Tu Angka Dongan Sahaporseaon na Hinaholongan:

Di Menara Pengawal 1 Januari 2008, dipatandahon do tu hita sada artikel na marjudul, ”Tiru ma Haporseaon ni Nasida”. Mulai sian i, sahali tolu bulan taida ma artikel na baru sian seri i!

Songon dia do pangkorhon ni i tu na manjaha? Adong sahalak borua naung manjaha artikel taringot tu si Marta mandok, ”Mengkel suping ma ahu dung manjaha i, ala songon si Marta do ahu. Magodangku do ulaonku tingki manamue. Gabe lalap ma ahu, jala ndang marsaor dohot angka dongan.” Sahalak borua na poso mandapot parsiajaran sian na masa tu si Ester, ”Tutu, sai naeng marpangkean model na baru do iba. Porlu do taparrohahon caranta marpangkean, alai unang malobihu.” Didok ibana muse, ”Na diparrohahon Jahowa, i ma jolma parbagasan.” Taringot tu apostel Petrus, sahalak donganta borua mandok, ”Tangkas situtu do boi huantusi na masa tu si Petrus i! Boi huhilala pangkilalaanna tingki i! Marsitutu do ahu asa mangantusi jala mangkilala na masa na so disurathon di Bibel.”

Angka na manjaha jala torop dope na asing, manongos surat mandok mauliate taringot tu artikel on. Hombar tu na nidok ni si Paulus, ”Nasa na tarsurat hian, bahen poda di hita do, umbahen na tarsurat.” (Rom 15:4) Disurat pe taringot tu na marhaporseaon i di Bibel, laho mangajari hita sude, nang pe naung leleng gabe Sitindangi Ni Jahowa.

Dijujui hami do hamu asa pintor manjaha buku on. Pangke ma buku on di panombaon na sasaripemuna, tontu lomo do roha ni ianakhonmuna! Tingki diulas buku on di Parsiajaran Bibel Huria, marsitutu ma hamu asa ro tu parpunguan. Manat jala marsoara ma hamu manjaha. Pingkirhon hamu ma pangkilalaan ni angka na dipaboa di ayat i. Ida ma aha na niida ni nasida, jala pahombar ma parange na pinatudu ni nasida tingki mangadopi na masa dohot tu parangemuna.

Las situtu rohanami patandahon tu hamu buku on. Sai anggiat ma on gabe pasupasu tu hamu dohot tu keluargamuna. Tabe sian hami,

Punguan na Mangaradoti Organisasi ni Sitindangi Ni Jahowa