Job 31:1-40
31 “Nungnga hubahen parjanjian tu matakku,+
Na so jadi hupanotnoti anak boru+ huhut marsakkap na so denggan.
2 Ai molo hubahen songon i, aha ma lehonon ni Debata na di surgo i tu au,Aha ma na dapottu sian Pargogo na So Hatudosan i?
3 Ai na lao marjea do halak na mangulahon na jahatJala na lao susa do halak na kejam.+
4 Diida Ibana do dalanku+Jala diparrohahon Ibana do sude lakkakku.
5 Hea haroa au margabus?*
Hea haroa huoto-otoi halak?+
6 Ditimbang Debata ma nian au di timbangan na pas,+Asa diboto Ibana na setia do au tu Ibana.+
7 Molo manirpang au sian dalan na sittong+Molo dipaihut-ihut rohakku sude na niida ni matakku+Manang molo adong huulahon na jahat,
8 Sai halak ma na mangallang na husuan,+Jala lok ma dicabut akka na husuan.
9 Molo targoda au tu sahalak borua+Jala tubu di rohakku+ naeng mambuat istri ni halak,
10 Lok ma manggiling gandum istrikku tu bawa na asing,Jala lok ma mangulahon seks bawa na asing dohot ibana.+
11 Ai pailahon do i,Jala patut do dihukum halak na mangulahon songon i.+
12 Dos do i songon api na manutung jala na pasudahon,+Tartutung do bahenon ni i sude na adong di au.
13 Molo hea hubahen na so tigor tu hatobanku bawa manang boruaTikki marungut-ungut nasida alani au,
14 Aha ma bahenokku molo dialo Debata au?*
Aha ma dohonokku molo diadili Ibana au?+
15 Ai Debata do na manoppa au, laos Ibana do na manoppa nasida.+
Sarupa do Debata na mambahen hami tikki di bortian* ni omaknami.+
16 Molo hea dang hulehon pangidoan ni na pogos+Manang hea hubahen marlungun ni roha* ina na mabalu,+
17 Molo hea holan sahalakku mangallang sipanganonJala dang hubagi i tu halak na so marama na so marina,+
18 (Ai mulai sian haposookku, au do na pagodang-godang halak na so marama na so marina i, jala hira bapakna ma au,Jala au do na mangurupi ina na mabalu i mulai sian dakdanak* au.)
19 Molo hea hupasombu halak mate ngalian ala so adong bajunaManang hupasombu na pogos dang marpakkean,+
20 Molo hea dang hulehon baju wol tu nasidaAsa las daging ni nasida jala dipasu-pasu nasida au,+
21 Molo hea huancam halak na so marama na so marina+Tikki ro ibana tu gerbang ni kota+ mangido asa huurupi,*
22 Sai malua ma tanganku sian pundakku,Jala sai ponggol ma tanganku mulai sian siku ni tangankon.
23 Ai mabiar do au marjea dibahen Debata,Jala dang tolap au jongjong mangida hasangaponna.
24 Molo mas do na huanggarhonJala hudok tu mas murni, ‘Ho do na hupangasahon!’+
25 Molo hea gabe ginjang rohakku ala mamora au+Ai godang do hupapungu artakku,+
26 Molo huida marsinondang mataniariManang huida bulan na tung massai uli,+
27 Jala dipaoto-oto rohakku ma au,Dung i husomba ma akka i,*+
28 Patut do au dihukum ala mangulahon songon i,Ai nungnga husoadahon Debata na sittong na di surgo i.
29 Hea haroa las rohakku tikki susa musukku+Manang las rohakku ala ro jea tu ibana?
30 Dang hea huburai ibana jala hutangiakkon asa mate+Dang hea hupasombu mardosa babakku.
31 Didok akka halak na tinggal di jabukku do,‘Butong do sude halak na dilehon si Job mangan.’+
32 Dang hupasombu halak na asing marborngin di luar,+Jala huloas do masuk akka panoppang tu jabukku.
33 Hea haroa hutabunihon dosakku songon na binahen ni na asing,+Hea haroa hutabunihon salakku di sakku ni bajukku?
34 Hea haroa mabiar au tu jolma natorop,Hea haroa gabe mabiar au ala dipaila halak?Manang hea haroa holan na sip au jala dang kaluar sian jabukku ala mabiar?
35 Autsugari ma adong na olo manangihon au!+
Marsumpa ma au na tutu do na hudok i.
Autsugari ma dialusi Pargogo na So Hatudosan i au!+
Pangidookku ma tu Ibana* asa disurat hata na so tutu taringot au di harotas.
36 Bahenokku ma i tu pundakku,Jala hulilitton ma i di ulukku songon mahkota.
37 Paboaokku ma sude lakkakku tu Ibana,Jala pos ma rohakku mandapotton Ibana songon sahalak pejabat.
38 Molo morong-orong tanokku alani auJala dohot tangis tano na dibajak,
39 Molo huallang hasil ni tano i hape dang hugarar,+Jala marsak hubahen nappunasa tano,+
40 Sai tubu ma suga-suga gatti ni gandumJala tubu ma ramba-ramba na bau gatti ni barli.”*
On ma ujung ni hata ni si Job.
Surat na di toru
^ Manang boi do “mardalan rap dohot halak na so jujur”.
^ As. “molo jongjong Debata”.
^ Manang “rahim”.
^ As. “hubahen dang marnida be”.
^ As. “mulai sian na di bortian ni omakku”.
^ Manang boi do “Tikki huida adong na mangurupi au di gerbang ni kota”.
^ As. “huumma ma tanganku”, na nidokna dison lao manomba akka i.
^ Manang “tu na manudu au”.
^ Suan-suanan na songon eme.
