Jumpang ma tingkina keluarga ni si Josep, ale-alena, dohot tondongna borhat tu Jerusalem. Mangihuthon Patik, ingkon borhat do nasida ganup taon laho mangarayahon Paska. (5 Musa 16:16) Hira-hira 120 kilometer ma dao ni pardalanan ni nasida sian Nasaret tu Jerusalem. Godang do na ingkon ulahonon ni nasida jala las do roha ni nasida mangulahon i. Nunga marumur 12 taon Jesus tingki i. Las do rohana dohot tu perayaan i, jala ro tu bagas joro.

Ndang holan ari Paska na sadari i na dirayahon nasida, alai adong do muse perayaan na asing na masa saleleng pitu ari nai, i ma Perayaan Roti na So Marragi. (Markus 14:1) Dohot do perayaan on bagian ni ari Paska. Hira-hira dua minggu ma pardalanan ni nasida sian Nasaret tu Jerusalem, jala mulak tu Nasaret dung marborngin di Jerusalem. Alai taon on, lobi sian i ma leleng ni nasida di pardalanan.

Tingki di pardalanan naeng mulak tu Nasaret, dirimpu si Josep dohot si Maria do naung rap Jesus dohot angka tondong nang ale-ale ni nasida. Alai tingki maradi nasida di pardalanan naeng marborngin, ndang jumpang ni nasida Jesus. Dilului nasida ma ibana di angka rombongan i, alai ndang jumpang ni nasida ibana. Alani i, mulak ma si Josep dohot si Maria tu Jerusalem mangalului Jesus.

Nunga dua ari dilului nasida Jesus, alai ndang jumpang. Ujungna, di ari patoluhon diida nasida ma anakna i di sada inganan di bagas joro. Diida nasida do Jesus hundul di tonga-tonga ni angka guru Jahudi. Ditangihon ibana do angka guru i, jala disungkuni ibana do nasida. Longang do roha ni angka guru i mangida godang ni pangantusionna.

Didok si Maria ma, “Boasa bahenonmu songon on tu hami amang? Susa do amangmu dohot ahu mangalului ho.”​—Lukas 2:48.

Longang do roha ni Jesus ala disungkun nasida songon i tu ibana. Didok ibana ma, “Boasa pola luluanmuna ahu? Ndang diboto hamu na ingkon di jabu ni Damang ahu?”​—Lukas 2:49.

Dung jumpang nasida, mulak ma Jesus tu Nasaret rap dohot si Josep dohot si Maria, jala tongtong do dioloi ibana nasida. Lam magodang ma ibana jala lam marbisuk. Sian na gelleng, nunga lomo roha ni Debata dohot roha ni jolma tu ibana. Ai sitiruon na denggan do ibana tu angka na poso. Marsitutu do ibana asa togu parale-aleonna tu Debata alai ndang holan i, tongtong do dioloi ibana natua-tuana.