PARSIAJARAN 5
Si Samuel Mangulahon Angka na Denggan
Tingki dakdanak dope si Samuel, di tabernakel do ibana maringanan jala pangula disi. Tabernakel, i ma inganan laho manomba Jahowa. Diboto hamu do boasa si Samuel maringanan di tabernakel? Parjolo, taparsiajari ma taringot omak ni si Samuel, i ma si Hanna.
Ndang boi si Hanna marianakhon. Jadi, martangiang ma ibana tu Jahowa. Marjanji do ibana molo adong ianakhonna, dilehon ma anakna i tading di tabernakel jala pangula disi. Dialusi Jahowa do tangiangna i, jala adong ma anakna. Digoari ma anakna i, si Samuel. Diingot jala digohi si Hanna do janjina i. Tingki marumur hirahira tolu manang na opat taon si Samuel, diboan si Hanna ma ibana tu tabernakel asa marhobas tu Jahowa.
Tingki i, si Eli ma gabe sintua ni malim di tabernakel. Dua sian ianakhonna pangula disi. Ingot ma, tabernakel i inganan laho manomba Jahowa. Tontu molo disi, ingkon marparange na burju do. Alai, ianakhon ni si Eli mangulahon na jahat disi. Diida si Samuel do sude pambahenan ni nasida i. Dohot do si Samuel mangulahon na so denggan?— Ndang. Sai na denggan do na diulahon ibana, songon na diajarhon natorasna.
Molo pandapotmu, aha do na ingkon bahenon ni si Eli tu ianakhonna i?— Ingkon diuhum jala dipakaluar si Eli do nian nasida sian tabernakel. Alai, ndang olo si Eli mangulahon i. Gabe diuhum Jahowa ma si Eli dohot ianakhonna i.
Dipasahat si Samuel do hata ni Jahowa tu si Eli
Tingki modom si Samuel, dibege ibana ma adong na manjou ibana: Samuel! Marlojong ma ibana manjumpangi si Eli, alai si Eli mandok: Ndang adong hujou ho. Sampe tolu hali ma si Samuel dijou. Di na patoluhalihon, didok si Eli ma tu si Samuel molo dijou ho muse, ingkon dohononmu ma: Dok ma hataM, ale Jahowa; hutangihon pe. Diulahon si Samuel ma songon na nidokna i. Dung i, didok Jahowa ma tu si Samuel: Paboa ma tu si Eli, uhumonku ma ibana dohot keluargana ala nasida mangulahon na so denggan. Molo pandapotmu, mura do si Samuel pasahathon hata i tu si Eli?— Ndang. Mabiar do si Samuel pasahathon i. Alai nang pe songon i, diulahon ibana do aha na disuru Jahowa i. Jala songon na nidok ni Jahowa, mate ma tutu si Eli dohot ianakhonna.
Sitiruon na denggan do si Samuel on di hita. Diulahon ibana do na denggan nang pe angka donganna mangulahon na so denggan. Molo hamu, songon dia? Olo do hamu maniru si Samuel, mangulahon angka na denggan? Molo ditiru hamu ibana, boi ma hamu palashon roha ni Jahowa dohot natorasmuna.
