiri dohot di sabola kanan ni terras i. Dibahen do songon i muse di akka ruangan na di sapping ni bagas joro i dohot di atap na sian hau i. Umbalga do kusen+ ni jandela i na di bagasan sian na di luar.
Surat na di toru
^ As. “bagas joro”. Di pasal 41 dohot 42 na nidok i ma bagian luar ni inganan na badia manang sude na adong di inganan na badia i. Termasuk ma i bagas joro, Inganan na Badia, dohot Inganan na Massai Badia.
^ Na nidokna dison, i ma asta na ganjang. Ida Lampiran B14.
^ Na nidokna, i ma Inganan na Massai Badia.
^ Ra na nidokna, i ma dalan na soppit di sakaliling ni bagas joro i.
^ Manang “akka ruangan”.
^ Na nidokna, i ma ruangan na di sabola barat ni bagas joro i.
