Tingki di Jerusalem Jesus mangarayahon Paska taon 30 M, dibahen ibana do angka tanda halongangan manang mukjizat. Ujungna, godang ma halak na porsea tu ibana. Adong ma sahalak Parise na margoar si Nikodemus. Ibana anggota ni Sanhedrin, pengadilan tinggi ni halak Jahudi. Lomo do rohana mamboto na niajarhon ni Jesus. Alai, ala mabiar tu pemimpin ni halak Jahudi, ro ma ibana mandapothon Jesus borngin-borngin.

Didok si Nikodemus ma tu Jesus, “Guru, huboto hami do ho guru na sinuru ni Debata. Ai ndang adong na boi mambahen tanda halongangan songon na binahenmi molo so didongani Debata.” Didok Jesus ma tu ibana, asa boi sasahalak masuk tu Harajaon ni Debata, ingkon ‘ditubuhon do ibana muse’.​—Johannes 3:2, 3.

Disungkun si Nikodemus ma, “Songon dia ma boi halak naung magodang ditubuhon muse? Songon dia ma ibana boi masuk tu bortian ni inangna asa ditubuhon muse?”​—Johannes 3:4.

Alai ndang songon i lapatanna ditubuhon muse. Jesus mandok, “Ndang adong na boi masuk tu Harajaon ni Debata, ianggo so ditubuhon sian aek dohot sian tondi parbadia.” (Johannes 3:5) Tingki tardidi Jesus, songgop do tondi parbadia tu ibana. Di tingki i ma ibana ditubuhon “sian aek dohot sian tondi parbadia”. Jala tarbege do soara sian surgo na mandok, “On do Anakku, haholonganki, halomoan ni rohangku do ibana.” (Mateus 3:16, 17) Marhite i ma dipaboa Debata, Jesus i anakna jala na laho mangolu di surgo do muse anakna i. Di pudian ni ari, tingki Pentakosta taon 33 M diusehon do tondi parbadia tu angka halak naung tardidi. Alani i, dohot do nasida ditubuhon muse gabe angka anak ni Debata.​—Ulaon ni Apostel 2:1-4.

Ndang diantusi si Nikodemus taringot tu Harajaon na niajarhon ni Jesus i. Alani i, gabe dipatorang Jesus ma taringot tu hasurungan ni ulaonna gabe Anak ni Debata di tano on. Didok Jesus ma, “Songon si Musa na patimbohon ulok di sada tiang tingki di padang pasir, laos songon i ma Anak ni jolma i dipatimbo. Asa ganup halak na porsea tu ibana mandapot hangoluan na saleleng ni lelengna.”​—Johannes 3:14, 15.

Songon na masa tu halak Israel, diturbing ulok do nasida tingki di padang pasir. Alani i, asa boi nasida mangolu, ingkon idaon ni nasida do ulok tombaga na pinajongjong ni si Musa. (4 Musa 21:9) Songon i ma, ingkon patuduhonon ni sude halak do haporseaon tu Anak ni Debata, asa boi nasida malua jala mandapot hangoluan na saleleng ni lelengna. Asa diboto si Nikodemus molo i holong ni Jahowa, didok Jesus ma, “Ai songon on do balga ni holong ni roha ni Debata di portibi on, pola do Anakna na sasada i dilehon, asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna.” (Johannes 3:16) Jadi, hira-hira onom bulan dung dipungka ulaonna, dipaboa Jesus ma na ibana do dalan hangoluan i.

Didok Jesus ma tu si Nikodemus, “Ndang disuru Debata Anakna tu portibi on laho manguhum portibi on.” Lapatanna, Jesus disuru tu tano on, ndang na laho manguhum jolma tu hamatean, alai “asa malua do portibi on marhite ibana”.​—Johannes 3:17.

 Martabun-tabuni do si Nikodemus ro mandapothon Jesus ala mabiar tu halak Jahudi. Alani i, didok Jesus ma, “Alani on do nasida diuhumi: nunga ro panondang i [na pinatudu ni Jesus marhite ulaonna dohot ajaranna] tu portibi on, alai na holom i do dihaholongi jolma ndang na tiur i, ai angka na jahat do diulahon nasida. Manang ise na mangulahon na jahat dihasogohon i do na tiur, jala ndang ro i tu na tiur asa unang tarida pambahenanna i. Alai manang ise na mangulahon na sintong, ro do i tu na tiur asa tarida pambahenanna i hombar tu lomo ni roha ni Debata.”​—Johannes 3:19-21.

Nunga dibege si Nikodemus guru ni halak Israel i taringot tu ulaon ni Jesus laho pasauthon lomo ni roha ni Debata. Saonari, ibana ma na mamillit na laho ulahononna.