PASAL 10
Bahenon ni Raja I ma Rayatna Ias di Partondion
1-3. Aha do na diulahon Jesus tingki diida ramun joro ni Debata?
MANSAI holong do roha ni Jesus tu bagas joro na adong di Jerusalem, ala diboto ibana lapatan ni bagas joro i. Nunga leleng joro i gabe inganan panombaon na sintong. Dung i, ingkon ias jala badia do panombaon tu Debata Jahowa. Rimangi ma pangkilalaan ni Jesus tingki diida ramun joro i tanggal 10 Nisan 33 M. Aha do na masa?—Jaha Mateus 21:12, 13.
2 Di Alaman inganan ni halak na so Jahudi na adong di joro, angka partigatiga dohot situngkari hepeng mangahut pangomoan sian angka naposo ni Debata na ro mangalehon pelean tu Jahowa. a ”Dipabali [Jesus] ma sian i saluhut angka na manggadisi dohot na manuhori disi, ditunggalingkon do meja ni angka situngkari hepeng.” (Bandingkon tu Nehemia 13:7-9.) Dimuruki do angka pangahut ala dibahen bagas joro gabe inganan ni panangko. Tangkas ma, Jesus patuduhon ingkon tongtong do badia panombaon tu Jahowa!
3 Marratus taon dungkon i, dimiahi ma Jesus gabe Raja Messias. Dipabadia ibana ma muse sada joro, i ma sude halak na manomba Jahowa hombar tu lomo ni rohaNa saonari on. Joro na dia do on?
Dipabadia ”Halak Lepi”
4, 5. (a) Songon dia do Jesus mambahen ias jala badia angka siihuthon ibana sian taon 1914 sahat tu mula ni taon 1919? (b) Naung sae do ulaon mambahen ias jala badia naposo ni Debata? Patorang ma.
4 Songon na taparsiajari di Pasal 2, dung gabe Raja Jesus taon 1914 ro do ibana rap dohot Amana mamareso joro partondion, i ma aturan tu panombaon na sintong. b Diida Raja i ma porlu do dipabadia jala dibahen ias halak Kristen na miniahan, i ma ”halak Lepi”. (Mal. 3:1-3) Alani i, sian taon 1914 sahat tu mula ni taon 1919, diloas Jahowa do naposoNa diuji. Marsihohot do halak Kristen na miniahan on tingki diuji, jala marhiras ni roha do nasida mangurupi Raja Messias!
5 Alani i, naung sae do ulaon mambahen ias jala badia naposo ni Debata? Ndang dope. Saleleng tingki parpudi, marhite Raja Messias diurupi Jahowa do angka siihuthon ibana asa tongtong hombar tu aturan ni panombaon na sintong. Di dua pasal na mangihut, taparsiajari ma songon dia Messias mangurupi angka siihuthon ibana ias di parange dohot di organisasi. Parjolo, taparsiajari ma cara asa ias di partondion. Taparrohahon ma na diulahon Jesus tingki di tano on manang dung Raja laho mangurupi angka siihuthon ibana tongtong ias di partondion.
Jaga Hamu ma Dirimu Tongtong Ias
6. Molo taparrohahon parenta ni Jahowa tu halak Jahudi na tartaban di Babel, aha do lapatan ni ias di partondion?
6 Aha do lapatan ni ias di partondion? Taparrohahon ma parenta ni Jahowa tingki laho ruar halak Jahudi sian Babel di abad paonomhon SM. (Jaha Jesaya 52:11.) Mulak ma nasida tu Jerusalem laho pajongjongkon muse bagas joro jala mambahen panombaon na badia. (Esr. 1:2-4) Dipangido Jahowa do asa dipasiding sude ulaon panombaon ni halak Babel. On ma parenta ni Debata tu nasida: ”Unang jama hamu na ramun”, ”ruar ma hamu sian tongatonganasida”, jala jaga hamu ma dirimu tongtong ias. Ndang boi ramun panombaon tu Jahowa alani panombaon na so sintong. Aha do na taparsiajari sian on? Ias di partondion, dohot do i manjaga diri tongtong ias sian ajaran dohot ulaon ni agama na so sintong.
7. Aha do dalan na dibahen Jesus laho mangurupi angka siihuthon ibana asa tongtong ias di partondion?
7 Dung Raja Jesus, ditontuhon ma sada dalan laho mangurupi angka siihuthon ibana asa tongtong ias di partondion. Dalan i, i ma naposo haposan jala na marroha na dipillit taon 1919. (Mat. 24:45) Di tingki i, nunga ias angka Parsiajar Bibel sian angka ajaran agama palsu, alai porlu dope nasida dipaias. Sian tingki tu tingki, marhite naposo haposan dipapatar Kristus do taringot tu ari raya dohot ulaon na porlu ditadingkon naposo ni Debata. (Poda 4:18) Taida ma pigapiga taringot i.
Ingkon Rayahonon ni Halak Kristen do Natal?
8. Aha do naung diboto angka Parsiajar Bibel taringot tu Natal, alai aha do na so tangkas diantusi nasida?
8 Nunga leleng diboto Parsiajar Bibel molo ari Natal marharoroan sian ulaon ni sipelebegu, jala ndang tanggal 25 Desember Jesus tubu. Zion’s Watch Tower Desember 1881 mandok, ”Marjuta ajaran ni sipelebegu diajarhon di gareja. Alai, na gumodang muba holan goar do. Imam ni sipelebegu gabe imam Kristen jala ari raya ni sipelebegu gabe ari raya ni halak Kristen. Umpamana, ari Natal.” Taon 1883, sada judul ”Andigan do Ari Hatutubu ni Jesus?” (When Was Jesus Born?) diulas di Watch Tower, na paboahon hirahira di mula ni bulan Oktober do Jesus tubu. c Alai, ndang tangkas diantusi Parsiajar Bibel na so porlu mangarayahon ari Natal. Alani i, dirayahon anggota keluarga Betel di Brooklyn dope ari Natal. Alai, muba ma on dung taon 1926. Boasa?
9. Ujungna, aha do na diantusi Parsiajar Bibel taringot tu ari Natal?
9 Dung tangkas disulingkiti taringot on, diantusi Parsiajar Bibel ma molo ari Natal dohot hasomalan na diulahon tingki i ndang pasangaphon Jahowa. Artikel taringot tu ”Sejarah ni Ari Natal” (The Origin of Christmas), na adong di The Golden Age 14 Desember 1927 paboahon molo ari Natal, i ma ulaon ni sipelebegu na mangkaringkothon pesta pora dohot panombaon tu ganaganaan. Dipatorang do di artikel i, ndang hea disuru Jesus angka siseanna laho mangarayahon ari Natal. Jala tangkas ma dipaboa hata on: ”Portibi on, giotgiot ni daging, dohot Sibolis marlas ni roha molo dirayahon Natal . . . on ma na mambahen halak Kristen na marsihohot tu Jahowa ndang mangarayahon i.” Sian bulan Desember 1927, ndang hea be dirayahon keluarga Betel ari Natal.
10. (a) Aha do na tangkas dipapatar taringot tu ari Natal di bulan Desember 1928? (Ida ma kotak ” Sejarah ni Ari Natal dohot na Tinujuna”.) (b) Songon dia do naposo ni Debata dipasingot asa unang parsidohot tu angka ari raya, jala aha do angka ari raya na ingkon dipasiding? (Ida ma kotak ” Papatarhon Angka Ari Raya”.)
10 Tu taon na mangihut lam diantusi Parsiajar Bibel ma taringot tu ari Natal. Tanggal 12 Desember 1928, donganta si Richard H. Barber, anggota staf kantor pusat, pasahathon jamita marhite radio na papatarhon sejarah ni Natal na mansai dihagigihon Debata. Songon dia do naposo ni Debata manjangkon pangantusion on? Tingki dirimangi si Charles Brandlein taringot tu keluargana na so olo be mangarayahon ari Natal, didok ibana, ”Borat do di hami laho manadingkon ulaon ni sipelebegu on? Saotik pe ndang borat! . . . Dos songon mambungka baju na rotak jala dibolongkon.” Songon i ma tongtong hiras ni roha ni donganta si Henry A. Cantwell na gabe pengawas wilayah mandok, ”Las do roha boi patuduhon holong tu Jahowa marhite ndang marnatal.” Rade do angka siihuthon Jesus mambahen hamubaon jala ndang mangarayahon ari raya na marharoroan sian sipelebegu. d—Joh. 15:19; 17:14.
11. Songon dia do hita patuduhon na rade hita mangurupi Raja Messias?
11 Gabe sitiruon do tu hita angka Parsiajar Bibel na marsihohot on! Tasungkun ma dirinta, ’Songon dia do ahu manjangkon tudutudu na dilehon kantor pusat? Las do rohangku mangulahon i?’ Haradeonta mangihuthon tudutudu patuduhon roha na unduk tu Raja Messias, na mamillit naposo haposan paradehon sipanganon partondion di tingkina.—Ul. 16:4, 5.
Ingkon Pangkeon ni Halak Kristen do Silang?
Lencana salib-mahkota (Ida paragraf 12 dohot 13)
12. Saleleng martaontaon, songon dia do pangantusion ni Parsiajar Bibel taringot tu silang?
12 Leleng do dibahen Parsiajar Bibel silang gabe tanda ni halak Kristen. Ndang na disomba nasida silang i, ala diantusi nasida sala do manomba ganaganaan. (1 Kor. 10:14; 1 Joh. 5:21) Sian taon 1883, tangkas do dipatorang Watch Tower, ”dihagigihon Debata do sude ulaon manomba ganaganaan”. Pangantusion ni Parsiajar Bibel mulana, ndang sala mamangke silang molo ndang laho disomba. Umpamana, dipangke nasida do pin salib-mahkota. On gabe tanda di nasida molo marsihohot sahat di ujung ni ngoluna, dapot ni nasida ma tumpal [mahkota] hangoluan. Sian taon 1891 simbol salib-mahkota adong di sampul ni majalah Watch Tower.
13. Pangantusion aha do na lam tangkas diboto angka siihuthon Kristus taringot tu Silang? (Ida ma kotak ” Pangantusion na Lam Tangkas taringot tu Silang”.)
13 Mansai arga do di Parsiajar Bibel lencana salib-mahkota. Alai, di ujung ni taon 1920-an, lam diparhatutu siihuthon Kristus ma pangantusion taringot tu silang. Diingot donganta si Grant Suiter na gabe sahalak sian Punguan na Mangaradoti Organisasi ma kebaktian di Detroit, Michigan, AS, taon 1928. Ibana mandok, ”Dipatorang ma di kebaktian i, ndang porlu mamangke lencana salib-mahkota, jala ulaon hagigion do i.” Tu taon na mangihut lam godang ma hatorangan na papatarhon pangantusion taringot tu silang. Tutu ma, ndang tama silang dipangke di panombaon na sintong jala na badia.
14. Songon dia do naposo ni Debata manjangkon pangantusion na dipapatar taringot tu silang?
14 Songon dia do naposo ni Debata manjangkon pangantusion na dipapatar taringot tu silang? Tongtong do dipangke nasida lencana salib-mahkota na mansai dihaholongi nasida i? Didok si Lela Roberts ma, ”Pintor dirampingkon hami do i dung diboto hami aha lapatan ni silang i.” Dipaboa donganta si Ursula Serenco ma pangkilalaan ni godang donganta di tingki i, ”Taboto ma molo simbol taringot tu hamamate ni Tuan na tapangke saleleng on, marharoroan sian sipelebegu. Hombar tu Poda 4:18, las situtu do roha alani pangantusion na lam tangkas.” Ndang diihuthon naposo ni Debata na marsihohot be hasomalan ni sipelebegu!
15, 16. Songon dia do hita patuduhon na marsitutu manjaga asa tongtong ias panombaon na sintong tu Jahowa?
15 Las do rohanta maniru angka siihuthon Kristus na marsihohot. Tangkas ma diurupi Kristus do rayatna asa ias di partondion marhite naposo haposan. Alani i, pintor tajangkon ma sipasingot na dilehon taringot tu angka ari raya, ulaon dohot hasomalan na mambahen ramun agama na sintong. Songon angka donganta na mangolu di mula ni haroro ni Kristus, marsitutu ma hita manjaga asa tongtong ias panombaon na sintong tu Jahowa.
16 Saleleng di tingki parpudi, diondingi Kristus do huria ni Jahowa sian angka halak na mambahen ramun partondion. Songon dia do ibana mangulahon i? Taulas ma.
Manirang ”Angka Parjahat sian Tongatonga ni Angka Partigor”
17, 18. Aha do lapatan ni (a) manampakkon jala tu laut, (b) ”marragamragam [dengke] dapotsa”, (c) mamillit dengke na denggan, mandabuhonsa tu ingananna, dohot (d) mambolongkon dengke na so hasea?
17 Sai diradoti Rajanta, Jesus Kristus do huria ni Debata di liat portibi on. Marhite cara na so tangkas taboto, Kristus dohot angka surusuruanna manirang angka parjahat sian tongatonga ni angka partigor. Digombarhon Jesus ma ulaon on songon na manjala. (Jaha Mateus 13:47-50.) Aha do lapatan ni tudosan on?
Manjala manggombarhon ulaon marbarita na uli di liat portibi on (Ida paragraf 18)
18 Songon ”jala na sinampakkon tu laut”. On manggombarhon ulaon marbarita na uli di liat portibi on. ”Marragamragam [dengke] dapotsa.” Barita na uli dijangkon marragam halak. Nasida mangihuthon tudutudu asa boi gabe halak Kristen na sintong. Deba sian nasida mulana manjangkon, alai ndang olo mangihuthon panombaon na sintong. e ”Mamilliti [dengke] na denggan, mandabuhonsa tu ingananna.” Halak na serep roha dipillit jala dipapungu tu angka huria, inganan ni nasida laho mangulahon panombaon na ias tu Jahowa. Dipambolongkon do angka ”na so hasea”. Saleleng tingki parpudi, Kristus dohot angka surusuruan manirang ”angka parjahat sian tongatonga ni angka partigor”. f Ujungna, angka na so marserep ni roha manang na so rade manadingkon hasomalan na so sintong, ndang tama adong di huria. g
19. Songon dia do pangkilalaanta tu na dibahen Kristus laho manjaga naposo ni Debata tongtong ias di panombaon na sintong?
19 Dame do roha ala taboto diondingi Rajanta Jesus Kristus do halak na dihaholongi ibana. Tarapul do rohanta mamboto, dos do hiras ni roha ni Jesus saonari tu hiras ni rohana di abad na parjolo M tingki mangurupi naposona asa ias di partondion. Las situtu do roha ala tongtong diurupi Kristus naposo ni Debata ias di partondion dohot di panombaon na badia! Alani i, na patuduhon pangoloion do hita tu Raja dohot tu Harajaonna molo tongtong tapasiding ulaon ni agama na so sintong.
a Halak Jahudi na ro tu joro ingkon mamangke hepeng na ditontuhon laho manggarar pajak tahunan ni joro i. Ditontuhon situngkar hepeng do sadia lehonon ni nasida tingki manungkar hepeng. Ra, porlu do nasida manuhor binatang na laho dipelehon. Didok Jesus do angka partigatiga i ”[panangko]”, ala patimbohu arga na ditontuhon manang upa sijaloon nasida.
b Naposo ni Debata manomba Jahowa di alaman partondion ni bagas joro na badia na adong di tano on.
c Artikel on paboahon, ari hatutubu ni Jesus di tingki musim dingin ”ndang hombar tu angka parmahan na marborngin di ladang mangingani pinahannasida”.—Luk. 2:8.
d Surat ni donganta si Frederick W. Franz tanggal 14 November 1927 mandok, ”Taon on, ndang marnatal be hami jala satolop do sude keluarga Betel ndang mangulahon i be.” Tanggal 6 Februari 1928, surat ni donganta si Franz mandok, ”Sian tingki tu tingki, diurupi Tuan do hita asa lam ias sian pangantusion na so sintong na marharoroan sian organisasi ni Sibolis na patuduhon ulaon ni Babel.”
e Parrohahon ma, umpamana taon 2013 adong 7.965.954 penyiar, jala adong 19.241.252 na ro tu Borngin Parningotan ni Tuan.
f Manirang dengke na denggan sian dengke na so hasea ndang dos tu ulaon manirang birubiru sian hambing. (Mat. 25:31-46) Ulaon manirang birubiru sian hambing masa tingki ro hasusaan bolon. Andorang so masa i, halak na dipatudos songon dengke na so hasea boi mardenggan tu Jahowa jala marpungu tu huria.—Mal. 3:7.
g Ujungna, halak na manggombarhon dengke na so hasea dibolongkon tu api, lapatanna hamatean salelenglelengna na masa di ari na naeng ro.
