Dongan Parbarita na Hinaholongan:

PINGKIRHON ma molo hamu sahalak sian anggota keluarga Betel di Brooklyn. Hundul ma hamu sarapan huhut paimahon si C. T. Russell di ari Jumaat manogot tanggal 2 Oktober 1914. Ndang sadia leleng ro ma ibana jala songon na somal jongjong, jala didok ma, ”Horas ma di hamu sude angka dongan.” Ndang pintor hundul ibana di ingananna na somal, alai martopap tangan ma ibana huhut didok boaboa, ”Nunga marujung Zaman ni Sipelebegu; salpu nama pamarentaon ni nasida!” Las hian do rohamuna ala nunga leleng dipaima hamu hatorangan i! Rap dohot sude keluarga Betel, martopap tangan ma hamu jala marlas ni roha.

 Nunga marpulu taon na salpu dipaboa donganta si Russell boaboa on. Aha do naung diulahon Harajaon i? Nunga godang! Marhite Harajaon i, dipabadia jala diajari Jahowa do naposoNa sian tingki tu tingki. Taon 1914, holan marribu dope naposo ni Debata, alai saonari nunga lobi sian pitu satonga juta halak. Songon dia do hamu boi mandapot laba sian on?

Jotjot do tabege donganta mandok, ”Mardalan do hureta ni Jahowa.” Jala sintong do i. Mulai sian taon 1914, hureta ni Jahowa na manggombarhon organisasiNa na so tarida, hatop marlojong songon na diulas di buku on. Asa sahat barita na uli tu liat portibi on, marragam alat dipangke naposo ni Debata laho marbarita, umpamana marhite koran, plakat, gombar, kartu kesaksian, fonograf, radio dohot internet.

Dipasupasu Jahowa do ulaon on. Alani i, nunga dipabinsar angka buku lobi sian 670 bahasa na disarhon tu sude halak, ndang margarar. Rade do angka sukarelawan mangurupi ulaon pajongjongkon Bale Harajaon, Bale Kebaktian dohot fasilitas cabang di negera maju dohot di negara na susa di parhepengon. Dung i, tingki masa mara, hatop do ro angka donganta mangurupi na hona mara i jala on patuduhon nasida ”marhahamaranggi”.​—Poda. 17:17, Bibel siganup ari.

Sipata, marsitutu do angka pamimpin agama dohot musu ni hasintongan parohon hasusaan marhite undang-undang. Alai, gabe togu do haporseaonta ala jotjot on mambahen hatop tarsar ”barita na uli.”​—Ps. 94:20; Plp. 1:12.

Sada hak na sumurung do rap saulaon dohot angka donganta na marhobas tu Jahowa. Ringkot do botoonmu, holong do rohanami tu hamu sude. Alani i, sai anggiat ma marhite buku on diurupi hamu asa lam mangargai arta di partondion.​—Mat. 24:45.

Tabe sian hami

Dongan sahaporseaonmuna,

Punguan na Mangaradoti Organisasi ni Sitindangi Ni Jahowa