Hesekiel 8:1-18
8 Di ari na paIimahon, di bulan na paonomhon, di taon na paonomhon, tikki hundul au di jabu, huhilala ma huaso* ni Jahowa Tuan Natumimbul i. Tikki i, hundul do di jolokku akka pangituai* ni Juda.
2 Dung i huida ma adong sasahalak na songon api. Sian pinggangna tu toru songon api do idaon.+ Jala sian pinggangna tu ginjang, marhillong do Ibana songon warna ni mas na dicampur dohot perak.+
3 Disurdukkon Ibana ma na songon tangan lao maniop obukku. Dung i adong ma huaso* na mangangkat au tu langit.* Diboan ma au tu Jerusalem di bagasan parnidaan na sian Debata. Diboan ma au tu gerbang ni alaman na di bagasan+ na menghadap tu sabola utara. Disi adong do patung* na mambahen sogo roha ni Debata.+
4 Huida ma disi hamuliaon ni Debata ni Israel.+ Hamuliaon songon na hea huida tikki di rura.+
5 Didok Ibana ma tu au, “Ale anak ni jolma, ida ma doppak utara.” Dung i huida ma doppak utara. Huida ma adong patung* na mambahen Debata muruk. Patung i adong di dalan masuk di sabola utara ni gerbang na di labbung ni langgatan.
6 Didok Ibana ma muse tu au, “Ale anak ni jolma, nungnga diida ho akka na jorbut, akka ulaon na huhagigihon na diulahon halak Israel dison?+ Sudena i mambahen Au mandao sian inganakku na badia i.+ Alai lao idaonmu dope akka ulaon na unjorbut na mambahen Au magigi.”
7 Diboan Ibana ma au tu pintu masuk na di alaman. Jala huida ma adong lubang di tembok.
8 Didok Ibana ma tu au, “Ale anak ni jolma, pabalga ma lubang na di tembok i.” Jadi hupabalga ma lubang na di tembok i. Dung i huida ma adong sada pintu masuk.
9 Jadi didok ma tu au, “Masuk ma ho, ida ma akka ulaon na jahat na diulahon nasida dison na mambahen Au magigi.”
10 Masuk ma au tu bagasan jala huida ma gambar ni sude binatang na mangissir, akka binatang na massai huhagigihon,+ dohot sude patung na huhagigihon* appuna ni halak Israel.+ Diukir do sude gambar i di sakaliling ni tembok.
11 Adong do 70 halak pamimpin ni halak Israel na jongjong di jolona. Dohot ma i si Jesania anak ni si Sapan.+ Ganup do nasida maniop panutungan ni dupa. Jala nakkok ma timus ni dupa i.+
12 Dung i didok Ibana ma, “Ale anak ni jolma, dang diida ho na diulahon pamimpin ni halak Israel i di inganan na golap? Diida ho do na diulahon nasida di sada ruangan inganan ni nasida mambahen akka patung ni nasida be? Didok nasida do, ‘Dang diida Jahowa hita. Ai nungnga ditadikkon Jahowa be luat on.’”+
13 Didok Ibana ma muse, “Alai idaonmu dope ulahonon ni nasida ulaon na mambahen Au magigi, jala na unjorbut sian on.”
14 Diboan Ibana ma au tu pintu masuk na di gerbang sabola utara, na di jabu ni Jahowa. Disi, huida ma akka borua hundul jala diandungi nasida do Dewa Tamus.
15 Didok Ibana ma muse tu au, “Diida ho do on ale anak ni jolma? Idaonmu dope ulahonon ni nasida ulaon na unjorbut jala na mambahen Au magigi.”+
16 Dung i diboan Ibana ma au tu alaman ni jabu ni Jahowa+ na di bagasan. Diboan ma au tu pintu masuk ni joro ni Jahowa, na di holang-kolang ni terras dohot langgatan. Adong hira-hira 25 bawa na manundali joro ni Jahowa. Jala bohi ni nasida menghadap tu sabola timur. Marsomba do nasida doppak mataniari na di sabola timur.+
17 Dung i didok Ibana ma, “Ale anak ni jolma, nungnga diida ho be na masa i? Nungnga digohi halak Juda hajahaton di luat on. Torus do dibahen nasida haccit rohakku.+ Na hurang dope ulaon ni nasida na mambahen Au magigi i? Dijukjukkon nasida dope hau-hau* ni nasida tu igungku.
18 Alani i, muruk situtu ma Au tu nasida. Dang asi be rohakku mangida nasida.+ Jala dang patuduhonokku burju ni rohakku tu nasida. Nang pe sai gogo nasida mangandungi tu pinggolhu, alai dang tangihonokku nasida.”+
Surat na di toru
^ As. “tangan”.
^ Bahasa Heber ni hata on boi lao mandok tu tondi parbadia manang tu suru-suruan.
^ As. “tu holang-kolang ni langit dohot tano on”.
^ Manang “adong do gambar ni debata na so sittong”.
^ Manang “adong do gambar ni debata na so sittong”.
^ Molo di bahasa Heber istilah on berkaitan tu hata “kotoran” jala on patuduhon na magigi situtu do tu sada ulaon.
^ Hau-hau na nidokna dison, i ma hau-hau na dipakke lao manomba debata na so sittong.
