Adong do halak na olo manjalo hata ni Jesus, jala adong do na so olo manjalo. Tarida ma i sian na masa di Galilea. Adong ma halak Parise na margoar si Simon. Ditogihon ibana do Jesus mangan tu jabuna. Ra naeng do botoonna godang taringot tu Jesus. Alana, diboto ibana do godang mukjizat manang tanda halongangan dibahen Jesus. Ro do Jesus tu jabuna jala tingki na denggan do i di ibana laho marbarita. Di tingki na salpu pe, hea do Jesus mangan dohot angka sijalo pajak, nang angka pardosa.

Di Palestina, somal do jolma marsolop manang na tu dia pe. Alani i, kotor do pat ni nasida jala mohop. Molo ro tamu, jolo disunsi parjabu do pat ni nasida, diumma jala dibahen do miak tu obuk ni tamu i. On patuduhon na las do roha ni parjabu i tu tamu na ro i. Alai ndang songon i dibahen si Simon tu Jesus. Ndang disunsi ibana pat ni Jesus, ndang diumma jala ndang dibahen ibana miak tu obukna.

Di tingki na mangan i nasida, ro ma sipsip sahalak borua. Alai ndang dohot ibana ditogihon tusi. “Ditanda [do ibana] di kota i sahalak pardosa.” (Lukas 7:37) Tutu, sude do jolma mardosa. Alai didok do ibana “pardosa”, ra ala boru-boru na so hasea do ibana. Ra nunga dibege ibana ajaran ni Jesus, dohot ma i hata ni Jesus na mandok “Ro ma hamu tu ahu, hamu angka na loja jala na mamboan boban na borat, asa hupargogoi hamu.” (Mateus 11:28, 29) Alani i do ra, umbahen na dilului ibana Jesus.

Ro ma ibana tu lambung ni Jesus jala marsinggang ma ibana di patna. Maraburan ma iluna tu pat ni Jesus, jala diapus do i dohot obukna. Diumma ibana do pat ni Jesus jala dibahen do miak na angur. Tingki diida si Simon na binahenna i, didok ibana ma di bagasan rohana, “Molo na tutu ibana sahalak panurirang, botoonna do ise borua i jala borua na songon dia na manjama ibana i, ai sahalak pardosa do borua i.”​—Lukas 7:39.

Diboto Jesus do na di bagasan roha ni si Simon. Didok Jesus ma, “Simon, adong naeng hudok tu ho.” Dialusi si Simon ma, “Hatahon ma Guru!” Didok Jesus ma muse, “Adong ma dua halak na marutang tu sasahalak na papinjamhon hepeng. Na sada marutang 500 dinar jala na asing 50 dinar. Ala ndang adong bahenon ni nasida laho manggarar, dipalua ma nasida na dua. Alani i, na dia ma sian nasida na humolong rohana tu parutanganna i?” Didok si Simon ma, “Huhilala halak na gumodang i ma utangna.”​—Lukas 7:40-43.

Sapandapot do Jesus tu alusna i. Dung i, didok Jesus ma tu si Simon, “Diida ho do borua on? Ro ahu tu jabum, ndang dilehon ho aek manunsi pathu. Alai borua on, ditonui do pathu dohot iluna jala diapusi dohot obukna. Ndang diumma ho ahu laho manjalo ahu, alai borua on sai diumma do pathu sian mulai masuk tu jabu on.” Sian parniulaon ni borua i, boi ma diboto Jesus naung manolsoli ibana. Alani i, didok Jesus ma muse, “Hudok ma tu ho, nunga disesa be dosana na godang i, alani i ma mansai balga holongna. Ai manang ise na otik dosana disesa, otik do holongna.”​—Lukas 7:44-47.

Ndang na gabe lomo roha ni Jesus tu hasalaan ni borua i. Alai asi do roha ni Jesus tu halak na manolsoli jala na mangido pangurupionna. Nang pe nunga diulahon borua i dosa na balga. Tontu tarapul do roha ni borua i tingki didok Jesus, “Nunga disesa be angka dosam. . . . Haporseaonmi do paluahon ho. Mulak ma ho di bagasan dame.”​—Lukas 7:48, 50.