Sian jandela ni istanana di Jisreel, diida Raja Ahab ma ladang anggur ni si Nabot. Lomo roha ni si Ahab mangida ladang i. Alani i, naeng dituhor ma i sian si Nabot. Alai ndang olo si Nabot manjual i. Alana mangihuthon Patik ni Jahowa, ndang boi halak Israel manjual tano warisan ni nasida. Songon dia do pandapot ni si Ahab disi? Sogo hian ma rohana. Gabe ndang boi ibana modom jala ndang olo mangan.

Mansai jahat do istri ni si Ahab, i ma Ratu Izebel. Didok ma tu si Ahab, ‘Ho do raja ni Israel. Boi do buatonmu aha pe na lomo ni roham. Jala boi do bahenonku asa di ho tano i.’ Dibahen ibana ma surat tu angka baoa na marhuaso di kota i. Didok ibana ma di surat i asa margabus angka baoa i jala mandok nunga dileai si Nabot Debata. Alani i, ingkon dipamate do ibana. Diulahon angka baoa i do i. Didok si Izebel ma tu si Ahab, ‘Nunga mate be si Nabot. Saonari ho ma nampuna ladang anggur i.’

Ndang holan si Nabot na hea dibunu si Izebel. Godang do halak na mangoloi Jahowa na dibunu ibana. Patung do disomba ibana, jala sai mangulahon na jahat do ibana. Diida Jahowa do hajahatonna i. Aha do na dibahen Jahowa tu ibana?

Dung mate si Ahab, anakna si Joram ma na gabe raja. Disuru Jahowa ma sahalak baoa na margoar si Jehu laho pamatehon si Izebel dohot keluargana.

Laho ma si Jehu tu Jisreel manjumpangi si Izebel. Pajumpang ma si Joram dohot si Jehu jala didok si Joram ma, ‘Adong do dame di hita?’ Dialusi si Jehu ma, ‘Ndang adong dame saleleng diulahon omakmu si Izebel dope angka na jahat.’ Pintor naeng ditinggalhon si Joram ma si Jehu. Alai pintor dipanah si Jehu ma si Joram, jala mate ma ibana.

 Laho ma si Jehu tu istana ni si Izebel. Tingki dibege si Izebel na ro si Jehu, pintor marbadak ma ibana, disuri obukna, jala hundul di jandela na di ginjang. Dung sahat si Jehu, didok si Izebel ma hata na so denggan tu ibana. Didok si Jehu ma tu hatoban ni si Izebel na jongjong di lambungna, ‘Dabuhon ibana tu toru!’ Dionjarhon ma si Izebel sian jandela i, dabu ma ibana dung i mate.

Dungkon i, dibunu si Jehu ma muse 70 anak ni si Ahab. Jala dibolongkon ma angka patung na adong di huta i. Dipamate ma angka na manomba patung i. Diida Jahowa do sude na masa i jala dihukum na mangulahon na jahat.