1, 2. Aha do na jotjot disungkun torop halak?

JOTJOT dakdanak godang sungkunsungkunna. Molo adong na tahatahon tu nasida, olo do gabe sungkunonna ”boasa songon i”? Nang pe naung taalusi, sai sungkunonna do muse, ”boasa”?

² Ise pe hita, na poso, na matua jotjot do manungkun. Manungkun dalan molo ndang taboto. Sungkunsungkun do rohanta taringot hangoluan on dohot na masa tu ari na naeng ro. Alai, olo do ra maol mangalului alus ni sungkunsungkun i, gabe ndang olo be hita mangalului alusna.

3. Boasa godang halak maol mandapot alus ni sungkunsungkunna?

³ Molo adong sungkunsungkunta, adong do alusna di Bibel? Adong, alai adong mandok maol antusan. Na asing mandok, holan guru agama do manang pandita na boi mangalusi sungkunsungkun sisongon i. Adong na maila ala ndang diboto nasida alusna. Molo hamu?

4, 5. Aha do sungkunsungkun na ringkot botoonta? Jala boasa ingkon talului alusna?

⁴ Lomo do rohamu mandapot alus ni sungkunsungkun songon: Aha do na tinuju ni ngolu on? Aha do na masa tu sasahalak molo mate? Songon dia do hadirion ni Debata? Jesus mandok, ”Pangido hamu ma, sai na lehononna do tu hamu; lului hamu ma, sai na jumpangan do hamu; tuktuhi hamu ma, sai na ungkaponna do di hamu!” (Mateus 7:7) Unang pintor mandele molo so dapotmuna dope alusna.

 ⁵ Dapot ma alusna molo talului di Bibel. (Poda 2:1-5) Alus ni sungkunsungkun on ndang maol antusan. Alus na sian Bibel, boi mambahen dame rohamu jala marpangkirimon tu ari na naeng ro. Taida ma sada alus ni sungkunsungkun na jotjot disungkun halak.

6. Boasa adong halak na mandok ndang disarihon Debata hita?

⁶ Godang taida hasusaan na masa saonari on songon porang, sahit dohot hamatean. I do alana, godang halak mandok ndang disarihon Debata hita. Molo disarihon Debata do hita, ndang pasombuonNa masa sude hasusaan on.

7. (a) Boasa didok halak pangunjunan i sian Debata? (b) Boasa boi pos rohanta molo Debata ndang hea mangunjuni?

⁷ Tingki manaon hasusaan, jotjot do didok pemimpin agama pangunjunan i sian Debata. On mambahen godang halak porsea molo Debata do na mangunjuni jolma. Alai, Bibel mangajarhon ndang hea diunjuni Debata jolma. Jakobus 1:13 mandok, ”Unang ma didok manang ise jumpa tarunjun ibana: Na tarunjun do ahu sian Debata! Ai ndang masa di Debata pangunjunan tu hajahaton, ndang diunjuni Ibana manang ise.” Lapatan ni ayat on, nang pe dipasombu Debata masa angka pangunjunan i, ndang ro sian Ibana sude angka i. (Jaha Job 34:10-12.) Taida ma sada tudosan.

8, 9. Boasa ndang boi salahononta Debata tu hasusaan na masa nuaeng? Lehon ma tudosan.

⁸ Parrohahon ma sada tudosan: Songon sada ianakhon na pinagodang ni natuatuana. Diajari amana do ibana laho mambahen na denggan. Alai, sada tingki  dung dolidoli ibana, mangalo ma tu amana. Laho ma ibana sian jabu, jala susa ma ibana di pangarantoan. Tasalahon do amana, dung susa anakna i? Ndang! (Lukas 15:11-13) Songon ama i, ndang dipaksa Debata jolma ingkon mangoloi Ibana. Jadi, tingki masa pangunjunan, ndang boi tasalahon Debata.

⁹ Adong do alana boasa ndang dipasohot Debata dope hasusaan. Di pasal 11, taboto ma alusna sian Bibel. Alai, pos ma rohanta holong do roha ni Debata tu hita jala holan Ibana do na boi paluahon hita sian hasusaan.​—Jesaya 33:2.

10. Boasa boi pos rohanta na laho pasohoton ni Debata do angka hasusaan alani halak parjahat?

¹⁰ Pos do rohanta tu Debata ala Ibana Debata na badia. (Jesaya 6:3) Sude ulaonNa badia jala denggan. Alai, ndang songon i molo jolma. Ndang adong jolma na dos gogona songon Debata. Ibana boi do pasohothon angka hasusaan na masa di tano on. RipashononNa ma angka halak parjahat sian tano on.​—Jaha Psalmen 37:9-11.

11. Songon dia do pangkilalaan ni Debata mangida hasusaan na masa tu hita?

¹¹ Songon dia do pangkilalaan ni Debata mangida hasusaan na masa di tano on dohot na masa tu dirinta sandiri? Bibel mangajarhon, dihaholongi Debata do hatigoran. (Psalmen 37:28) Diparrohahon do na sintong manang na sala. Ndang lomo roha ni Debata mangida hasusaan na masa tu jolma. Bibel mandok, ”Mansai hansit do rohaNa” mida hasusaan na hea  masa najolo. (1 Musa 6:5, 6, Bibel siganup ari) Ndang mubauba Debata. (Maleaki 3:6) Didok Bibel muse, diparrohahon Debata do hita.​—Jaha 1 Petrus 5:7.

12, 13. (a) Boasa boi tahaholongi angka donganta jolma? Songon dia do pangkilalaanta tingki mangida hasusaan di tano on? (b) Boasa pos rohanta laho pasohoton ni Debata do hasusaan di tano on?

¹² Didok Bibel muse, ditompa Debata jolma tumiru rupaNa. (1 Musa 1:26) Lapatanna, disuanhon Debata do parangeNa tu roha ni jolma tingki manompa nasida. Alani i do boi tahaholongi donganta jolma. Jadi, molo hansit do rohanta mangida hasusaan ni halak na burju, humansitan do roha ni Debata mangida i! Sian dia do boi taboto?

¹³ Bibel mangajarhon, ”haholongon do Debata”. (1 Johannes 4:8) Alani holongNa do umbahen dipatupa Debata ulaonNa. Jadi, boi hita patuduhon holong ala haholongon do Debata. Parrohahon ma tudosanna; molo tuk do gogonta, olo do hita laho pasohothon hasusaan na masa di tano on? Tontu olo! Ala tahaholongi do sude jolma. Songon i do nang Debata. Ala Ibana parholong, pasohotonNa do sude angka hasusaan na adong di tano on. Pos do rohanta laho pasauton ni Debata sude janji na adong dipatudu di halaman na parjolo di buku on. Asa boi hita lam porsea tu sude janji ni Debata, ingkon lam tatanda do Ibana.

14. Ise do goar ni Debata? Jala sian dia do taboto na ingkon tapangke goarNa?

¹⁴ Molo naeng maraleale hita dohot sasahalak, aha do na parjolo tapaboa? Goarta. Adong do goar ni Debata? Didok godang agama, goarNa Tuhan  manang Debata. Sasintongna, ndang i goar ni Debata. Holan panjouonNa do i, dos ma songon ”raja” manang ”presiden”. Debata sandiri paboahon tu hita ise goarNa, i ma Jahowa. Psalmen 83:19 mandok, ”Asa ditanda nasida sasada Ho do na margoar Jahowa, Natumimbul gumomgom liat portibi on.” Marribu hali goarNa disurathon di Bibel. Lomo roha ni Debata asa tatanda jala tapangke goarNa. Dipaboa Debata goarNa tu hita, asa boi maraleale tu Ibana.

15. Goar ni Debata, i ma Jahowa, aha do lapatanna?

¹⁵ Goar ni Debata, i ma Jahowa. Lapatanna, Ibana mambahen, Ibana pasauthon. Ndang adong manang aha pe na boi mangambati Ibana laho pasauthon sude sangkapNa. Jala, holan Jahowa do na boi mamangke goar on. *

16, 17. Aha do lapatan ni (a) ”Sigomgom saluhutna”? (b) ”Debata na manongtong”? (c) Panompa?

¹⁶ Didok di Psalmen 83:19, ”Sasada Ho do na margoar Jahowa, Natumimbul” jala di Pangungkapon 15:3  mandok, ”Na balga jala halongangan do angka ulaonmu, ale Tuhan Debata. Sigomgom saluhutna.” Aha do lapatan ni panjouon Sigomgom saluhutna? Lapatanna, ndang adong na gumogo sian Debata Jahowa. Jala, di 1 Timoteus 1:17 didok, Jahowa, i ma ”Debata na manongtong”. Aha do lapatan ni panjouon Debata na manongtong? Lapatanna, tongtong do Ibana adong. Psalmen 90:2 patorangkon, Jahowa do Debata na manongtong na so marmula jala na so marujung. Sada halongangan ma on tutu!

 ¹⁷ Sasada Jahowa do na dijou Panompa. Pangungkapon 4:11 mandok, ”Ale Tuhan Debatanami, na tama do Ho manjalo hasangapon dohot hamuliaon dohot hagogoon, ai ditompa Ho do saluhutna; hinorhon ni lomo ni roham do, umbahen manjadi angka i jala tartompa!” Jahowa do manompa saluhutna—surusuruan na di surgo, angka bintang na di langit, hau na marparbue dohot angka dengke na di laut!

18. Boasa godang halak marpingkir molo nasida ndang boi gabe aleale ni Debata? Songon dia do didok Bibel?

¹⁸ Godang halak mabiar dung diboto parange ni Debata. Ninna rohanasida, mansai gogo do Debata i, mansai sangap jala mansai dao sian hita. Boasa  ma pola ingkon sarihononNa ahu? Alai, pangkilalaan sisongon on do na dihalomohon Debata? Ndang! Lomo roha ni Jahowa jonok tu hita. Bibel mandok, ”Ai ndang na dao Ibana sian ganup hita on.” (Ulaon ni Apostel 17:27) Dipangido Debata do asa tapajonok tu Ibana jala molo taulahon songon i, pajonohonNa ma tu hita.​—Jakobus 4:8.

19. (a) Songon dia do hamu boi gabe aleale ni Debata? (b) Dia do parange ni Debata na dihalomohon rohamuna?

¹⁹ Songon dia do hamu asa boi gabe aleale ni Debata? Jesus mandok, ”Alai na mananda Ho, Debata na sasada i, na sintong i, dohot Jesus Kristus na sinurum, i do hangoluan na salelenglelengna.” (Johannes 17:3) Tongtong ma hamu marsiajar songon saonari on, na boi mambahen hamu lam mananda Jahowa dohot Jesus. Jala, boi ma dapotmuna hangoluan salelenglelengna. (1 Johannes 4:16) Nunga taparsiajari haholongon do Debata. Alai, godang dope parange ni Debata. Bibel paboahon tu hita, Jahowa do ”na asi roha, lambat tarrimas, jala godang denggan basana dohot habonaranna”. (2 Musa 34:6) Jahowa pardenggan basa jala na olo do manesa dosa. (Psalmen 86:5, Bibel siganup ari) Debata Jahowa sabar jala marsihohot tu janjiNa. (2 Petrus 3:9; Pangungkapon 15:4) Molo dijaha hamu di Bibel taringot Jahowa, lam godang ma botoonmuna angka parange ni Jahowa na denggan.

20-22. (a) Songon dia do asa jonok hita tu Debata nang pe ndang boi taida Ibana? (b) Aha do bahenonta tingki adong halak mangambati hita asa unang marsiajar Bibel?

²⁰ Songon dia do hita boi maraleale tu Debata nang  pe ndang boi taida Ibana? (Johannes 1:18; 4:24; 1 Timoteus 1:17) Tingki manjaha Bibel, boi ma taida molo Debata i sada hadirion do. (Psalmen 27:4; Rom 1:20) Lam godang hita marsiajar Bibel, lam tatanda ma Jahowa, lam holong ma rohanta jala lam jonok ma hita tu Ibana.

²¹ Gabe taboto ma molo Jahowa i songon ama parholong. (Mateus 6:9) Songon sada ama tu ianakhonna, Jahowa mangalehon ngolu jala lomo do rohaNa asa martua hita. (Psalmen 36:10) Bibel mangajarhon, boi do hita gabe aleale ni Debata. (Jakobus 2:23) Rimangi ma, Jahowa Panompanta lomo rohaNa maraleale tu hita.

²² Adong do ra na mangorai hamu marsiajar Bibel. Nasida mabiar hamu gabe marganti agama. Alai, unang loas hamu manang ise pe mangambati hamu laho maraleale tu Debata. Ala Ibana do alealenta na dumenggan.

23, 24. (a) Boasa porlu hita tongtong manungkun? (b) Aha do na laho taparsiajari di pasal na mangihut?

²³ Molo adong na so taantusi tingki marsiajar Bibel, unang maila hita laho manungkun. Jesus mangajarhon tu hita, ingkon serep do rohanta songon dakdanak na jotjot sai manungkun. (Mateus 18:2-4) Debata pe lomo do rohaNa molo hita mandapot alus ni sungkunsungkunta i. Molo sai tajaha jala taparsiajari Bibel, taboto ma i do hasintongan.​—Jaha Ulaon ni Apostel 17:11.

²⁴ Holan marsiajar Bibel do dalan na dumenggan laho mananda Jahowa. Di pasal dua, taulas ma muse songon dia Bibel ndang sarupa dohot buku na asing.