Josua 6:1-27
6 Alani halak Israel, gabe ditutup ma pintu gerbang ni kota Jeriko. Dang adong na boi kaluar jala dang adong na boi masuk.+
2 Dung i didok Jahowa ma tu si Josua, “Ida ma! Nungnga hupasahat tu ho kota Jeriko i, rajana, dohot akka tentarana na gogo.+
3 Suru ma marbaris akka tentaram makkalilingi kota i sahali sadari. Ulahon ma songon i saleleng onom ari.
4 Suru ma mardalan pitu malim na mamboan pitu tarompet* di jolo ni poti parpadanan. Alai di ari papituhon, kalilingi hamu ma pitu hali kota i jala ikkon martarompet+ do akka malim.
5 Molo dibege hamu soara ni tarompet i ganjang songon sada tanda, ikkon marsurak ma sude akka tentaram lao mandok marporang. Dung i ruppak ma tembok ni kota i+ jala suru ma masuk sude tentaram tu kota i.”
6 Dung i dijou si Josua anak ni si Nun i ma akka malim. Didok ma tu nasida, “Boan hamu ma poti parpadanan i. Jala ikkon mardalan do pitu malim na mamboan pitu tarompet di jolo ni poti parpadanan ni Jahowa.”+
7 Didok si Josua ma muse tu akka tentarana, “Marbaris ma hamu makkalilingi kota i. Jala ikkon mardalan ma pasukan tentara na marsinjata+ di jolo ni poti parpadanan ni Jahowa.”
8 Songon hata ni si Josua tu akka tentara i, mardalan ma pitu malim na mamboan pitu tarompet di jolo ni Jahowa. Mardalan ma nasida huhut martarompet. Jala di pudi ni nasida mardalan do akka malim na mamboan poti parpadanan ni Jahowa.
9 Di jolo ni akka malim na martarompet, mardalan do pasukan tentara na marsinjata. Jala mardalan do muse pasukan na asing di pudi ni akka malim na mamboan poti parpadanan i. Tikki na mardalan i nasida, sai martarompet do akka malim i.
10 Nungnga didok si Josua hian tu akka tentarana, “Unang ma marsurak hamu manang marsoara. Alai molo nungnga husuru hamu marsurak, marsurak ma hamu.”
11 Disuru si Josua ma asa diboan poti parpadanan ni Jahowa i makkalilingi kota i sahali. Dukkon i, mulak ma nasida tu perkemahan jala disi ma nasida marborngin.
12 Marsogotna i, hatop ma si Josua dungo, jala disuru ibana ma akka malim mamboan poti parpadanan ni Jahowa.+
13 Di jolo ni poti parpadanan ni Jahowa, mardalan do pitu malim na martarompet. Di jolo ni nasida, mardalan do pasukan tentara na marsinjata, jala mardalan do muse pasukan na asing di pudi ni akka malim na mamboan poti parpadanan ni Jahowa. Tikki na mardalan i nasida, sai martarompet do akka malim i.
14 Di ari paduahon, marbaris do nasida makkalilingi kota i sahali. Dukkon i, mulak ma nasida tu perkemahan. Songon i ma diulahon nasida saleleng onom ari.+
15 Hatop ma nasida dungo di ari na papituhon. Disi torang ari, marbaris ma nasida makkalilingi kota i songon na somal diulahon nasida. Alai holan di ari i do nasida makkalilingi kota i pitu hali.+
16 Tikki dikalilingi nasida kota i papituhalihon, martarompet ma akka malim. Jala didok si Josua ma tu akka tentara i, “Marsurak ma hamu.+ Ai nungnga dilehon Jahowa kota i tu hamu!
17 Ikkon ditutung do kota i dohot sude na adong di bagasanna.+ Appuna ni Jahowa do i sude. Holan si Rahab,+ boru-boru na so hasea i do na boi mangolu, rap dohot sude na adong di bagasan jabuna. Ai nungnga ditabunihon ibana mata-mata na tasuru i.+
18 Padao ma dirimuna sian akka na lao ditutung i,+ asa unang tubu di rohamuna lao mambuat i.+ Ai molo dibuat hamu i, parohon jea*+ do i tu perkemahan ni halak Israel jala parohon hamatean tu nasida.
19 Alai badia do di Jahowa sude perak, mas, dohot akka barang na sian tombaga dohot bosi.+ Ikkon dibahen do i tu inganan panimpanan ni arta ni Jahowa.”+
20 Tikki tarbege soara ni tarompet,+ marsurak ma akka tentara i lao mandok marporang. Dung i ruppak ma tembok ni kota i.+ Masuk ma akka tentara i jala ditaluhon nasida ma kota i.
21 Dipamate ma sude na adong di kota i, bawa, borua, na matua, na poso, lombu, biru-biru, dohot halode. Dibunu do nasida mamakke podang.+
22 Dung i didok si Josua ma tu dua bawa na hea gabe mata-mata i, “Lao ma hamu tu jabu ni boru-boru na so hasea i. Boan ma ibana kaluar dohot sude na adong di jabuna, songon janjimuna* tu ibana.”+
23 Dung i lao ma dua mata-mata i. Diboan nasida ma kaluar si Rahab, bapakna, omakna, itona, dohot sude na adong di bagasan jabuna.+ Diboan ma nasida sude tu inganan na aman di luar ni perkemahan ni halak Israel.
24 Dung i ditutung nasida ma kota i dohot sude na adong di bagasanna. Alai diboan nasida ma perak, mas, dohot akka barang na sian tombaga dohot bosi tu inganan panimpanan ni arta na adong di tabernakel* ni Jahowa.+
25 Alai dang dipamate si Josua si Rahab boru-boru na so hasea i, keluarga ni bapakna, dohot sude na adong di bagasan jabuna.+ Rap tinggal do si Rahab dohot halak Israel sahat tu sadari on.+ Ai nungnga ditabunihon ibana mata-mata na sinuru ni si Josua.+
26 Marsumpa ma si Josua* di tikki i, “Manang ise na naeng pajongjokkon kota Jeriko on muse, hona bura ma ibana di jolo ni Jahowa. Molo dibahen ibana fondasi ni kota on, mate ma anakna siakkangan. Jala molo dibahen ibana akka pintu gerbang ni kota on, mate ma anak siappudanna.”+
27 Sai didongani Jahowa do si Josua+ jala tarbarita do goarna di saluhut tano on.+
Surat na di toru
^ As. “tarompet na sian tanduk ni biru-biru jantan”.
^ Manang “hasusaan”.
^ Manang “sumpamuna”.
^ As. “jabu”.
^ Manang boi do “Disuru si Josua ma akka halak marsumpa”.
