Hira-hira sataon ma si Johannes Pandidi di penjara. Nunga dibege ibana angka tanda halongangan manang mukjizat na binahen ni Jesus. Tontu las do rohana tingki diboto naung dipahehe Jesus anak ni ina na mabalu di huta Nain. Alai naeng do begeonna langsung sian Jesus na ibana do Messias i manang ndang. Alani i, dijou ibana ma dua siseanna laho manjumpangi Jesus jala manungkun, “Ho do na laho ro i, manang paimaonnami dope na asing?”​—Lukas 7:19.

Boasa disungkun si Johannes songon i? Na hurang pos do rohana? Tingki tardidi Jesus dua taon naung salpu, nunga diida si Johannes songgop tondi parbadia ni Debata tu Jesus. Jala dibege si Johannes do soara ni Debata di tingki i. Tontu ndang boi tadok na gale do haporseaon ni si Johannes. Alana dipuji Jesus do si Johannes. Antong, aha do lapatan ni sungkun-sungkun ni si Johannes i?

Ra, lomo do roha ni si Johannes molo langsung Jesus na mandok na ibana do Messias i. Boi do on patoguhon rohana saleleng di penjara. Asing ni i, adong do ra naeng botoonna sian alus ni sungkun-sungkun i. Ai diboto ibana do angka surirang na mandok na laho gabe Raja jala Sipalua do Messias i. Hape piga-piga bulan dung tardidi Jesus, dipenjara do si Johannes. Alani i, ringkot do botoon ni si Johannes atik na adong do halak na asing na laho pasauthon sude surirang taringot tu Messias.

Ndang pintor didok Jesus tu angka sisean ni si Johannes i, ‘Tutu ahu do Messias i.’ Alai dipatuduhon ibana do tu nasida na Debata do na marsuru ibana, marhite pamalumhon na marsahit. Dung i didok ibana ma tu sisean ni si Johannes i, “Laho ma hamu jala paboa ma tu si Johannes naung binegemuna dohot naung niidamuna i. Na mapitung boi marnida, na pangpang boi mardalan, na hona kusta dipamalum, na nengel marbinege, na mate dipangolu jala barita na uli dibaritahon tu halak na pogos.”​—Mateus 11:4, 5. 

Taboto ma sian sungkun-sungkun ni si Johannes i, ra lomo do rohana asa lam godang tanda halongangan na binahen ni Jesus, dohot ma i paluahon ibana sian penjara. Alai didok Jesus ma asa unang hirim roha ni si Johannes bahenonna gumodang tanda halongangan.

Dung laho angka sisean ni si Johannes, didok Jesus ma tu angka jolma i, umsangap do si Johannes sian angka panurirang na asing. Ibana do “suruan” ni Jahowa na dipaboa di Maleaki 3:1. Jala ibana do panurirang Elia na didok di Maleaki 3:23, 24. Jesus mandok, “Situtu do na hudok on tu hamu, ndang adong na tinubuhon ni borua na umbalga sian si Johannes Pandidi, alai na ummetmet di Harajaon banua ginjang i, umbalga do sian ibana.”​—Mateus 11:11.

Didok, “na ummetmet di Harajaon banua ginjang i, umbalga do sian” si Johannes.  Lapatanna, ndang na laho mangolu di surgo si Johannes Pandidi. Diparade ibana do dalan tu Jesus, alai mate do ibana andorang so dipungka Kristus dope dalan tu surgo. (Heber 10:19, 20) Nang pe songon i, panurirang na setia do si Johannes. Mulak mangolu do ibana haduan di tano on, gabe rayat ni Harajaon ni Debata.