Josua 2:1-24
2 Tikki di Sitim,+ disuru si Josua anak ni si Nun i ma sipsip dua bawa gabe mata-mata. Didok ma tu nasida, “Lao ma hamu mamareso kota i, tarlumobi kota Jeriko.” Dung i lao ma nasida jala marborngin di jabu ni si Rahab+ sahalak boru-boru na so hasea.
2 Adong ma na mandok tu Raja ni Jeriko, “Nungnga ro mata-mata ni Israel borngin on lao mamareso kota on.”
3 Dung i disuru Raja ni Jeriko ma asa didok tu si Rahab, “Suru ma kaluar bawa na marborngin di jabumi. Ai mata-mata do nasida na lao mamareso kota on.”
4 Hape nungnga ditabunihon si Rahab dua mata-mata i. Didok ibana ma, “Tutu, adong do bawa na ro tuson. Dang huboto sian dia nasida ro.
5 Alai dung golap ari, tikki naeng ditutup gerbang ni kota, nungnga lao nasida. Dang huboto tudia nasida lao. Molo hatop dilumba hamu nasida, boi do ra takkuponmuna nasida.”
6 (Sasittongna, nungnga ditabunihon si Rahab nasida di toru ni akka batang ni rami* na pungu di atap ni jabuna.)
7 Dung i dilumba nasida ma mata-mata i. Lao ma nasida tu inganan na somal lao menyeberang+ sian Sunge Jordan. Dung kaluar nasida, ditutup ma gerbang ni kota i.
8 Andorang so modom mata-mata i, nakkok ma si Rahab manjuppangi nasida tu atap ni jabuna.
9 Didok si Rahab ma tu nasida, “Huboto do naeng lehonon ni Jahowa kota on tu hamu.+ Mabiar do hami tu hamu,+ jala dang adong akka halak di huta on na barani mangalo hamu.+
10 Ai nungnga hubege hami na dipakoring Jahowa Laut Merah di jolomuna tikki kaluar hamu sian Mesir.+ Jala nungnga hubege hami naung dipamate hamu si Sihon+ dohot si Og,+ raja ni halak Amori na di sabola timur ni Sunge Jordan.
11 Mabiar do hami* mambege i, jala dang adong hami na barani mangalo hamu. Ai Jahowa Debatamuna i, Ibana do Debata ni langit dohot tano on.+
12 Saonari marsumpa ma hamu di jolo ni Jahowa, patudu hamu ma holong ni rohamuna* tu keluarga ni bapakku. Ai nungnga hupatuduhon holong ni rohakku* tu hamu. Jala lehon hamu ma jaminan* tu au patudu na lao diulahon hamu janjimuna i.
13 Unang ma pamate omakku, bapakku, itokku, kakakku, adekku, dohot sude keluarga ni nasida. Palua ma hami sude.”+
14 Dialusi dua mata-mata i ma, “Hosanami on ma gabe jaminanna! Molo dang dipaboa hamu taringot hami, huulahon hami pe janjinami i. Dipatudu hami pe holong ni rohanami* tu hamu tikki dilehon Jahowa kota on tu hami.”
15 Dung i dipaturun si Rahab ma nasida sian jandela ni jabuna mamakke tali. Ai di ginjang ni tembok ni kota do jabuna.+
16 Didok ma tu nasida, “Lao ma hamu tu dolok jala disi ma hamu martabuni saleleng tolu ari, asa unang dapot ni nasida hamu. Alai molo dung mulak nasida, lao ma hamu.”
17 Didok dua mata-mata i ma, “Sai ingotonnami do janji*+ naung hubahen hami tu ho.
18 Alai molo ro hami tu kota on, ikkat ma tali na merah i tu jandela dalannami turun. Jala marpungu ma hamu sude di jabu on, bapakmu, omakmu, itomu, dohot sude keluarga ni bapakmu.+
19 Molo adong halak na kaluar sian jabumon, dang martanggung jawab hami tu ibana molo mate ibana. Ai salana sandiri do i. Alai molo adong manang na mahua na rap dohot ho di jabu on, tanggung jawabnami ma i.
20 Jala molo dipaboa ho taringot hami tu halak na asing,+ dang saut janjinami* i.”
21 Didok si Rahab ma, “Huulahon pe sude hatamuna i.”
Dipaloas ibana ma nasida lao jala diikkat ibana ma tali na merah i tu jandela.
22 Dung i lao ma dua mata-mata i tu dolok, jala disi ma nasida saleleng tolu ari sahat tu na mulak halak na sinuru ni Raja i. Sai dilului halak na sinuru ni Raja i ma nasida di sude inganan, alai dang dapotna.
23 Dung i turun ma akka bawa i sian dolok. Menyeberang ma nasida sian Sunge Jordan lao mandapotton si Josua anak ni si Nun. Jala dipaboa nasida ma sude na masa i tu si Josua.
24 Didok nasida ma tu si Josua, “Nungnga dipasahat Jahowa kota i tu hita.+ Ai dang adong halak na di huta i na barani mangalo hita.”+
Surat na di toru
^ Suan-suanan na tubu di Mesir, na dipakke lao mambahen abit linen.
^ As. “Malala do ate-atenami”.
^ Manang “tanda”.
^ Manang “sumpa”.
^ Manang “sumpanami”.
