Sian Jeriko, borhat ma Jesus tu Betania. Umtimbo do laut 250 meter sian huta Jeriko. Hape huta Betania umtimbo do 610 meter sian laut. Jala di timur ni Dolok Jetun do huta on. Alani i, ingkon nangkok do nasida mardalan pat hira-hira 20 kilometer. Di huta Betania ma jabu ni si Lasarus dohot dua ibotona, jala hira-hira 3 kilometer ma dao ni Betania sian Jerusalem.

Nunga godang halak Jahudi na sahat tu Jerusalem laho mangarayahon Paska. Hatop do nasida ro laho “mangulahon ulaon paiashon diri”. Ai olo do ra adong na mambahen nasida ramun, umpamana manjama bangke ni na mate. (Johannes 11:55; 4 Musa 9:6-10) Deba sian nasida marpungu di bagas joro. Mangkata-hatai ma nasida mandok atik na ro do Jesus manang na ndang tu perayaan Paska.​—Johannes 11:56.

Deba mandok ndang barani Jesus ro. Ala naeng ditangkup jala dibunu angka pamimpin ni agama do ibana. Gariada didok angka pamimpin agama i, manang ise na pajumpang dohot Jesus ingkon dipaboa ma tu nasida. (Johannes 11:57) Nunga hea naeng dibunu nasida Jesus dung dipahehe ibana si Lasarus. (Johannes 11:49-53) Alani i ma, boasa didok nasida ndang barani Jesus ro.

Sahat ma Jesus di Betania, “onom ari andorang so Paska”, i ma ari Jumat. (Johannes 12:1) Dung i, ari Sabbat ma botarina i. Alani i, nunga sahat Jesus di Betania andorang so ari Sabbat. Ai mangihuthon patik ni halak Jahudi ndang boi mardalani di ari Sabbat. I do alana ndang tingki ari Sabbat Jesus borhat sian Jeriko. Pintor tu jabu ni si Lasarus do ra Jesus.

Adong ma di huta i sahalak baoa na margoar si Simon. Hea do ra ibana dipamalum Jesus sian sahit kusta. Ditogihon ibana ma Jesus, si Lasarus dohot na asing mangan tu jabuna dung ari Sabbat. Songon na somal, marhobas ma si Marta paradehon sipanganon tu angka na ro. Molo si Maria sai ditangihon ibana do Jesus. Alai gabe muruk do angka na ro i tu si Maria. Boasa?

Dibuat si Maria ma botol “miak nardus na angur jala na mansai arga”. (Johannes 12:3) Mansai arga do miak on, hira-hira 300 dinar. Dos ma on tu upa ni sahalak parkarejo sataon. Dung i diusehon si Maria ma miak i tu ulu dohot tu pat ni Jesus. Jala obukna ma dibahen mangapusi. Gabe angur ma sude jabu i.

Muruk ma angka sisean jala didok ma, “Boasa dipambolongkon miak i!” (Markus 14:4) Didok si Judas Iskariot ma muse, “Boasa ndang digadis miak na angur i saarga 300 dinar jala dilehon tuhorna i tu na pogos?” (Johannes  12:5) Ndang na tutu asi roha ni si Judas tu na pogos. Alai asa boi do i buatonna, ai nunga jotjot ibana manangko hepeng sian poti panimpanan ni hepeng.

Alai didok Jesus ma, “Boasa gugaanmuna borua on? Ulaon na denggan do na binahenna i tu ahu. Sai na adong do halak na pogos rap dohot hamu, alai ndang sai rap hamu dohot ahu. Ai diusehon borua on pe miak i tu dagingku, na laho paradehon tu ari panguburanku do i. Tutu do na hudok on tu hamu, manang didia pe barita na uli dibaritahon di liat portibi on, hatahononna do nang na binahen ni borua on songon parningotan di ibana.”​—Mateus 26:10-13.

Sadari dope Jesus di Betania. Alai pintor diboto halak do harorona i. Marroan ma torop halak Jahudi tu jabu ni si Simon. Ndang holan naeng mangida Jesus, alai dohot do naeng mangida si Lasarus “naung pinahehena sian na mate”. (Johannes 12:9) Gabe marsangkap ma angka malim kepala laho mambunu Jesus dohot si Lasarus. Ai didok nasida, gabe godang do na porsea tu Jesus alani haheheon ni si Lasarus. Jahat situtu do nasida!