Jeremia 31:1-40
31 Didok Jahowa ma, “Di tikki masa i, Au ma na gabe Debata ni sude keluarga ni Israel, jala nasida ma na gabe bangsokku.”+
2 Songon on ma hata ni Jahowa,
“Akka halak na malua sian podang, mandapot asi ni roha sian Debata di gurunDi tikki mardalan halak Israel mangalului inganan paradianan ni nasida.”
3 Sian na dao, dipataridahon Jahowa ma dirina tu au, jala ninna ma,
“Holong na martahan saleleng ni lelengna do holong ni rohakku tu ho.
Jala alani holong* i, toktong do Au setia*+ tu ho jala hutarik do ho tu Au.
4 Padengganokku ma ho muse jala gabe denggan ma ho,+
Ale bangso Israel, buatonmu ma muse rebana*Jala manortori ma ho huhut marlas ni roha.*+
5 Bahenonmuna ma muse akka ladang anggur di akka dolok ni Samaria,+Manang ise na manuan hau anggur i, allangonna ma parbuena.+
6 Na lao ro ma tikkina, marsurak ma akka panjaga na di akka Dolok Epraim, dohonon ni nasida ma,
‘Parade hamu ma dirimuna, beta ma nakkok tu Dolok Sion, tu inganan ni Jahowa Debatanta.’”+
7 Ai songon on do hata ni Jahowa,
“Marsurak ma hamu tu si Jakkob huhut marlas ni roha.
Marsurak ma hamu huhut mardongan las ni roha, ai hamu do na mamimpin akka bangso i.+
Baritahon hamu ma, puji ma Debata, dokkon ma,‘Ale Jahowa, sai palua ma bangsomi, akka halak na mangolu dope sian Israel.’+
8 Boanokku ma nasida mulak sian luat na di utara.+
Papunguokku ma nasida sian inganan na di ujung ni tano on.+
Adong do di tonga-tonga ni nasida halak na buta dohot halak na lumpu,+Borua na hamil dohot na partus, rap do nasida sude.
Mulak ma nasida sude tuson+ songon punguan na massai balga.
9 Ro ma nasida huhut tangis-tangis.+
Di tikki na mangelek-elek i nasida, huboan ma nasida.
Hutogu-togu ma nasida tu sunge,*+Hutogu-togu ma nasida tu dalan na datar asa unang tartuktuk nasida.
Ai Au do Bapak ni halak Israel, jala Epraim ma anak siakkangakku.”+
10 Hamu akka bangso, tangihon hamu ma hata ni Jahowa,Jala paboa hamu ma songon on tu akka pulo na dao,+
“Ibana do na mambahen halak Israel marserak jala Ibana do na lao papunguhon.
Ibana do na lao manjaga nasida songon parmahan na manjaga biru-biruna.+
11 Ai tobusan ni Jahowa nama si Jakkob+Jala paluaonna* ma ibana sian tangan ni akka halak na umgogo sian ibana.+
12 Na lao ro ma nasida, marsurak ma nasida jala marlas ni roha di pussu ni Dolok Sion+Marlas ni roha ma nasida alani burju ni* Jahowa,Alani gandum, anggur,+ miak,Dohot alani akka anak ni hambing, biru-biru, dohot lombu.+
Dos ma nasida songon porlak na toktong adong aekna,+Jala dang na lao hea be nasida marsak.”+
13 “Di tikki i, marlas ni roha ma anak boru manortori,Rap do dohot nasida sude doli-doli dohot na matua.+
Paubaokku ma lungun ni roha ni nasida gabe las ni roha.+
Apulokku ma nasida, lehonokku ma las ni roha gatti ni arsak ni roha ni nasida.+
14 Lehonokku ma massai godang situtu sipanganon* tu akka malim,Jala na lao puas ma bangsokki tu akka na denggan na hulehon tu nasida,”+ ninna Jahowa.
15 “Songon on ma hata ni Jahowa,
‘Tarbege do soara ni na mangangguki dohot soara ni na mangandungi sian Rama,+
Diangguki si Rahel do akka ianakkonna.+
Jala dang olo ibana diapuli,Ai nungnga mate be akka anakkonna i.’”+
16 Songon on do hata ni Jahowa,
“‘Unang be sai tangis ho jala unang be sai tarilu-ilu,Ai na lao jaloonmu nama upa ni halojaonmi,’ ninna Jahowa.
‘Na lao mulak do nasida sian luat ni musu.’+
17 ‘Adong do janji na lao pasautonna di ari na naeng ro,’+ ninna Jahowa.
‘Na lao mulak do akka anakmi tu luat ni nasida sandiri.’”+
18 “Nungnga takkas be hubege andung-andung ni si Epraim na massai lungun i,‘Didok ibana do, dipissang Ho do au jala nungnga dipissang be au,Dos songon anak ni lombu na so hea dilatik.
Boan ma au mulak, ai pittor rade do au mulak,Ai Ho do Debatakku, ale Jahowa.
19 Manolsoli situtu do rohakku jala naeng mulak tu Ho,+ dibahen Ho do au mangattusi sude na masa i,Gabe huattuki ma hae-haekku tanda na lungun rohakku.
Maila jala marlea situtu do huhilala,+Alani sude na huulahon mulai sian na poso.’”
20 “Kan si Epraim do anak hasianku?+ Anak haholongakku do ibana.
Nang pe jotjot Au muruk tu ibana, toktong do huingot ibana.
Alani i do sai tu ibana rohakku.+
Jala asi do rohakku mangida ibana,” ninna Jahowa.+
21 “Pasang ma akka tanda di dalan,Jala bahen ma akka tiang lao patuduhon dalan.+
Parrohahon ma akka dalan i, dalan na ikkon sidalananmu.+
Mulak ma ho ale bangso Israel, mulak ma ho tu kotam.
22 Ale bangso na so setia, sappe andigan ma hamu mardua roha?
Nungnga ditoppa Jahowa na baru di tano on,
Jala marsitutu do sahalak istri mangalului suamina.”*
23 Songon on ma hata ni Jahowa Pamimpin ni Akka Tentara* Debata ni Israel i, “Di tikki hupapungu muse akka halak na binoan ni musu i, dohonon ni nasida ma songon on di luat ni Juda dohot di akka kotana, ‘Ale dolok na badia+ inganan ni halak na mangulahon na sittong,+ sai dipasu-pasu Jahowa ma hamu.’
24 Diingani nama Juda dohot akka kotana. Adong ma disi akka partani dohot akka parmahan na mamiaro akka biru-biruna.+
25 Bahenokku ma margogo halak na loja, jala bahenokku ma butong halak na gale ala male.”+
26 Alani i tarsunggul ma au, hubukka ma matakku, nungnga tabo parpodomhu.
27 Didok Jahowa ma, “Ida ma! Na lao juppang ma tikkina bahenokku ma gok luat ni Israel dohot luat ni Juda. Bahenokku ma godang akka jolma* dohot binatang na dipiaro di luat i.”+
28 “Songon rade ni rohakku najolo lao mangaruppakkon, manghancurhon, manegai, mancabut, jala mambahen nasida marjea,+ songon i ma rade ni rohakku di tikki na naeng ro lao mambahen nasida sonang jala tinggal di luat i,”+ ninna Jahowa.
29 “Di tikki i, dang dohonon ni nasida be, ‘Bapakna do mangallang anggur na asom, alai ngingi ni anakna do na ngilu.’+
30 Alai manang ise na mangallang anggur na asom, ngingina sandiri ma na ngilu. Jala ganup ma jolma mate alani dosana sandiri.”
31 Didok Jahowa ma, “Ida ma, na ro ma tikkina, bahenokku ma parjanjian na imbaru+ tu halak Israel dohot tu halak Juda.
32 Parjanjian na imbaru na hubahen i, dang songon parjanjian na hubahen tu ompu ni nasida, di ari tikki hutogu nasida kaluar sian Mesir.+ ‘Dilanggar nasida do parjanjiakki,+ nang pe sasittongna Au do Tuan* ni nasida,’ ninna Jahowa.”
33 “On ma parjanjian na lao bahenokku tu bangso Israel dukkon na masa i,” ninna Jahowa. “Bahenokku ma akka patikku di bagasan diri ni nasida+ jala surattonokku ma i di roha ni nasida.+ Au ma na gabe Debata ni nasida jala nasida ma na gabe bangsokku.”+
34 “Dang porlu be ajaran ni nasida donganna sabangso dohot haha anggina lao mananda Jahowa.+ Ai sude nama nasida mananda Au, mulai sian akka na poso sahat tu na matua,”+ ninna Jahowa. “Dang ingotokku be akka dosa ni nasida jala sesaokku ma hasalaan ni nasida.”+
35 Jahowa na mangalehon mataniari na mambahen tiur di tikki arian,Na manottuhon hukum* ni bulan dohot akka bintang na mambahen tiur di tikki borngin,Na mambahen guccang laut jala na mambahen gogo soara ni ombakna,Pamimpin ni Akka Tentara na margoar Jahowa,+ mandok songon on,
36 “‘Songon hukum alam na toktong adong saleleng ni lelengna,’ ninna Jahowa,‘Songon i do pinoppar ni halak Israel i, toktong do i adong di jolokku gabe sada bangso.’”+
37 Songon on ma hata ni Jahowa, “‘Dos songon langit na so boi diukkur dohot fondasi ni tano on na so boi didalani, Au pe dang jalookku sude pinoppar ni halak Israel i tung manang aha pe na diulahon nasida,’ ninna Jahowa.”+
38 Didok Jahowa ma, “Ida ma! Na lao ro ma tikkina na lao dibangun do muse kota i+ di Jahowa mulai sian Menara Hananel+ sahat tu Gerbang Sudut.+
39 Paganjang ma tali pangukkur+ tu Dolok Gareb, dung i marbelok ma tu Goa.
40 Sude rura inganan mambolokkon bakke dohot abu,* gabe badia di Jahowa.+ Songon i ma nang sude ladang na adong sahat tu Rura Kidron+ dohot sahat tu sudut ni Gerbang Hoda+ na di sabola timur. Dang na lao hea be i disegai jala dang na lao hea be i dihancurhon.”
Surat na di toru
^ Manang “toktong do hupatudu holong na manoktong”.
^ Manang “manortori ma ho rap dohot halak na mekkel”.
^ Manang “ditobus”.
^ Manang “alani akka na denggan sian”.
^ As. “tabo-tabo”.
^ As. “sahalak borua mangalului sahalak bawa”.
^ Manang “Sebaot”, lapatanna pamimpin ni akka suru-suruan na di banua ginjang.
^ Manang “godang pinoppar ni nasida”.
^ Manang boi do “suami”.
^ Manang “aturan”.
^ Manang “sirabun na marmiak”, i ma sirabun na marcampur dohot tabo-tabo ni binatang na dipelehon.
