Jesaya 18:1-7
-
Barita panguhuman tu Etiopia (1-7)
18 Marjea ma luat na gok soara ni serangga na marhabong*Di luat na jonok tu akka sunge di Etiopia!+
2 Disuru luat i do akka utusan marhite laut,Markapal na sian hau papirus do nasida, didok do,
“Hamu akka utusan na hatop, borhat ma hamu,Tu bangso na timbo halakna jala na mulus kulitna,*Tu bangso na dihabiari manang na didia pe,+Na gogo jala na manaluhon bangso na asing,*Tu luat na maup dibahen akka sunge.”
3 Hamu sude penduduk ni tano on jala na maringanan di akka luat,Idaonmuna ma adong na songon sada tanda* diangkat di atas ni akka dolok,Jala begeonmuna ma sada soara na songon soara ni tarompet na sian tanduk.
4 Songon on do didok Jahowa tu au,
“Toktong do au tenang jala manatap* inganakku na manoktong i,Songon las ni ari na massai mohop,Jala songon ombun di musim panen na mohop.
5 Ai andorang so musim panen,Di tikki marbunga anggur i jala malamun parbuena,Diponggoli ma akka tunasna mamakke sasabi,Jala diponggoli ma akka dakkana, dung i dibolokkon.
6 Ditadikkon ma sudena i lao di akka lali siallang bakkeDohot di akka binatang buas na di tano on.
Saleleng musim panas, disi do akka lali siallang bakke,Jala disi do akka binatang buas na di tano on saleleng musim panen.
7 Di tikki i dilehon ma silehon-lehon tu Jahowa Pamimpin ni Akka Tentara,*Sian bangso na timbo halakna jala na mulus kulitna,*Sian bangso na dihabiari manang na didia pe,Na gogo jala na manaluhon bangso na asing,*Sian luat na maup dibahen akka sunge,Tu Dolok Sion,+ tu inganan na dipillit Jahowa Pamimpin ni Akka Tentara lao pasangappon goarna.”
Surat na di toru
^ Manang “soara ni serangga na mamaspas habongna”.
^ Manang “na ganjang jala na marhillong kulitna”.
^ Manang “Bangso na gogo na mandege-dege”.
^ Manang “tiang na gabe tanda”.
^ Manang boi do “manatap sian”.
^ Manang “Sebaot”, lapatanna pamimpin ni akka suru-suruan na di banua ginjang.
^ Manang “na ganjang jala na marhillong kulitna”.
^ Manang “Bangso na gogo na mandege-dege”.
