Hesekiel 6:1-14
6 Makkatai ma muse Jahowa tu au, didok ma,
2 “Ale anak ni jolma, bereng ma doppak akka dolok ni Israel. Jala paboa ma aha na lao masa tu nasida.
3 Dokkon ma songon on, ‘Ale akka dolok ni Israel, tangihon ma hata ni Jahowa Tuan Natumimbul i. Songon on do hata ni Jahowa Tuan Natumimbul i tu akka dolok, tu bukit, tu sunge, dohot tu rura, “Parookku ma podang tu hamu jala bahenokku ma hancur akka inganan panombaonmuna.*
4 Hancur nama akka langgatanmuna jala ruppak nama akka ingananmuna lao manutung dupa.+ Sappattonokku ma akka halak naung dibunu tu jolo ni patungmuna na mambahen Au magigi i.*+
5 Sappattonokku ma akka bakke ni halak Israel tu jolo ni akka patung ni nasida na mambahen Au magigi i. Jala bahenokku ma marserak akka holi-holimuna tu sakaliling ni langgatanmuna i.+
6 Di sude ingananmuna tinggal, dihancurhon ma kotana+ jala diruppakkon ma akka inganan panombaonmuna* jala dipasombu hancur.+ Diruppakkon ma langgatanmuna i jala dihancurhon. Maruppak ma akka patungmuna na mambahen Au magigi. Diruppakkon ma ingananmuna manutung dupa, jala maropuk ma sude hasil ni ulaonmuna.
7 Marragean ma sude akka halak na dibunu di tonga-tongamuna.+ Jala sian i, botoonmuna ma na Au do Jahowa.+
8 “‘“Alai pasombuonku do piga-piga halak mangolu sian hamu. Di tikki marserak hamu tu akka luat, jala di tikki tinggal hamu di tonga-tonga ni akka bangso, adong do sian hamu na malua sian podang.+
9 Ingoton ni halak na malua i ma Au di tonga-tonga ni bangso na mamboan nasida.+ Botoon ni nasida ma songon dia haccit ni rohakku, ala dang setia* nasida jala marbalik sian Au,+ jala ala massai lomo do roha ni nasida tu akka patung na mambahen Au magigi.+ Maila ma nasida alani akka ulaon ni nasida na jahat i. Jala magigi ma nasida tu akka ulaon ni nasida na mambahen Au magigi i.+
10 Botoon ni nasida ma na Au do Jahowa, jala sipasingot taringot tu jea i dang holan hata-hata, alai situtu do i.”’+
11 “Songon on ma hata ni Jahowa Tuan Natumimbul i, ‘Martopak ma ho jala paspasson ma patmu tu tano alani marsakna. Mangandungi ma ho alani sude ulaon na jahat dohot akka ulaon na huhagigihon naung diulahon bangso Israel. Ai mate nama nasida alani podang, haraparon, dohot sahit.+
12 Ai manang ise na dao, mate ma ibana alani sahit. Manang ise na jonok, mate ma ibana alani podang. Jala manang ise na malua sian akka i jala na mangolu dope, mate ma ibana alani haraparon. Ai usehonokku nama sude rimashu tu nasida.+
13 Marpeakan ma bakke ni halak naung tarbunu di tonga-tonga ni akka patung ni nasida na mambahen Au magigi i, dohot di sude langgatan ni nasida.+ Marpeakan ma bakke ni nasida di ganup dolok na timbo, di ganup pussu ni dolok, di toru ni hau na balga, jala di toru ni dakka ni hau na balga, inganan ni nasida manutung pelean na angur lao palashon roha ni patung ni nasida na mambahen Au magigi i.+ Di tikki i, botoonmuna ma Au do Jahowa.+
14 Angkatokku ma tanganku lao manghukum nasida. Jala bahenokku ma luat ni nasida gabe tarulang. Sude inganan ni nasida tading gabe tarulang. Tarulang ma i jala upparah sian gurun na di labbung ni Dibla. Dung i botoon ni nasida ma na Au do Jahowa.’”
Surat na di toru
^ Molo di bahasa Heber istilah on berkaitan tu hata “kotoran” jala on patuduhon na magigi situtu do tu sada ulaon.
^ Manang “dang setia songon boru-boru na so hasea”.
