Di Betania, adong tolu dongan ni Jesus. Goarna i ma si Lasarus, dohot dua itona si Maria, dohot si Marta. Tingki i, di seberang Sunge Jordan do Jesus. Disuru si Maria dohot si Marta ma halak paboahon barita tu Jesus, ‘Hatop jo ho ro. Parah hian sahit ni si Lasarus.’ Alai ndang langsung lao Jesus. Dung dua ari pe asa diajak Jesus angka muridna tu Betania. Didok ibana ma, ‘Beta ma hita tu Betania, asa hudungoi jo si Lasarus. Ai modom ibana.’ Didok angka muridna i ma, ‘Malum do sahitna i molo modom ibana.’ Gabe didok Jesus ma, ‘Nunga mate si Lasarus.’

Tingki sahat Jesus di Betania, nunga opat ari si Lasarus dikubur. Godang do jolma na ro menghibur si Maria dohot si Marta. Dung diboto si Marta naung ro Jesus, dijumpangi ibana ma Jesus. Ninna ma, ‘Molo dison hian ho, ndang mate itoki.’ Didok Jesus ma, ‘Boi do mangolu muse itomi. Porsea do ho?’ Dialusi si Marta ma, ‘Porsea do ahu mangolu ibana muse di ari haheheon.’ Didok Jesus ma, “Ahu do haheheon dohot hangoluan.”

Dipaboa si Marta ma tu si Maria, ‘Nunga ro Jesus.’ Lari ma si Maria mandapothon Jesus, jala godang do na mangihuthon ibana. Marsomba ma ibana tu pat ni Jesus jala tangis. Ninna ma, ‘Molo dison hian ho Tuan, ndang mate itoki!’ Gabe dohot ma Jesus tangis ala diida si Maria tangis-tangis. Godang do na mangida Jesus tangis. Didok nasida ma, ‘Holong hian do rohana tu si Lasarus ate.’ Alai adong do muse na mandok, ‘Boasa dipasombu ibana mate donganna i?’ Aha ma na dibahen Jesus?

Laho ma Jesus tu kuburan ni si Lasarus. Adong do batu na balga na manutup kuburan i. Didok Jesus ma, ‘Geser hamu ma batu i.’ Alai didok si Marta ma, ‘Nga opat ari ibana dikubur! Nga bau be i.’ Alai digeser nasida do batu i. Dung i martangiang ma Jesus, ninna ma, ‘Mauliate ma Amang, sai ditangihon Ho do ahu. Alai hudok pe songon i, asa diboto halak on do, na Ho manuru ahu.’ Dung i gogo  ma didok Jesus, ‘Lasarus, kaluar ma ho!’ Kaluar ma si Lasarus. Dibungkus kain dope dagingna. Didok Jesus ma, ‘Bungka hamu ma kain i, asa boi ibana mardalan.’

Gabe godang ma halak na porsea tu Jesus dung diida nasida na masa i. Alai adong do na paboahon i tu halak Parise. Gabe naeng dibunu halak Parise ma Jesus dohot si Lasarus. Dung i, laho ma sada murid ni Jesus manjumpangi halak Parise, i ma si Judas Iskariot. Ninna ma, ‘Molo huurupi hamu manangkup Jesus, sadia ma lehononmuna di ahu?’ Setuju ma nasida mangalehon 30 keping perak. Mulai sian i, sai dilului si Judas ma cara asa boi Jesus ditangkup halak Parise.