Jesaya 5:1-30
5 Marende ma au tu Ibana na huhaholongi,Ende taringot tu Ibana dohot ladang anggurna.+
Adong do ladang anggur ni halak na huhaholongi i di dolok na subur.
2 Diombak Ibana do tanona i jala dibolokkon akka batuna.
Disuan Ibana ma disi anggur merah na dumenggan,Dipajongjong Ibana do menara di tonga-tonga ni ladang i,Jala digali Ibana do inganan pamoroan ni anggurna.+
Dipaima Ibana do torus andigan marparbue anggurna i,Hape anggur na roa do na tubu.+
3 “Saonari hamu ale penduduk ni Jerusalem dohot hamu halak Juda,Adili hamu ma Au dohot ladang anggurhi.+
4 Aha dope na ikkon huulahon tu ladang anggurhi?Adong dope na hurang?+
Anggur na denggan do na hupaima,Alai boasa anggur na roa na tubu?
5 Saonari, hupaboa ma tu hamuAha na lao bahenokku tu ladang anggurhi:
Ruppakkonokku nama pagarnaJala tutungokku nama i sappe habis.+
Ruppakkonokku ma tembokna,Jala pasombuonku nama i didegei.
6 Bahenokku nama i tarulang,+Dang dipangkas manang dang diombak be i.
Martubuan ma akka ramba dohot hau na marsuga disi,+Jala hudok ma tu akka ombun asa unang diparo udan tusi.+
7 Ai halak Israel do ladang anggur ni Jahowa Pamimpin ni Akka Tentara* i,+Halak Juda ma ladang* haholonganna.
Sai tarpaima do Ibana asa adil nasida mangadili,+Alai dang diihutton nasida patik i.Sai tarpaima do Ibana asa diulahon nasida na sittong,Alai sai dibege Ibana dope mangandungi halak na susa.”+
8 Marjea ma hamu akka halak na mambuat godang jabu+Dohot na mambuat akka ladang+Sappe dang adong be inganan ni halak na asingJala holan hamu ma na tinggal di luat i!
9 Hubege ma marsumpa Jahowa Pamimpin ni Akka Tentara,Didok Ibana do, nang pe godang jabu na balga jala na bagak,Alai dang adong na mangingani i,+Jala mabiar do halak mangida i.
10 Ladang anggur na opat hektar* pe, holan sada bat* do hasilna,Jala boni na sada homer* pe holan sada epa* do hasilna.+
11 Marjea ma halak na tibu dungo manogot lao manginum siinumon na maralkohol,+Marjea ma halak na hundul-hundul sappe tonga borngin sahat tu na mabuk nasida!
12 Adong do harpa dohot alat musik ni nasida na martali,Rebana,* suling, dohot anggur di akka pesta ni nasida.Alai dang diparrohahon nasida na binahen ni Jahowa,Jala dang diida nasida ulaon ni tanganna.
13 Alani i, diboan ma bangsokki tu inganan ni musu,Ai hurang do parbinotoan ni nasida.+Haraparon+ ma akka na sangap ni nasida,Jala mauas ma sude rakyat ni nasida.
14 Lam bidang ma dibukka Kuburan* i babanaDibukka ibana ma i sabidang ni bidangna,+Jala turun ma tu bagasan iHasangapon* ni Jerusalem, rap dohot akka halak na gaor, dohot halak na marpesta pora.
15 Marsomba ma sude jolma,Dipatutoru ma dirina,Jala akka siginjang roha pe dipatutoru do.
16 Dipasangap ma Jahowa Pamimpin ni Akka Tentara alani hatigoranna,Debata na sittong jala Nabadia i+ patuduhon na badia Ibana marhite hasittonganna.+
17 Songon na manjappal di ladang ni nasida sandiri ma akka anak ni biru-biru disi,Mangan ma akka halak na sian bangso na asing di inganan na tarulang na diingani binatang na mokmok.
18 Marjea ma akka pargabus,Dang tarpalua be dosa dohot hasalaan sian nasida, dos songon binatang naung ditali tu padati.
19 Akka na mandok, “Lok ma hatop dibahen Ibana ulaonna i,Jala lok ma hatop i masa asa boi diida hami.
Lok ma saut lomo ni roha* ni Debata Nabadia ni Israel iAsa diboto hami na masa i!”+
20 Marjea ma halak na mandok na denggan i jahat, jala na jahat i denggan,+Na mandok na golap i tiur, jala na tiur i golap,Na mandok na paet i manis jala na manis i paet!
21 Marjea ma halak na mandok dirina marbisuk,Jala na mandok dirina pistar!+
22 Marjea ma halak na jago minum anggurJala na malo mancampur akka siinumon na maralkohol,+
23 Na mandok halak na jahat dang marsala alani suap,+Jala na mandok halak na sittong marsala!+
24 Songon durame na ditutung api sappe habis,Dohot ramba na koring na ditutung api,Busuk ma akka urat ni nasida,Jala marserak ma akka bungana songon orbuk,Ai dang dijalo nasida patik* ni Jahowa Pamimpin ni Akka TentaraJala dang diargai nasida hata ni Debata Nabadia ni Israel i.+
25 Alani i ma marsigorgor muruk ni Jahowa tu bangsona,Diangkat Ibana ma tanganna lao manghukum nasida.+
Humutur ma akka dolok,Marragean ma bakke ni nasida songon sampah di akka dalan.+
Alani i ma toktong muruk Ibana,Toktong do diangkat Ibana tanganna lao manghukum nasida.
26 Diangkat Ibana do tanda* tu sada bangso na dao,+Marsiul do Ibana manjou nasida asa ro sian ujung ni tano on,+Jala ida ma! Tibu do nasida ro.+
27 Dang adong sian nasida na loja manang tartuktuk.
Dang adong na mondok-ondok manang na tarpodom.
Dang longgar ikat pinggang ni nasida,Jala dang putus tali ni solop ni nasida.
28 Tajom do sude panah ni nasida,Jala rade do panahna lao manembak.
Kuku ni hoda ni nasida karas songon batu api,Jala roda ni kareta nasida songon halisuksung.+
29 Marauang do nasida songon singa,Marauang do nasida songon singa na gogo.+
Marauang do nasida jala ditakkup do mangsana,Diboan do i jala dang adong na boi paluahon i sian nasida.
30 Marauang ma nasida tusiSongon soara ni galumbang ni laut na gogo.+
Molo diida doppak luat i, idaonna ma haholomon dohot hasusaan,Jala akka langit pe golap do alani akka ombun.+
Surat na di toru
^ Manang “suan-suanan”.
^ Manang “Sebaot”, lapatanna pamimpin ni akka suru-suruan na di banua ginjang.
^ Ida Lampiran B14.
^ As. “sappulu pasang”. Na nidokna dison i ma ladang na boi dibajak sappulu pasang lombu di bagasan sadari.
^ Ida Lampiran B14.
^ Ida Lampiran B14.
^ Manang “Hamuliaon”.
^ Manang “keputusan; sakkap”.
^ Manang “tudu-tudu”.
^ Manang “tiang na gabe tanda”.
