TU NATUA-TUA
6: Disiplin
LAPATANNA
Disiplin, lapatanna mangurupi manang mangajari. Sipata didisiplin natua-tua do ianakkonna molo mangulahon na sala. Disiplin, termasuk ma i mangurupi ianakkotta lao mambahen keputusan na denggan.
BOASA PENTING ON
Piga-piga taon na parpudi on, godang do natua-tua dang mendisiplin ianakkonna. Didok roha ni nasida molo didisiplin ianakkonna gabe dang percaya diri be ianakkonna i. Alai, natua-tua na marbisuk dibahen do aturan na masuk akkal jala dilatik do ianakkonna asa mangihutton aturan na dibahen.
“Asa boi gabe halak na dewasa jala martanggung jawab ianakkotta, ikkon dibahen do batasan. Molo dang adong disiplin, boi do ianakkotta i songon kapal na so adong setirna. Kapal i boi gabe sala arah manang balik.”—Si Pamela.
NA BOI DIULAHON HAMU
Ulahon ma aha naung didok hamu. Molo dang diihutton ianakkonmuna aturan na dibahen hamu, bahen ma hukuman tu nasida. Alai molo diihutton do puji ma nasida.
“Saonari on godang do halak na olo mangalo. Alani i, jotjot do hupuji ianakkokku alana sai dioloi nasida do hatakku. Molo dipuji nasida, gabe olo ma nasida manangihon tikki dipasingot.”—Si Christine.
NA DIDOK BIBEL: “Manang aha na disuan sasahalak, i do panenonna.”—Galatia 6:7.
Masuk akkal ma. Tikki mandisiplin ianakkonmuna hamu bahen ma disiplin i sesuai tu umur dohot kesanggupan ni nasida. Asing ni i, bahen ma disiplin sesuai tu sadia balga kesalahan na dibahen nasida. Uppamana, molo sai mar-HP do ianakkonmuna i, buat ma HP-na i. Jala unang loas ibana mar-HP piga-piga leleng.
“Tikki adong hasalaan na dibahen ianakkokku, hucoba do mangalului lao mamboto na sengaja do ibana manang na dang mambahen hasalaan i. Dang sarupa sipasingot na dilehon ala mangulahon kesalahan na gelleng dohot sipasingot na dilehon ala nungnga somal ibana mangulahon kesalahan i.”—Si Wendell.
NA DIDOK BIBEL: “Unang ma bahen jut roha ni ianakkonmuna, asa unang gabe marmetmet ni roha nasida.”—Kolosse 3:21.
Patuduhon holong. Ummura do dakdanak manjalo jala mangoloi disiplin na talehon molo diboto nasida alani holong ni rohatta do umbahen tabahen songon i.
“Tikki adong kesalahan na dibahen ianakkonnami, didok hami do tu nasida hea do dibahen nasida na denggan. Dipapos hami do roha ni ianakkonnami molo dipaboa ibana pe kesalahanna i, asa diboto hami do songon dia lao mangurupi ibana, dang na lao pailahon ibana. Didokkon hami do muse rade do hami mangurupi.”—Si Daniel.
NA DIDOK BIBEL: “Halak na marholong ni roha i sabar, burju.”—1 Korint 13:4.
