Nunga diboto si Petrus poda na ingkon ulahonon ni nasida molo marsoal nasida dohot donganna. Alai saonari, naeng botoon ni si Petrus do ingkon piga hali do nasida manalpuhon hasalaan ni dongan.

Disungkun si Petrus ma, “Tuan, molo adong donganku na marsala tu ahu, piga hali do sesaonku hasalaanna? Sahat tu pitu hali do?” Di tingki i didok angka pamimpin agama, sae do holan tolu hali manalpuhon hasalaan. Alani i, nunga burju dihilala si Petrus molo sahat tu “pitu hali” ibana manalpuhon hasalaan ni donganna.​—Mateus 18:21.

Alai, ndang songon i na diajarhon Jesus. Didok do tu si Petrus, “Hudok ma tu ho, ndang pitu hali alai sahat tu 77 hali do.” (Mateus 18:22) Lapatanna, unang ma taetong piga hali hita manalpuhon hasalaan ni dongan, alai sai rade ma hita manalpuhon hasalaan.

Laho mangajari si Petrus, dipaboa Jesus ma sada tudosan taringot tu sahalak hatoban na so maniru asi ni roha ni sahalak raja. Marutang do hatoban i 10.000 talenta [60 juta dinar] tu raja i. Utang na balga do on, jala ndang tolap hatoban i manggarar i. Alani i, disuru raja i ma asa dijual hatoban i, tunggane boruna, dohot anakkonna. Alai marsinggang ma hatoban i tu tuanna i, ninna ma, “Sabar ma jo ho tuan, hugarar pe sude utangki.”​—Mateus 18:26.

Asi ma roha ni raja i jala disesa ma utang ni hatoban i. Alai tingki laho mulak hatoban i, pajumpang ma ibana dohot donganna hatoban. Marutang do donganna i 100 dinar tu ibana. Pintor ditarik ibana ma donganna i jala disongkik. Ninna ma, “Garar sude utangmi.” Alai marsinggang ma donganna i, ninna ma, “Sabar ma jo ho, hugarar pe sude utangki.” (Mateus 18:28, 29) Alai ndang asi roha ni hatoban i. Ndang  ditiru ibana raja na marasi ni roha i. Dipenjarahon ibana ma donganna hatoban i sahat tu na digarar utangna i. Hape ummotik do utang ni donganna i sian utangna tu raja i.

Diida hatoban na asing do na masa i, gabe dipaboa ma tu raja. Muruk ma raja i, dijou ibana ma hatoban na so marasi ni roha i, jala ninna ma, “Hatoban na jahat do ho, husesa do saluhut utangmu dung mangelek-elek ho tu ahu. Nda ingkon asi do nian roham tu donganmu hatoban songon ahu na marasi ni roha tu ho?” Dipenjarahon raja i ma hatoban i sahat tu na boi digarar ibana utangna. Dung i didok Jesus ma, “Songon i ma bahenon ni Damang na di banua ginjang i tu hamu, molo ndang disesa hamu hasalaan ni donganmuna sian rohamuna.”​—Mateus 18:32-35.

Sian tudosan i, taboto ma mansai ringkot do manalpuhon hasalaan! Nunga disesa Debata dosanta dos songon utang na balga. Alani i, sadia godang pe hasalaan ni donganta tu hita, ndang sadia i martimbangkon dosanta tu Debata. Ndang holan sahali Debata manesa dosanta, alai marribu-ribu hali. Nda ingkon tatiru ma Debata? Sai tasalpuhon ma hasalaan ni donganta nang pe hansit rohanta dibahen. Ai songon jamita ni Jesus di dolok, sesaon ni Debata do dosanta molo tasesa dosa ni halak na mardosa tu hita.​—Mateus 6:12.