Hesekiel 7:1-27
7 Dung i didok Jahowa ma muse tu au,
2 “Ale anak ni jolma, songon on ma hata ni Jahowa Tuan Natumimbul i tu luat ni halak Israel, ‘Nungnga juppang be ujungna. Marujung nama sude luat i.
3 Nungnga juppang be tikkina, marujung nama ho. Usehonokku nama rimashu tu ho. Hukumokku ma ho hombar tu pangalahom, jala ikkon martanggung jawab do ho tu sude pangalahom na huhagigihon i.
4 Dang asi be rohakku mangida ho, jala dang patuduokku be burju ni rohakku tu ho.+ Balosokku ma ho hombar tu pangalahom, jala susa ma ho alani pangalahom na huhagigihon i.+ Sian i botoonmu ma na Au do Jahowa.’+
5 “Songon on ma hata ni Jahowa Tuan Natumimbul i, ‘Ida ma! Nungnga ro be hasusaan. Hasusaan na so hea dope masa.+
6 Nungnga jonok be ujungna, na lao ro nama ujungna. Toppu do i masa tu ho, jala pasti ro do i.
7 Hamu akka na tinggal di luat on, nungnga juppang be ujungmuna.* Nungnga juppang be tikkina, jala nungnga jonok arina i.+ Masa ma na gaor di akka dolok, alai dang soara ni na marlas ni roha i.
8 “‘Satokkin nai usehonokku nama murukki.+ Usehonokku ma sudena rimashi tu ho.+ Hukumokku ma ho hombar tu pangalahom, jala ikkon martanggung jawab do ho tu sude pangalahom na huhagigihon i.
9 Dang asi be rohakku mangida ho, jala dang patuduokku be burju ni rohakku tu ho.+ Balosokku ma ho hombar tu pangalahom, jala susa ma ho alani pangalahom na huhagigihon i. Sian i botoonmu ma na Au do Jahowa, na manghukum ho.+
10 “‘Nungnga juppang be ari i!+ Nungnga jonok be tikkina! Marujung nama hamu.* Jala nungnga rade tukkot na lao hupakke manghukum hamu. Nungnga lam ginjang be roha ni akka musumuna i.
11 Alani hajahatonmuna,+ attukon ni tukkot i ma hamu gogo. Dang adong na boi malua. Dang adong arta ni nasida na tinggal, akka halak, songon i nang hasangapon ni nasida.
12 Nungnga juppang tikkina, jala nungnga ro arina. Pasombu ma dang marlas ni roha akka panuhor. Jala pasombu ma dang marsak akka partiga-tiga. Ai nungnga marsigorgor murukku tu sude jolma na disi.*+
13 Dang na lao mulak be partiga-tiga i tu manang aha pe naung dijual ibana, nang pe mangolu dope ibana di tikki i. Ai tu sude jolma do masa parnidaan i. Dang adong nanggo sahalak pe na malua sian hasusaan i. Jala dang adong nanggo sahalak pe na mangulahon na jahat na boi toktong mangolu.
14 “‘Nungnga diombus nasida tarompet+ jala nungnga rade be sude jolma. Alai dang adong na lao marporang. Ai muruk do Au tu nasida sude.+
15 Adong do podang di luar ni kota,+ jala adong do sahit dohot haraparon di bagasan ni kota. Manang ise na di ladang, mate ma alani podang. Jala manang ise na di bagasan ni kota mate ma alani sahit dohot haraparon.+
16 Akka halak na marhasil malua lari ma tu akka dolok. Songon darapati na di rura, mangandungi ma nasida alani hasalaan ni nasida sandiri.+
17 Gale ma tangan ni nasida sude, jala manetek ma aek sian dugul-dugul ni nasida.*+
18 Dipakke nasida ma abit goni+ jala makkahitir ma nasida. Maila ma sude halak jala dibotaki sude halak ma uluna.*+
19 “‘Dibolokkon nasida ma perak ni nasida tu akka dalan, jala magigi ma nasida tu mas ni nasida. Ai dang boi nasida malua dibahen perak manang mas ni nasida di ari rimas ni Jahowa i.+ Dang na lao puas nasida dibahen i sude, jala dang butong. Ai gabe tartuktuk do nasida sude jala mangulahon na sala alani i.*
20 Bangga do nasida tu akka perhiasan ni nasida na massai bagak i. Bangga do nasida ala mambahen patung na huhagigihon dohot akka debata na huhasogohon sian perak dohot mas.+ Alani i, bahenokku ma nasida magigi tu sudena i.
21 Paloasokku ma i* rampokon ni akka halak na sian bangso na asing, jala paloasokku ma i buaton ni akka parjahat. Dung i bahenon ni nasida ma i ramun.*
22 “‘Padaookku ma bohikku sian nasida,+ jala dibahen nasida ma ramun inganakku na badia* i. Masuk ma pangarampok tusi jala dibahen nasida ma i ramun.+
23 “‘Parade ma ratte,*+ ai nungnga gok di luat i halak na mate ala diadili mamakke cara na so tigor.+ Jala nungnga gok hajahaton di kota i.+
24 Parookku ma bangso na unjahat+ jala buaton ni akka bangso i ma jabu ni nasida.+ Bahenokku ma dang ginjang be roha ni akka halak na gogo. Jala bahenon ni akka bangso i ma ramun akka inganan na badia ni nasida.+
25 Tikki masa hasusaan i, sai dilului nasida do hadameon. Alai dang dapot ni nasida.+
26 Dang sae dope hasusaan na sada, nungnga ro hasusaan na asing. Sai marroan ma barita na so denggan. Dilului akka halak ma parnidaan sian panurirang,*+ patik* sian akka malim, jala dipangido nasida ma poda sian akka pangituai.*+ Alai dang adong be guna ni i sude.
27 Marsak ma raja+ jala mandele ma akka pamimpin. Makkahitir ma tangan ni sude jolma alani biarna. Ai bahenokku ma tu nasida hombar tu pangalaho ni nasida. Huadili ma nasida songon cara ni nasida mangadili na asing. Sian i botoon ni nasida ma na Au do Jahowa.’”+
Surat na di toru
^ Manang boi do “bahenokku ma hiasan tu ulum”.
^ Manang boi do “Bahenokku ma hiasan tu ulum”.
^ Na nidokna dison, i ma na manuhor manang na manjual tano dang maruttung ala masa nama sude hasusaan tu nasida.
^ Na nidokna dison, i ma tarkossing-kossing alani biarna.
^ Na nidokna dison, dibotaki nasida ulu ni nasida ala marlungun ni roha.
^ Na nidokna dison, i ma perak dohot mas ni nasida.
^ Na nidokna dison, i ma mas dohot perak na dipakke lao mambahen patung.
^ Ra na nidokna dison, i ma Inganan na Massai Badia na di joro ni Jahowa.
^ Na nidokna dison, i ma ratte na dipakke tu halak na tartakkup.
^ Manang “tudu-tudu”.
