1, 2. Aha do na mambahen las roha ni si Elia?

MARLOJONG dope si Elia di por ni udan i nang pe nunga lam golap ari. Dao nai dope pardalananna tu Jisreel. Nang pe ndang poso be ibana, alai ndang marnaloja ibana marlojong, ala ”tangan ni Jahowa” do manogunogu ibana. Tontu, longang do rohana ala boi ibana manjoloani hureta ni Raja Ahab, na binoan ni angka hoda na jago!​—Jaha 1 Rajaraja 18:46.

² Nunga dao tading si Ahab dibahen si Elia. Tapingkirhon ma, tingki marlojong si Elia sahalakna ditompas udan, huhut las rohana mangarimangi na masa na sadari i. Nunga dipatimbul ibana Jahowa dohot panombaon na sintong di ari i. Nunga dao ditadingkon ibana Dolok Karmel, jala ndang tarida be dibahen holom ni ombun. Di dolok i do Jahowa manaluhon sisomba Baal marhite si Elia. Tangkas do dipatudu na so sintong angka panurirang ni Baal i, jala nasida patut dibunu. Dungkon i, martangiang ma si Elia asa salpu ari logo na masa saleleng tolu satonga taon i. Saut ma pangidoanna i, jala ro ma udan na mansai doras di Israel!​—1 Raj. 18:18-45.

3, 4. (a) Boasa lam togu pangkirimon ni si Elia tingki mandapothon Jisreel? (b) Aha do sungkunsungkun na laho taulas?

³ Lam togu ma pangkirimon ni si Elia tingki marlojong ibana tu Jisreel na daona 30 kilometer. Ninna rohana, muba nama si Ahab. Hirim do rohana, ndang sombaon ni si Ahab be Baal dung diida sude na masa i. Ndang rajaan ni si Izebel be ibana, jala paujungonna ma hasusaan ni naposo ni Debata.

⁴ Tontu, molo hombar sude na masa songon na di rohanta, lam togu do pangkirimonta. Ninna roha, lam tu dengganna ma parngoluonta, jala nunga salpu be sitaonon na umborat. Alani i, ndang pola longang rohanta molo songon i na dihilala si Elia, alana, ”jolma do si Elia, sabangko dohot hita”. (Jak. 5:17) Alai sasintongna, ndang sae dope sitaonon ni si Elia. Gariada, satongkin nai hilalaonna ma biar dohot arsak ni roha,  pola naeng mate dihilala ibana. Aha do na masa, jala songon dia do Jahowa mangurupi ibana patoguhon haporseaon dohot habaranionna? Taparrohahon ma muse.

5. Dung salpu na masa di Dolok Karmel, lam sangap do Jahowa dibahen si Ahab, jala sian dia do taboto i?

⁵ Dung sahat si Ahab di Jisreel, taronjar do rohana laho muba? Bibel paboahon, ”Dipajojor si Ahab ma tu si Izebel sude na binahen ni si Elia dohot pamununa di saluhut angka panurirang marhite sian podang.” (1 Raj. 19:1) Parrohahon ma hata ni si Ahab tu si Izebel, ndang adong nanggo sahali pe didok goar ni Debata, i ma Jahowa. Dirimpu si Ahab do molo sude na masa i, saut alani gogo ni si Elia. On patuduhon, ndang sangap Jahowa dibahen si Ahab. Songon dia do molo si Izebel, tungganeboruna?

6. Aha do tona ni si Izebel tu si Elia, jala aha do lapatan ni tonana i?

⁶ Tarrimas situtu ma si Izebel! Disuru ma halak pasahathon tona on tu si Elia, ”Ingkon pinsangon ni angka debata ma ahu, molo so bahenonku tu hosam marsogot songon on, suang songon na binahenmi tu hosa ni sada sian angka nasida i.” (1 Raj. 19:2) Ingkon mate do si Elia bahenon ni si Izebel! Nunga ditahi si Izebel, tumagon ibana mate molo so boi bunuonna di bagasan na sadari i si Elia. Pingkiri ma pangkilalaan ni si Elia tingki didungoi ibana di ingananna marborngin di Jisreel, jala mambege barita i. Songon dia do pangkilalaanna?

7. Aha do pangkorhon ni hata ni si Izebel tu si Elia, jala aha do na diulahon si Elia?

⁷ Olo do hirim roha ni si Elia naung marujung panombaon tu Baal. Alai, ndang songon i na masa. Ndang muba dope roha ni si Izebel. Nunga godang dibunu ibana panurirang ni Jahowa, jala si Elia ma muse na laho bunuonna. Aha do pangkorhon ni tona ni si Izebel tu si Elia? Bibel paboahon, ”Mabiar ma si Elia.” Na sai dipingkiri si Elia do songon dia si Izebel mambunu ibana? Molo i do na sai dipingkirhon, mago ma habaranionna i. Alani i, ”gabe laho ma ibana martabuni” paluahon hosana.​—1 Raj. 18:4; 19:3, Bibel siganup ari.

8. (a) Songon dia do na masa tu si Elia dos songon na masa tu si Petrus? (b) Aha do na boi taparsiajari sian si Elia dohot si Petrus?

⁸ Asing ni si Elia, adong dope halak na marhaporseaon na  hea mabiar. Umpamana, apostel Petrus. Marhite tanda halongangan, hea do Jesus mangurupi si Petrus asa boi mardalan di atas ni aek. Alai, tingki diida si Petrus ”alogo na gogo”, moru ma habaranionna jala naeng lonong ibana. (Jaha Mateus 14:30.) Adong do na boi taparsiajari sian pengalaman ni si Elia dohot si Petrus. Asa boi hita tongtong barani, unang ma sai tapingkiri angka na mambahen hita mabiar. Alai, pos ma rohanta tu Debata, na mangalehon pangkirimon dohot gogo.

9. Patorang ma pardalanan ni si Elia dohot pangkilalaanna tingki i.

⁹ Alani biar ni roha ni si Elia, lao ma ibana tu Berseba di Juda, daona hirahira 150 kilometer di sabola selatan. Ditadingkon ma naposona jala laho ma ibana tu padang pasir. Songon na dipaboa tu hita, ’sadari’ ma lelengna ibana di pardalanan. Ra, dung binsar mata ni ari borhat ma ibana, jala ndang adong diboan sipanganonna. Di bagasan biar ni roha huhut manaon posi ni mata ni ari do ibana mardalan. Asing ni i, roa do dalan sidalananna. Dung lam bot ari, ndang margogo be si Elia. Alani lojana, hundul ma ibana di bona ni hau tadatada. Jala holan i do inganan marlinggom na adong di padang pasir i.​—1 Raj. 19:4, Bibel siganup ari.

10, 11. (a) Aha do lapatan ni tangiang ni si Elia? (b) Marhite angka ayat na disurat, patorang ma songon dia pangkilalaan ni angka naposo ni Jahowa na hea marmetmet ni roha.

¹⁰ Ala nunga mandele, dipangido si Elia ma asa tumagon ibana mate. Didok ibana, ”Ai ndang dumenggan ahu sian angka daompung!” Diantusi ibana do, nunga mate angka ompungna jala gabe tano. Alani i, ndang adong be na boi ulahonon ni nasida. (Pjm. 9:10) Dihilala si Elia, ndang adong be lapatanna mangolu. Alani i, didok ma, ”Sae ma i!” Aha ma labana ahu mangolu?

¹¹ Songgot do rohanta mambege sahalak baoa na togu partondionna marpingkir songon i? Ndang songgot rohanta. Godang do baoa dohot borua na marhaporseaon disurat di Bibel na marmetmet ni roha, jala dipangido nasida do asa tumagon mate alani susa ni rohana. Umpamana, si Rebekka, si Jakkob, si Musa, dohot si Job.​—1 Mus. 25:22; 37:35; 4 Mus. 11:13-15; Job 14:13.

12. Songon dia do hita maniru si Elia tingki marmetmet ni roha?

 ¹² Saonari, hita mangolu di ”angka ari hasusaan”. Alani i, ndang pola songgot rohanta molo tabege godang naposo ni Debata marmetmet ni roha. (2 Tim. 3:1) Tingki mangadopi hasusaan, tiru ma haporseaon ni si Elia jala pasahat ma holso ni rohamu tu Debata. Taingot ma, ”Debata, Sipangapul na sumurung” do Jahowa. (Jaha 2 Korint 1:3, 4.) Diapuli Jahowa do si Elia?

13, 14. (a) Songon dia do Jahowa marlambok ni roha mangurupi sahalak panurirang? (b) Boasa tarapul rohanta mamboto na ditanda jala diantusi Jahowa hahuranganta ganup marsadasada?

¹³ Songon dia do pangkilalaan ni Jahowa mangida sian surgo, panurirang na dihaholongi Ibana peak di bona ni hau, jala sai mangido asa tumagonan ibana mate? Taboto ma, dung renge si Elia modom, disuru Jahowa do surusuruanNa mandapothon ibana. Lambok do surusuruan i mandungoi si Elia, jala mandok, ”Hehe ma ho mangan!” Dungo jala mangan ma si Elia, ala nunga diparade surusuruan i sipanganon ni si Elia. Las dope roti i, jala adong aek siinumon. Mandok mauliate do ibana tu surusuruan i? Ndang dipaboa taringot i. Alai na taboto, mangan, minum jala modom do muse si Elia. Na mandele do ibana umbahen ndang olo mangkatai? Mandapothon tiur ni ari, didungoi surusuruan i ma ibana muse, jala lambok didok, ”Hehe ma ho mangan, ai dalan na dao do sidalananmu.”​—1 Raj. 19:5-7.

¹⁴ Pangantusion na sian Debata, mangurupi surusuruan i mamboto tudia inganan na tinuju ni si Elia. Diboto do muse pardalanan na borat do i molo holan mangasahon gogo ni si Elia sandiri. On mambahen las rohanta, ala hita manomba Jahowa jala umbotoan do Ibana tu hagaleon dohot sangkapta martimbangkon dirinta sandiri! (Jaha Psalmen 103:13, 14.) Aha do laba ni sipanganon i tu si Elia?

15, 16. (a) Aha do na boi diulahon si Elia dung dilehon Jahowa sipanganon? (b) Boasa ingkon tahamauliatehon cara ni Jahowa patoguhon naposoNa saonari on?

¹⁵ Bibel paboahon, ”Hehe ma ibana jala mangan minum, jala mardalan margogohon sipanganon i opatpulu ari opatpulu borngin lelengna, sahat ro di dolok ni Debata, i ma Horeb.” (1 Raj. 19:8) Marpuasa do si Elia 40 ari, 40 borngin. Diihuthon si Elia do songon na binahen ni si Musa, hirahira 600 taon andorang so ibana. Jala, diulahon Jesus do on muse 1.000 taon dungkon i. (2 Mus. 34:28; Luk. 4:1, 2) Sipanganon na dipatupa marhite tanda halongangan i ndang pasaehon sitaononna, alai  mambahen ibana margogo. Rimangi ma sahalak baoa na matua boi mandalani padang pasir sian ari tu ari, minggu tu minggu saleleng sada satonga bulan!

¹⁶ Dipargogoi Jahowa do muse angka naposoNa saonari marhite sipanganon partondion, ndang marhite tanda halongangan. (Mat. 4:4) Boi do hita tongtong togu di partondion molo taparsiajari taringot tu Debata marhite Bibel dohot angka sijahaon na marojahan tu Bibel. Sipanganon partondion i, ndang pasaehon sitaononta, alai mangurupi hita mangadopi angka sitaonon. Dung i, diurupi do hita mandapot ”hangoluan na salelenglelengna”.​—Joh. 17:3.

17. Tu dia do si Elia laho, jala boasa ringkot inganan i?

¹⁷ Hirahira 320 kilometer ma si Elia mardalan, jala sahat ma ibana tu Dolok Horeb. Disi do Jahowa marhite surusuruan mangkatai tu si Musa, di tongatonga ni ramba na marsigorgor, jala disi do muse dilehon Jahowa Patik parpadanan tu halak Israel. Disi ma si Elia marlinggom di bagas goa.

18, 19. (a) Aha do disungkun surusuruan i tu si Elia, jala aha do alusna? (b) Aha do tolu na mambahen si Elia marmetmet ni roha?

¹⁸ Di Horeb, ro ma ”hata” ni Jahowa marhite sahalak surusuruan na mandok, ’Aha do na niulam dison, ale Elia?’ Lambok do ra hata i dipasahat na mambahen si Elia olo patolhashon na di rohana. Jala didok ma, ”Marmurukmuruk situtu do ahu nian humongkop ulaon ni Jahowa, Debata Zebaot, ai nunga ditadingkon halak Israel parjanjianmu, nunga maloha angka langgatanmu, jala nunga dibunu angka panurirangmu marhite sian podang, sasada ahu na ma tading, dohot hosangki dope dilului nasida naeng buatonna.” (1 Raj. 19:9, 10) Sian hata on, taboto ma adong tolu na mambahen si Elia marmetmet ni roha.

¹⁹ Parjolo, marisuang do dihilala si Elia ulaonna saleleng on. Nunga martaontaon ibana gabe panurirang, pabadiahon goar ni Debata, jala patujolohon panombaon tu Jahowa. Alai ndang lam tu dengganna bangso i, ndang marhaporseaon, mangalo, jala lam tu raratna do panombaon tu Baal. Alani i, ”marmurukmuruk situtu” ibana tu Jahowa. Paduahon, dihilala si Elia holan ibana nama panurirang na tading. ”Sasada ahu na ma tading,” didok ibana. Sian torop ni bangso i, holan sasada ibana nama na manomba Jahowa. Na patoluhon, mabiar do si Elia. Nunga godang panurirang naung dibunu, jala ibana ma muse. Maol do ra di si Elia patolhashon na di rohana i, alai ndang  maila ibana pasahathon i. Tingki martangiang ibana pasahathon sude na di rohana, gabe sitiruon ma ibana tu sude angka na marsihohot.​—Ps. 62:9.

20, 21. (a) Patorang ma angka na niida ni si Elia sian pintu ni goa di Dolok Horeb? (b) Songon dia do pangkilalaan ni si Elia dung mangida huaso ni Jahowa?

²⁰ Aha do dibahen Jahowa tingki mabiar jala holsoan si Elia? Dipangido surusuruan i ma si Elia jongjong di pintu ni goa i. Dioloi si Elia do pangidoanna i, nang pe so diboto aha na laho masa. Tompu ma ro habahaba! Alani gogona, marbolaan ma dolok batu, jala soara ni ronggur mambahen nengel pinggol. Pingkirhon ma tingki marsitutu si Elia mangondingi simalolongna, huhut maniop baju ganjangna asa unang dihabangkon alogo i. Ingkon jaga do ibana asa unang madabu, alani lalo na mangkutur tano dohot dolok! Ndang humosa dope, pintor ro ma api jala masuk ma ibana tu goa i asa unang matutung.​—1 Raj. 19:11, 12.

²¹ Tangkas do disurat di Bibel, ndang adong Jahowa di bagasan tanda halongangan i. Diboto si Elia do molo Jahowa ndang debata sileban songon Baal, na dihaporseai parohon udan. Jahowa do Sitompa saluhut, jala dao do gumogo Ibana sian angka na tinompaNa, haru langit ni langitan ndang siat gabe ingananNa! (1 Raj. 8:27) Songon dia do on mangurupi si Elia? Taingot ma, mabiar do ibana. Alai, ndang mabiar be ibana tu si Ahab dohot tu si Izebel, dung diboto ibana Jahowa pargogo na so hatudosan do na mandongani ibana!​—Jaha Psalmen 118:6.

22. (a) Songon dia do soara na lambok paposhon roha ni si Elia? (b) Ise do ra na mangkatahon soara na lambok i? (Ida surat na di toru.)

²² Dung mintop api i, dibege si Elia ma soara na lambok. Dipaboa si Elia ma muse na di rohana. * Gabe lumbang ma pangkilalaanna dungkon i. Tarapul do roha ni si Elia mambege soara na lambok i. Dipapos Jahowa do roha ni si Elia na dihaholongi do ibana. Songon dia carana? Dipaboa Jahowa ma na  laho bahenonNa porang mangalo Baal di Israel. On patuduhon, ndang marisuang ulaon ni si Elia saleleng on. Alana, ndang adong na boi mangambati sangkap ni Debata. Jala parsidohot do muse si Elia pasauthon i, marhite mangulahon parenta na disuru Jahowa tu ibana.​—1 Raj. 19:12-17.

23. Songon dia do Jahowa mangurupi si Elia asa unang lungunlungunan?

²³ Songon dia do muse taringot tu pangkilalaan ni si Elia na lungunlungunan? Adong dua na diulahon Jahowa. Na parjolo, disuru Jahowa do si Elia mamiahi si Elisa laho manggantihon ibana gabe panurirang. Urupan jala donganan ni si Elisa ma ibana saleleng pigapiga taon. Tontu, marlaba situtu do on! Na paduahon, dipaboa Jahowa ma muse tu ibana, ”Tinggal dope hubahen di Israel pitu ribu halak, saluhutna i angka na so mangalompit ulu ni totna marsomba tu Baal dohot na so dung mangumma ibana.” (1 Raj. 19:18) Ndang sasada si Elia na tading. Tontu, las situtu do roha ni si Elia mamboto adong marribu halak na so olo manomba Baal. Dihaporluhon nasida do pangkobasion ni si Elia dohot sitiruon na binahenna ala marsihohot jala barani di tingki i. Boi tadok, tarapul do roha ni si Elia mambege soara na lambok sian suruan ni Jahowa i.

24, 25. (a) Songon dia do hita boi manangihon soara ni Jahowa? (b) Boasa boi pos rohanta na dapotan pangapulion do si Elia sian Jahowa?

²⁴ Songon si Elia, ra longang do rohanta alani angka na tinompa ni Jahowa. Tarida do huaso ni Jahowa sian na tinompaNa. (Rom 1:20) Sahat tu saonari, dipangke Jahowa do huasoNa mangurupi angka naposoNa na marsihohot. (2 Kron. 16:9) Alai, mangkatai do Jahowa tu hita marhite Bibel. (Jaha Jesaya 30:21.) Boi ma Bibel dipatudos tu soara na lambok molo olo hita diurupi. Marhite na disurat di Bibel, Jahowa maminsang, mangapuli, jala paposhon rohanta taringot holongNa.

²⁵ Songon dia do pangkilalaan ni si Elia dung diida na masa di Dolok Horeb? Tontu, tarapul do rohana! Alana, pintor laho jala barani do muse panurirang na marsihohot on mangalo panombaon tu Baal. Molo tarimangi ”pangapulon na di bagasan Surat i”, i ma Bibel, boi ma hita maniru haporseaon ni si Elia.​—Rom 15:4.