Rimangi ma situasi on: Ndang olo be si Tomas marsingkola. Alana, tolu bulan naung salpu, didok angka donganna hata na so tutu taringot ibana. Dibahen do gelarna di singkola. Sipata, adong ma na mandabuhon bukuna, manang tingki rame adong ma sahalak na mangonjar ibana asa madabu. Alai, tingki diida si Tomas tu pudi, ndang adong na mangakkui. Nantoari, lam jungkat ma angka na mangarehei ibana, diulahon nasida ma on marhite internet . . .

Molo hamu gabe si Tomas, aha do na laho ulahononmu?

Ndang na so boi dialo hamu nasida! Boi do hamu marbisuk mangadopi si pangarehei. Boha do carana?

•   UNANG ALUSI. Bibel paboahon, ”Dipapuas halak na oto do murukna, alai sabar do halak na bisuk jala dipaulak do i tu bagasan rohana.” (Poda 29:11, Bibel siganup ari) Molo sai sip do hamu, gabe ndang olo be nasida mangarehei hamu.

• UNANG BALOS. Bibel paboahon, ”Unang baloshon hamu na jat alo ni na jat.” (Rom 12:17) Ndang adong lapatanna molo dibalos hamu pambahenan nasida.

• UNANG JONOHI. Bibel paboahon, ”Diida halak na bisuk do jea i ro, gabe laho martabuni.” (Poda 22:3) Molo boi, pasiding ma angka halak na olo mangarehei, jala pasiding ma inganan na boi mambahen hamu direhei.

• LAMBOK MA MANGALUSI. Bibel paboahon, ”Alus na lambok paombun rimas.” (Poda 15:1) Boi do hamu margaitgait. Umpamana, molo direhei hamu alani mokmokmuna, dok ma, ”Nga moru be on!”

• LAHO MA SIAN I. Si Nora na marumur 19 taon mandok, ”Molo hohom do hita, on patuduhon na gumogo do hita sian si pangarehei. Jala on patuduhon hita boi mangorom diri, parange na so adong di si pangarehei.”​—2 Timoteus 2:24.

• PERCAYA DIRI MA. Diboto si pangarehei do ise halak na so percaya diri jala ise halak na mabiar tu nasida. Alai, molo ndang tapaloas hita digugai, ndang olo be nasida mangarehei.

• PABOA TU SASAHALAK. Sahalak guru mandok, ”Hutogihon do angka murid asa mangkatai tu ahu molo adong na mangarehei nasida. On ma na dumenggan, jala mangurupi nasida asa dao sian si pangarehei.”