Musu ni Debata na umbalga i ma Sibolis. Ibana surusuruan na mangalo tu Jahowa. Sibolis tongtong do mangalo tu Debata jala na manghorhon angka hasusaan tu jolma. Sibolis i mansai jahat. Ibana pargabus jala pamunu.—Johannes 8:44.

Surusuruan na asing marsada dohot Sibolis laho mangalo Debata. Bibel mandok nasida angka surusuruan ni Sibolis. Songon Sibolis, surusuruanna on musu ni angka jolma. Lomo do roha ni nasida manusai angka jolma. (Mateus 9:32, 33; 12:22) Ripashonon ni Jahowa do Sibolis dohot surusuruanna salelenglelengna. Otik nama tingki ni nasida pasusahon angka jolma.—Pangungkapon 12:12.

Molo hamu naeng gabe aleale ni Debata, hamu ndang boi mangulahon aha lomo ni roha ni Sibolis. Sogo do roha ni Sibolis dohot surusuruanna tu Jahowa. Nasida musu ni Debata, jala lomo do rohana mambahen hamu gabe dohot musu ni Debata. Ingkon pillitonmu, ise do sipasonangonmu—Sibolis manang Jahowa. Molo naeng mandapot hangoluan salelenglelengna, ingkon pillitonmu do laho mangulahon aha na hombar tu lomo ni roha ni Debata. Godang do jorat ni Sibolis laho paotootohon jolma. Godang do naung diotootoi Ibana.—Pangungkapon 12:9.