Ala dang lomo rohatta mangida halak na burju susa. Alani i adong na mandok, tu aha ma gabe halak na burju molo tong do susa.

Adong do halak porsea, molo susa sasahalak naung ditottuhon Debata do i. Jala didok nasida do hasusaan i, panguhuman sian Debata tu parjahat. Manang hasusaan i lao manguji haporseaon ni halak na burju. Lam godang do dilehon Debata hasusaan tu halak na dihaholongi Ibana. Molo songon i do . . .

• Boasa ma ikkon burju hita jala tajaga kesehatan, molo naung ditottuhon Debata hita ikkon susa?

• Boasa ma dibahen Debata hasusaan lao manguji haporseaon? Hape godang halak mandok burju jala parasi roha do Debata i.

  HATORANGAN TAMBAHAN

  Tonton ma video Boasa Dipaloas Debata Masa Hasusaan? di jw.org.

Hasusaan i dang panguhuman sian Debata.

Ise pe boi do susa. Sipata, olo do ala kejadian na so tarduga sasahalak gabe susa.

“Ndada di halak na gompis hape sanggul parlojongon, ndada di halak na begu haantuon, ndada di halak na pistar sagusagu, ndada di halak na marroha hamoraon, ndada di halak sigodang parbinotoan asi ni roha; tingki tahe dohot parsorion mangonai tu nasida luhutna.”​—PARJAMITA 9:11.

Alani mardosa do hita gabe susa.

Biasana akka halak mandok, sasahalak “mardosa” ala adong do na jahat na diulahon ibana. Alai di Bibel didok, nang na burju, na jahat, mardosa do sude.

“Pardosa do ahu sian hatutubungku, sian mulai adong ahu, nunga mardosa.”​—PSALMEN 51:7, Bibel siganup ari.

Ala nungnga sian na tubu mardosa, gabe susa ma hita.

Alani mardosa gabe sega ma hubunganta tu Debata dohot halak na asing. Ujungna gabe susa ma sude jolma.

“Tingki naeng huulahon na sintong, sai na jahat i do na adong di ahu.”​—ROM 7:21.

“Marhoi-hoi jala manaon hasusaan do sude na tinompa ni Debata sahat tu saonari.”​—ROM 8:22.