Jeremia 16:1-21
16 Dung i didok Jahowa ma muse tu au,
2 “Unang pola mangoli ho, unang pola maranak marboru ho di inganan on.
3 Ai songon on do hata ni Jahowa taringot tu bawa dohot borua na tubu di inganan on, dohot taringot tu omak dohot bapak ni nasida sandiri na adong di luat on,
4 ‘Mate ma nasida alani sahit na posi,+ alai dang adong na lao mangandungi nasida jala dang adong na lao makkuburhon nasida. Dos ma nasida songon kotoran na peak di atas ni tano.+ Mate ma nasida alani podang dohot haraparon.+ Jala bakke ni nasida gabe siallangon ni akka pidong na di langit dohot akka binatang buas na di tano on.’
5 Ai songon on do hata ni Jahowa,‘Unang pola masuk ho tu jabu parandung-andungan,Jala unang pola dohot ho tangis manang marlungun ni roha tu nasida.’+
‘Ai dang parookku be dame tu bangso on,’ ninna Jahowa.‘Jala dang patuduhonokku be holong na manoktong* dohot asi ni rohakku tu nasida.+
6 Ikkon mate do sude jolma na di luat on.
Halak na mora manang na sangapDang na lao dikuburhon nasida jala dang adong na mangandungi nasida.Dang adong na maneati dagingna manang na maccukkur obukna sappe botak alani nasida.*
7 Jala dang adong na paradehon sipanganon tu akka halak na mangandungi i,Lao mambahen tarapul roha ni nasida alani hamatean i.Dang adong na mangalehon tu nasida sagalas anggur lao mambahen tarapul roha ni nasida,Ala nungnga mate bapak manang omak ni nasida.
8 Unang masuk ho tu jabu ni halak na marpestaLao minum manang mangan rap dohot nasida.’
9 “Ai songon on do hata ni Jahowa Pamimpin ni Akka Tentara,* Debata ni Israel, ‘Di inganan on, di tikki ni ngolum jala di jolo ni matam, bahenokku ma asa unang tarbege be soara ni na marlas ni roha dohot soara ni na marsonang-sonang, soara ni pengantin bawa dohot soara ni pengantin borua.’+
10 “Tikki dipaboa ho sudena on tu bangso i, sukkunon ni nasida ma ho. Jala dohonon ni nasida ma, ‘Boasa dipaboa Jahowa sude hasusaan na borat on tu hami? Aha do huroa sala dohot dosa na diulahon hami tu Jahowa Debatanami?’+
11 Dokkon ma tu nasida, ‘“Ai nungnga ditadikkon akka ompumuna Au,”+ ninna Jahowa. “Dioloi nasida do akka debata na asing, marhobas do nasida tusi, jala disomba nasida do akka debata i.+ Alai ianggo Au, ditadikkon nasida do jala dang dioloi nasida akka patikku.+
12 Jala hamu pe, unjahat do hamu sian akka ompumuna i.+ Marjugul do hamu lao mangihutton lomo ni rohamuna na jahat i, dang dioloi hamu Au.+
13 Sappattonokku ma hamu sian luat on tu luat na so ditanda hamu jala na so ditanda akka ompumuna.+ Sombaonmuna ma disi akka debata na asing arian nang borngin,+ ai dang asi be rohakku mangida hamu.”’
14 “Didok Jahowa ma, ‘Alai na lao juppang ma tikkina dang dokkonon ni nasida be, “Songon pastina Jahowa mangolu,* Debata na mamboan Israel kaluar sian Mesir!”+
15 Alai dohonon ni nasida ma, “Songon pastina Jahowa mangolu, na mamboan kaluar halak Israel sian luat na di utara dohot sian luat manang didia pe inganannami dibahen Ibana marserak!” Dung i, boanokku ma nasida mulak tu luat ni nasida, tu luat naung hulehon tu akka ompu ni nasida.’+
16 Didok Jahowa ma, ‘Suruokku ma godang akka panjala dekke,Panjala dekke i ma na manakkup nasida.
Dung i suruokku ma godang parburu,Akka parburu i ma na lao mangalului nasida tu sude akka dolokDohot tu sude lubang na di dolok batu.
17 Ai diida matakku do sude pangalaho ni nasida.
Dang boi nasida martabuni sian Au,Dang adong na buni hasalaan ni nasida i sian matakku.
18 Andorang so huboan mulak, ikkon balosokku do sude hasalaan dohot dosa ni nasida i.+Ai nungnga dibahen nasida ramun* luat appunakki marhite akka patung ni nasida na so mangolu jala na huhagigihon i.Digohi nasida do tano appunakki marhite akka ulaon na huhagigihon.’”+
19 Ale Jahowa, Ho do na mangalehon gogo tu au jala Ho do bentengku,Tu Ho do au marlinggom di tikki masa hasusaan.+Tu Ho do ro akka bangso sian akka ujung ni tano on,Jala dohonon ni nasida ma, “Nungnga dijalo akka ompunami akka patung lao gabe warisan ni nasida,Akka na so sittong do sudena i, dang marlapatan, jala dang marguna.”+
20 Tung boi ma dibahen jolma debatana sandiri?Molo tung dibahen ibana pe i, dang debata na sittong i.+
21 “Alani i, ajarokku ma nasida,Di tikki i, patuduokku ma tu nasida huaso dohot gogokku,Sian i botoon ni nasida ma, Jahowa do goarhu.”
Surat na di toru
^ Hasomalan ni halak na so manomba Debata, ra i do na diihutton halak Israel na manimbil.
^ Manang “Sebaot”, lapatanna pamimpin ni akka suru-suruan na di banua ginjang.
^ Sumpa on patuduhon pasti do ikkon saut janji on, songon pastina Debata mangolu.
