Nunga naeng 40 taon halak Israel di padang belantara. Nunga godang kota ditaluhon nasida. Saonari, berkemah ma nasida di Moab di timur ni Sunge Jordan. Satongkin nai, sahat nama nasida tu Tano na Dijanjihon. Mabiar do si Balak raja ni Moab molo dibuat halak Israel tano ni nasida. Alani i, dijou ibana ma sahalak baoa na margoar si Bileam tu Moab laho mamburai manang mangutuki halak Israel.

Alai didok Jahowa ma tu si Bileam, ‘So tung olo ho mangutuki halak Israel.’ Alani i, ndang laho si Bileam. Dijou Raja Balak ma ibana padua halihon. Marjanji do Raja Balak laho mangalehon sude pangidoan ni si Bileam. Alai, ndang olo si Bileam. Dung i didok Debata ma, ‘Laho ma ho, alai holan hata na Hupaboa do na ingkon sidohononmu.’

Naik ma ibana tu keledaina jala lao ma ibana tu kota Moab naeng mangutuki halak Israel. Hape nunga dipasingot Jahowa ibana. Tingki di dalan dope, tolu hali ma ro suru-suruan manang malaikat ni Jahowa tu ibana. Alai, ndang diida si Bileam i. Holan keledaina i do na mangida. Kaluar ma keledaina i sian dalan naeng masuk tu ladang. Dung i dihapithon keledai i ma dagingna tu tembok ni dalan i, gabe tarhapit ma pat ni si Bileam. Ujungna, hundul ma keledai i di tonga dalan. Sai dipungkuli si Bileam do keledai i pangke tungkot.

Dung tolu hali dipungkuli, dibahen Jahowa ma mangkatai keledai i. Didok keledai i ma tu si Bileam, ‘Boasa sai dipungkuli ho ahu?’ Didok si Bileam ma, ‘Gabe hira na oto do ahu dibahen ho. Molo adong podangku, nunga hupamate ho.’ Didok keledai i ma muse, ‘Nunga martaon-taon ahu rap dohot ho. Hea do hubahen songon on tu ho?’

Dung i, dibahen Jahowa ma si Bileam boi mangida suru-suruan i. Didok suru-suruan i ma, ‘Nunga dipasingot Jahowa ho asa unang mangutuk halak Israel.’ Didok si Bileam ma, ‘Nunga sala hape ahu,  mulak nama ahu.’ Alai didok suru-suruan i ma, ‘Laho ma ho tu Moab. Alai holan hata ni Jahowa ma paboa.’

Muba do si Bileam dung masa i? Daong. Dikutuk si Bileam do halak Israel tolu hali. Alai, dibahen Jahowa do i gabe pasu-pasu. Ujungna, diporangi halak Israel ma halak Moab. Jala mate ma si Bileam disi. Aut sugari ditangihon si Bileam hata ni Jahowa, ndang mate ibana kan?