Laho ma Jesus rap dohot siseanna na opat i “marbarita tu angka sinagoga di sude luat Galilea”. Tingki i, nunga tarsar barita taringot tu Jesus tu sude inganan. (Markus 1:39) Adong ma sahalak na marsahit kusta. Dibege ibana ma tanda halongangan manang mukjizat na binahen ni Jesus. Si Lukas sahalak dokter paboahon ‘gok kusta’ do daging ni baoa i. (Lukas 5:12) Boi do gabe habis ruas ni daging ni na marsahit kusta i molo dipasombu-sombu kustana i.

Posi do sahit ni baoa on jala ingkon dao do ibana maringanan. Molo adong halak na jonok tu ibana, ingkon gogo do dohononna, “Na ramun, na ramun!” Asa mandao angka jolma jala asa unang hona sahitna i tu nasida. (3 Musa 13:45, 46) Alai aha do dibahen na marsahit kusta i tingki diida Jesus? Ro ma ibana mandapothon Jesus jala marsinggang ma ibana huhut didok, “Tuan, molo olo ho, boi do ahu malum bahenonmu.”​—Mateus 8:2.

Balga do haporseaon ni baoa i tu Jesus! Tontu, asi do roha mangida baoa i alani sahitna i! Molo disi hamu, aha do bahenonmuna? Songon dia do pangkilalaan ni Jesus mangida i? Asi ma roha ni Jesus, jala dijama ibana ma tangan ni baoa i. Didok Jesus ma, “Olo do ahu, malum ma ho.” (Mateus 8:3) Laos satongkin i, mago ma kustana i.

Songon dia do pangkilalaanta mangida raja na marasi ni roha jala na marhuaso songon Jesus? Cara ni Jesus maradophon na marsahit i, paposhon rohanta molo dung marhuaso Jesus gabe Raja tu tano on, saut ma surirang ni Bibel na mandok, “Asi do rohana tu angka na pogos dohot na gale, dipangolu ibana do angka na hurangan.” (Psalmen 72:13, Bibel Siganup Ari.) Tutu, las do roha ni Jesus mangurupi sude halak na marsitaonon.

Taingot ma, nunga tarsar barita taringot tu Jesus andorang so dipamalum na marsahit kusta i. Alani i, lam godang ma saonari na mambege tanda halongangan na binahenna. Alai, ndang olo Jesus gabe porsea jolma tu ibana holan alani barita na binege ni nasida. Diboto Jesus do surirang na mandok “ndang patubegehononna soarana di alaman”. Alani i, ndang paboa-boaon ni Jesus na binahenna. (Jesaya 42:1, 2) Didok Jesus do tu na marsahit kusta i, “Unang paboa manang tu ise pe. Alai laho ma ho, patudu ma dirim tu malim, jala pasahat ma silehon-lehon songon na nidok ni si Musa.”​—Mateus 8:4.

Bayangkon ma songon dia las ni roha ni baoa i. Alani las ni rohana, dipaboa-boa ibana ma tu sude halak na masa tu ibana. Alani i, godang ma halak na mangalului Jesus. Gabe ndang boi be Jesus masuk tu kota. Ujungna, laho ma Jesus tu inganan na buni. Nang pe songon i, sai ro dope halak sian sude inganan laho mambege hatana jala asa dipamalum.