Hesekiel 43:1-27
43 Dung i diboan ibana ma au tu gerbang na di sabola timur.+
2 Disi huida ma sinondang hasangapon ni Debata ni Israel ro sian timur.+ Soarana dos songon soara ni aek na marhasak.+ Alani sinondang hasangaponna i gabe torang ma tano on.+
3 Parnidaan on dos do songon parnidaan na huida di tikki na ro i au* lao manghancurhon kota on.* Jala sarupa do on songon parnidaan na huida di topi ni Sunge Hebar.+ Alani i marsomba ma au.
4 Dung i masuk ma sinondang hasangapon ni Jahowa tu bagas joro i. Masuk ma i sian gerbang na menghadap tu sabola timur.+
5 Dung i huhilala ma tondi parbadia* ni Debata mangangkat au. Diboan ma au tu alaman na di bagasan ni bagas joro i. Huida ma nungnga gok sinondang ni hasangapon ni Jahowa disi.+
6 Hubege ma adong soara na makkatai tu au sian bagas joro i. Ro ma sahalak bawa jala jongjong di labbungku.+
7 Didok ibana ma tu au,
“Ale anak ni jolma, on ma inganan ni tahtakku+ jala sidege-degean ni pattu.+ Maringanan nama Au di tonga-tonga ni halak Israel saleleng ni lelengna.+ Dang bahenon ni nasida dohot akka raja ni nasida be marlea goarhu na badia i.+ Ai marlea do goarhi dibahen nasida ala dang setia nasida tu Au* jala disomba nasida do akka patung i songon raja.*
8 Dibahen nasida do marlea goarhu na badia i alani akka ulaon ni nasida na huhagigihon i. Dibahen nasida do dalan masuk tu inganan ni debata ni nasida na huhagigihon i di sapping ni dalan masuk lao tu bagas jorokku. Dibahen nasida do tiang ni pintu tu inganan ni debata ni nasida di sapping ni tiang ni pintu tu bagas jorokku. Holan tembok ma holang-kolang ni debata ni nasida dohot Au.+ Alani i muruk ma Au jala pamateonku nama nasida sude.+
9 Saonari ikkon dipadao nasida do akka patung na disomba nasida songon raja i. Jala ikkon dipaso nasida do akka ulaon na patuduhon nasida dang setia tu Au.* Dung i maringanan ma Au di tonga-tonga ni nasida saleleng ni lelengna.+
10 “Jala ho anak ni jolma, patorang ma taringot tu bagas joro i tu halak Israel,+ asa maila nasida alani akka hasalaan ni nasida i,+ jala asa diparsiajari nasida rancangan ni bagas joro i.
11 Molo maila nasida alani sude naung diulahon nasida i, ikkon paboaonmu do tu nasida rancangan ni bagas joro i, susunanna, dalan lao kaluar sian i, jala dalan lao masuk tusi.+ Patudu ma tu nasida sude rancangan ni bagas joro i jala paboa ma akka patik dohot aturan disi. Suratton ma i di jolo ni nasida asa diparrohahon nasida akka rancanganna jala diulahon nasida akka aturanna.+
12 On ma patik taringot tu bagas joro i: Massai badia+ do sude sakaliling ni pussu ni dolok i. I do patik taringot tu bagas joro i.
13 “Saonari, hupatudu ma tu ho sadia balga langgatan i.+ Diukkur do i dos songon tikki mangukkur bagas joro.* Timbo ni tingkat na di toru sada asta. Ubbidang do sakaliling ni tingkat on sabidang ni talapak ni tangan sian na di ginjangna. Di pinggir ni tingkat na di toru i dibahen do saluran, timbona sajokkal.* Songon i ma dasar ni langgatan i.
14 Tingkat na paduahon i timbona dua asta. Ubbidang do sakaliling ni tingkat na paduahon on sada asta sian tingkat na patoluhon. Timbo ni tingkat na patoluhon opat asta. Ubbidang do sakaliling ni tingkat na patoluhon on sada asta sian na di ginjangna.
15 Tingkat parginjang i ma parapian. Timbona opat asta. Di suhi-suhi ni parapian i adong do opat tanduk.+
16 Persegi do bentuk ni parapian i. Ganjangna 12 asta jala bidangna 12 asta.+
17 Tingkat na patoluhon ganjangna 14 asta jala bidangna 14 asta. Ubbidang do sakaliling ni tingkat na patoluhon on sada asta sian tingkat na parginjang. Di sakaliling ni tingkat na patoluhon i adong do saluran na timbona satonga asta.
“Tanggana menghadap tu sabola timur.”
18 Dung i didok ibana ma tu au, “Ale anak ni jolma, songon on do hata ni Jahowa Tuan Natumimbul i, ‘On ma tudu-tudu na ikkon diihutton, naung ditottuhon tikki dibahen langgatan i. Ihutton ma on tikki dibahen pelean situtungon i. Jala tikki dipispisson mudar i.’+
19 “‘Ikkon lehononmu do sada lombu jantan na poso, lao gabe pelean hasesaan ni dosa.+ Lehon ma i tu akka malim halak Lepi na sian pinoppar ni si Sadok+ na marhobas di jolokku,’ ninna Jahowa Tuan Natumimbul i.
20 ‘Buat ma deba mudarna jala daisson tu opat tanduk na di langgatan i. Daisson ma i muse tu opat suhi-suhi ni tingkat patoluhon i dohot tu sude pinggiranna i. Bahen ma songon i asa ias jala badia langgatan i sian dosa.+
21 Dung i boan ma lombu jantan na poso lao gabe pelean hasesaan ni dosa. Boan ma i lao ditutung tu inganan naung ditottuhon di bagas joro, i ma inganan na di luar ni inganan na badia i.+
22 Di ari na paduahon, ikkon dipelehon do hambing jantan na sehat lao gabe pelean hasesaan ni dosa. Ikkon dipabadia akka malim do langgatan i dos songon na diulahon nasida tikki mamelehon lombu jantan na poso.’
23 “‘Dung sae dipabadia langgatan i ikkon dipelehon do lombu jantan na poso jala na sehat dohot biru-biru jantan na sehat.
24 Boan ma i tu jolo ni Jahowa. Ikkon disaburhon malim do sira+ tu atas ni lombu dohot biru-biru i. Dung i tutung ma sudena i lao gabe pelean situtungon tu Jahowa.
25 Saleleng pitu ari ikkon dipelehon ho do ganup ari sada hambing jantan. Pelehon ma i gabe pelean hasesaan ni dosa.+ Dung i ikkon dipelehon do sada lombu jantan na poso dohot sada biru-biru jantan. Binatang na dipelehon ho dang boi adong cacatna.
26 Saleleng pitu ari ikkon dipaias akka malim do langgatan i jala dipabadia. Marhite songon i, boi ma dipakke langgatan i.
27 Dung salpu na pitu ari i, di ari na paualuhon+ sahat tu satorusna, ikkon dipelehon malim do di langgatan i pelean situtungon dohot pelean pardameanmuna.* Dung i las ma rohakku mangida hamu,’+ ninna Jahowa Tuan Natumimbul i.”
Surat na di toru
^ Manang boi do “ibana”.
^ Na nidokna, i ma tikki paboahon na lao dihancurhon luat i.
^ Di bahasa aslina, hata na dipakke dison boi do lapatanna suru-suruan.
^ Manang “dang setia nasida tu Au dos songon boru-boru na so hasea”.
^ As. “akka bakke ni raja ni nasida naung mate i”.
^ Manang “dang setia tu Au songon boru-boru na so hasea”.
^ Na nidokna dison, asta na ganjang do na dipakke lao mangukkur langgatan i. Ida Hes 40:5. Ida Lampiran B14.
^ Hira-hira 22,5 cm. Ida Lampiran B14.
