Tingki di pardalanan Jesus dohot angka siseanna sian Judea tu Galilea, maradian ma nasida di Samaria. Maradi ma nasida di sumur na adong di jonok ni kota Sikar. Ra, si Jakkob do na mambahen sumur i. Manang olo do ra disuru ibana halak na asing laho mambahen i. Di kota Nablus ma sumur i saonari.

Tingki i, laho ma sisean ni Jesus manuhor sipanganon. Alai, maradi do Jesus di sumur i. Ro ma sahalak boru Samaria mangalap aek tusi. Didok Jesus ma, “Lehon ma tu ahu aek i inumonku.”​—Johannes 4:7.

Sasintongna, ndang masipangkulingan halak Jahudi dohot halak Samaria. Alani i, longang ma roha ni borua i, ninna ma, “Ai halak Jahudi do ho, jala ahu halak Samaria, boasa ma pangidoonmu aek sian ahu?” Dialusi Jesus ma, “Aut sugari diboto ho asi ni roha ni Debata, jala aut ditanda ho na mangido aek siinumon sian ho, pangidoonmu do aek sian ibana jala lehononna ma tu ho aek hangoluan.” Dialusi borua i ma, “Ai timba ni Amang pe so adong jala bagas do sumur on. Sian dia ma dapot ni Amang aek hangoluan? Umbalga ma ho sian ompunami si Jakkob, na mangalehon sumur on tu hami? Ai nunga diinum ibana aek sian sumur on. Songon i angka anakna nang angka pinahanna.”​—Johannes 4:9-12.

Didok Jesus ma, “Manang ise na manginum aek sian sumur on mauas do muse. Alai manang ise na manginum aek na hulehon, ndang mauas be. Ai aek na hulehon tu ibana gabe songon mata mual ma i di bagasan dirina, na mangalehon hangoluan na saleleng ni lelengna.” (Johannes 4:13, 14) Nang pe loja, alai rade do Jesus paboahon hasintongan tu boru Samaria.

Didok borua i ma, “Lehon ma tu ahu aek i Amang, asa unang mauas be ahu jala unang ro be ahu tuson mangalap aek.” Alai dipaboa Jesus ma muse taringot tu na asing, ninna ma, “Laho ma ho, jou ma tunggane dolim jala ro ma hamu tuson.” Dialusi borua i ma, “Ndang adong be tunggane dolingku.” Didok Jesus ma, “Toho do na nidokmi, ndang adong be tunggane dolim. Ai nunga lima hali ho muli jala baoa donganmu nuaeng pe ndang tunggane dolim i.” Tarsonggot ma borua i mambege i.​—Johannes 4:15-18.

Ala sintong do hata ni Jesus i gabe didok borua i ma, “Panurirang do huida ho Amang.” Dipatudu ibana ma na lomo rohana marsiajar taringot tu Debata, tingki didok, “Di dolok [Gerizim] on do ompunami [halak Samaria] manomba Debata, alai hamu halak Jahudi mandok, ingkon di Jerusalem do inganan manomba Debata.”​—Johannes 4:19, 20.

Alai dipaboa Jesus ma tu ibana, manang didia pe boi do sasahalak manomba Debata. Didok Jesus ma, “Na ro ma tingkina ndang di dolok on jala ndang di Jerusalem sombaon ni halak Ama i.” Dung i didok ma muse, “Na laho ro ma tingkina jala saonari ma i. Sombaon ni angka sisomba Debata na tutu ma Ama i marhite panogu-noguon ni tondi parbadia  dohot hasintongan. Ai halak sisongon i do dilului Ama i laho manomba Ibana.”​—Johannes 4:21, 23, 24.

Ndang inganan laho manomba Debata na rumingkot di Ama i. Alai cara ni sasahalak manomba Ibana do na rumingkot. Mansai hona do hata i di roha ni borua i. Didok ma, “Huboto do na naeng ro Messias, na laos digoari Kristus. Molo dung ro ibana, patorangonna do i sude tu hami.”​—Johannes 4:25.

Dung i dipaboa Jesus ma tu ibana hasintongan na mansai ringkot. Didok ma, “Ahu do i, na mangkatai dohot ho.” (Johannes 4:26) Pingkirhon ma! Holan naeng mangalap aek hian do borua i. Alai tu borua i do parjolo sahali dipaboa Jesus molo ibana Messias. Ai ndang hea dope dipaboa ibana i tu halak na asing.

Dung i, ro ma angka sisean ni Jesus sian Sikar mamboan sipanganon. Diida nasida ma Jesus mangkatai dohot sahalak boru Samaria di sumur i. Gabe ditadingkon borua i ma gunsi inganan ni aekna i jala laho ma ibana tu kota.

Dung sahat di kota Sikar, dipaboa borua i ma hata ni Jesus i tu angka jolma. Didok ibana ma, “Ro jo hamu, asa bereng hamu halak na paboahon sude na hea huulahon. Ibana do ra Kristus i.” (Johannes 4:29) Mansai ringkot do hatana i. Ai nunga sian tingki ni si Musa naeng diboto nasida ise halak na dijanjihon i. (5 Musa 18:18) Alani i, laho ma nasida mangida Jesus.

Dijujui angka sisean i do asa mangan Jesus, alai ninna do, “Adong do sipanganonku, alai ndang diboto hamu manang aha i.” Sungkun-sungkun ma roha ni sisean i, didok nasida ma sama nasida, “Ai ise do nuaeng na mangalehon sipanganon tu ibana?” Alai ninna ma, “Sipanganonku i ma mangulahon lomo ni roha ni na marsuru ahu jala pasaehon ulaonna.”​—Johannes 4:32-34.

Jala dipaboa Jesus ma taringot tu ulaon  mamanen. Alai ndang mamanen di ladang na nidok ni Jesus disi. Ai hira-hira opat bulan nai do asa panen. Na nidokna, i ma ulaon marbarita dohot mangurupi halak asa gabe siseanna. Didok Jesus ma muse, “Tatap hamu ma hauma i. Ida hamu ma, nunga masak jala nunga boi panenon. Nunga manjalo upa angka panabi i, jala nunga dipapungu parbue tu hangoluan na saleleng ni lelengna. Gabe rap marlas ni roha ma panabur dohot panabi.”​—Johannes 4:35, 36.

Ra, nunga diida Jesus songon dia pangkorhon ni hatana tu boru Samaria i. Alani hata ni borua i, gabe godang do halak sian kota Sikar na porsea tu Jesus. Ai didok borua i do tu nasida, “Dipaboa ibana do sude na hea huulahon.” (Johannes 4:39) Alani i, tingki ro nasida tu sumur i, disuru ma Jesus marborngin rap dohot nasida jala asa diajari nasida. Marborngin ma Jesus di Samaria saleleng dua ari.

Tingki dibege halak Samaria i hata ni Jesus, porsea ma nasida. Didok nasida ma tu borua i, “Ndang holan alani na nidokmi umbahen na porsea hami, alai nunga dibege hami sandiri jala nunga diboto hami ibana do na paluahon portibi on.” (Johannes 4:42) Tontu, sitiruon do cara ni boru Samaria i tingki mamaritahon taringot tu Kristus. Ai sian hatana, gabe godang do halak naeng mamboto gumodang hatorangan.

Taingot ma, hira-hira bulan November manang Desember ma di tingki i. Jala opat bulan nai asa panen barli. Ai somalna di inganan i, bulan Maret manang bulan April do panen barli. Alani i dung Paskah taon 30 M, nunga marbarita, mangajari, jala mandidihon Jesus dohot angka siseanna saleleng ualu bulan di Judea. Saonari, naeng mulak ma nasida tu Galilea, na adong di sabola utara. Taida ma aha na laho masa disi.