Tingki di Dolok Sinai si Musa, disuru Jahowa ma ibana mambahen kemah na digoari tabernakel. Tabernakel, i ma inganan ni bangso Israel laho manomba Jahowa. Boi do diboan tabernakel on molo pinda nasida.

Didok Jahowa ma, ‘Pangido ma tu bangso i asa dilehon nasida angka na porlu laho mambahen tabernakel.’ Dilehon halak Israel ma mas, perak, tombaga, batu na arga, dohot perhiasan. Dilehon ma muse bonang wol, linen, kulit ni binatang, dohot angka na asing. Alani godangna, didok si Musa ma, ‘Unang be lehon hamu. Nunga sae be.’

Godang do muse baoa dohot borua na malo, na dohot mangurupi mambahen tabernakel. Diurupi Jahowa do nasida asa lam malo. Adong na mambahen bonang, abit, dohot manulam. Na asing mamasang batu, mambahen barang sian mas dohot mamahat hau.

Dibahen nasida do tabernakel i pas songon na dipangido Jahowa. Dibahen ma tirai na bagak na mambagi dua tabernakel i. Na sada ruang Kudus dohot na sada nai ruang Maha Kudus. Di ruang Maha Kudus, adong tabut perjanjian na dibahen sian hau akasia dohot sian mas. Tabut perjanjian on mambahen halak Israel mangingot janji ni nasida asa unduk tu Jahowa. Di ruang Kudus, adong inganan ni lampu na sian mas dohot meja. Di halamanna, adong bak sian tombaga dohot mezbah na balga.

 Dipillit Jahowa ma si Aron dohot angka anakna gabe malim. Nasida ma na marhobas di tabernakel. Ingkon diurus nasida do tabernakel i jala nasida do na mangalehon persembahan tu Jahowa. Ala si Aron do sintua ni malim, holan ibana ma na boi masuk tu ruang Maha Kudus. Sahali sataon do ibana masuk tusi. Disi ma ibana mangalehon persembahan asa disesa Jahowa dosana, dosa ni keluargana, dohot dosa ni bangso Israel.

Dung sataon kaluar sian Mesir, sae ma tabernakel i. Adong ma inganan ni nasida manomba Jahowa.

Las do roha ni Jahowa mangida tabernakel i. Dibahen Jahowa ma awan di ginjang ni tabernakel i. Molo adong awan i, tongtong ma halak Israel berkemah disi. Alai molo nangkok do awan i, pinda ma halak Israel sian perkemahan i. Dibongkar nasida ma tabernakel i jala diihuthon nasida ma awan i.