Tanggal 14 Nisan ganup taon, dirayahon halak Jahudi do Paska. Diingot nasida ma, hatoban hian do nasida di Mesir. Alai dipalua Debata do nasida sian Mesir jala diboan tu tano Kanaan. Taon 33 M, dirayahon Jesus ma Paska dohot angka muridna na 12 i di sada kamar di Jerusalem. Di perayaan i didok Jesus ma, ‘Adong do sada sian hamu na naeng menghianati ahu.’ Gabe tarsonggot ma angka muridna. Disungkun nasida ma, ‘Ise Tuan?’ Didok Jesus ma, ‘Na manjalo roti on sian ahu.’ Dilehon Jesus ma roti tu si Judas Iskariot. Dung i laho ma si Judas sian kamar i. 

Dung ditangiangkon Jesus roti i, diponggoli ma i jala dilehon tu angka muridna. Didok ibana ma, ‘Allang hamu ma. Roti on manggombarhon dagingku, na hulehon laho manobus hamu.’ Dung martangiang muse, dilehon Jesus ma anggur tu angka muridna i. Didok ma, ‘Inum hamu ma. Anggur on manggombarhon mudarhu na manesa dosamuna. Ingot hamu ma janjikon, gabe raja ma hamu rap dohot ahu di surgo. Bahen hamu ma perayaan on ganup taon.’ Saonari, didok do perayaan on Parningotan Hamamate ni Jesus.

 Dung sae perayaan i, marbadai ma angka murid i laho mamboto ise do na umjago sian nasida. Gabe didok Jesus ma, ‘Manang ise na umjago, ingkon olo do mengalah.

‘Hamu do angka donganku. I do alana hupaboa tu hamu sude na hubege sian Ama i. Tongkin nai laho nama ahu tu Ama i. Alai tinggal dope hamu di tano on. Alani i, marsihaholongan ma hamu songon ahu na mangkaholongi hamu. Asa diboto halak na muridhu hamu.’

Ditangiangkon Jesus ma asa dijaga Jahowa angka muridna, jala asa mardame nasida. Ditangiangkon Jesus do muse asa badia goar ni Jahowa. Marende ma nasida mamuji Jahowa. Sae i, laho ma nasida sian inganan i. Tongkin nai nama Jesus ditangkup.