Ari Sabtu tanggal 9 Nisan ma marsogotna i. Borhat ma Jesus dohot angka siseanna sian Betania tu Jerusalem. Dung lam jonok nasida tu Betpage na di Dolok Jetun, didok Jesus ma tu dua siseanna:

“Laho ma hamu tu huta na di jolo an, jumpangmuna ma disi sada halode na tartambat rap dohot anakna. Bungka ma talina i jala boan ma duansa tu ahu. Molo adong na manungkun tu hamu, dok hamu ma, ‘Na porlu do i di Tuan i.’ Dung i, pintor loasonna do hamu mamboan i.”​—Mateus 21:2, 3.

Ndang diantusi angka sisean i, naung disurirangkon do na didok Jesus i. Di pudian ni ari do diboto nasida naung disurirangkon si Sakaria i. Disurirangkon ibana do taringot raja na dijanjihon Debata, “na serep do rohana jala marsihundul di halode dohot di anak ni halode” tu Jerusalem.​—Sakaria 9:9.

Dung i laho ma angka sisean tu Betpage jala dibuat nasida ma halode i dohot indukna. Disungkun angka halak na jongjong disi ma, “Boasa dipalua hamu halode i?” (Markus 11:5) Alai dung diboto nasida na dipangido Jesus do halode i, diloas nasida ma i diboan angka sisean. Dipeakhon angka sisean ma abit luar ni nasida tu halode i dohot tu dalan. Dung i, nangkok ma Jesus tu halode i.

Lam torop ma halak tingki masuk Jesus tu Jerusalem. Godang na pahembangkon pangkean ni nasida di dalan. Na deba nai “mamonggoli ranting ni hau sian ladang” jala dibahen ma i di dalan. Didok nasida ma, “Sai lehon ma haluaon! Dipasu-pasu ma na ro di bagasan goar ni Jahowa! Dipasu-pasu ma Harajaon ni amangta si Daud na laho ro!” (Markus 11:8-10) Gabe muruk ma halak Parise mambege i. Didok nasida ma tu Jesus, “Guru, suru ma asa sip angka siseanmi.” Dialusi Jesus ma, “Hudok ma tu hamu, molo sip pe nasida, angka batu on ma na jou-jou.”​—Lukas 19:39, 40.

Diandungi Jesus ma Jerusalem jala didok ma, “Aut na diboto ho dalan tu hadameon di tingki on, alai saonari nunga ditabunihon be i sian matami.” Laho diuhum do Jerusalem ala ndang dioloi nasida Debata. Didok Jesus ma muse, “Pajongjongon ni musum ma partahanan sian angka hau na pinsur jala halianganna ma ho, sosahonna ma ho sian humaliang. Padosdoson ni nasida ma ho tu tano jala ripashononna ma ianakhonmu. Ndang na laho tadingkonon ni nasida di hamu nanggo sada batu pe na martindi.” (Lukas 19:42-44) Masa ma na nidok ni Jesus i, tingki ditaluhon musu Jerusalem taon 70 M.

Tingki masuk Jesus tu Jerusalem, “gaor ma kota i”. Ninna angka jolma na disi ma, “Ai ise do i?” Dipandok nasida ma, “On ma Jesus, panurirang na sian Nasaret di Galilea!” (Mateus 21:10, 11) Adong do sian nasida na mangida tingki dipahehe Jesus si Lasarus. Nasida ma na paboa-boahon i tu angka halak. Gabe marsak ma halak Parise jala didok ma, “Sude do portibi on mangihuthon ibana.”​—Johannes 12:18, 19.

Dung masuk Jesus tu Jerusalem, mangajari ma ibana di bagas joro songon na somal. Dipamalum ma na mapitung dohot na pangpang. Gabe muruk ma angka malim kepala dohot siboto surat dung diida nasida i jala dibege nasida angka dakdanak na sai mandok, “Sai lehon ma haluaon tu Anak ni si Daud!” Didok angka pamimpin agama i ma tu Jesus, “Dibege ho do na nidok ni nasida i?” Dialusi  Jesus ma, “Hubege. Na so hea do dijaha hamu, ‘Dibahen ho do pamangan ni angka dakdanak dohot angka poso-poso pasahathon puji-pujian’?”​—Mateus 21:15, 16.

Ditatap Jesus ma sude na di humaliang ni bagas joro. Nunga botari tingki i, laho ma ibana dohot angka apostelna tu Betania. Disi ma nasida marborngin di ari Minggu andorang so tanggal 10 Nisan.