Adong do na manoppa alam semesta on?

Di 1 Musa 1:1 didok, “Di mula ni mulana ditoppa Debata ma langit dohot tano.”

Sebelum taon 1950, godang ilmuwan na terkenal porsea molo alam semesta on dang ditoppa. Alai sian hasil penelitian na baru, godang ilmuwan porsea molo alam semesta on adong do mulana manang ditoppa do i.

Songon dia do situasi ni portibi on tikki baru ditoppa?

Didok di 1 Musa 1:2, 9 najolo “kosong dope tano on” jala dang adong dope agia aha jala ditutupi aek.

Sarupa do hatorangan on tu hasil penelitian ilmu pengetahuan na terbaru. Ahli biologi si Patrick Shih mandok, “Mulana atmosfer di planetta on, dang mengandung oksigen . . . , [jala] dang songon na taida saonari isi ni planet on najolo.” Majalah Astronomy mandok, “Sian penelitian terbaru taringot situasi ni planet Bumi on mulana holan aek do di tano on. Jala hampir dang adong tarida tano.”

 Songon dia do atmosfer ni planetta on boi berubah?

Di 1 Musa 1:3-5 didok, tikki ditoppa na tiur dang boi dope i sahat tu tano on, ala dang boi dope ditembus cahaya i atmosfer. Alai dukkon dibahen mataniari dohot bulan, boi ma takkas diida songon dia tano on.​—1 Musa 1:14-18.

Menurut Smithsonian Environmental Research Center (SERC), dang boi dope cahaya na masuk tu tano on mambahen tiur, ala dang boi dope ditembus cahaya i atmosfer. Didok muse, “Kandungan metana na adong di udara manutupi sude tano on songon kabut. Alai dung ias kabut metana i, gabe balau ma langit.”

Makhluk hidup na dia do na parjolo ditoppa di tano on?

Didok di 1 Musa 1:20-27, parjolo do ditoppa dekke, dung i pidong, akka binatang na di darat, jala ujungna ditoppa ma jolma. Porsea do akka ilmuwan, dekke do na parjolo muncul jala nungnga leleng i adong sebelum muncul mamalia na parjolo. Jala leleng dukkon i pe adong jolma di tano on.

Piga-piga halak mandok, Bibel i dang sesuai tu penemuan ilmiah modern. Alai jotjot do muncul pandapot sisongon i ala sala paham nasida tu na diajarhon Bibel.

Dang adong didok di Bibel molo alam semesta manang tano on holan marumur 6.000 taon. Alai na dipaboa di Bibel, tano dohot alam semesta on ma na ditoppa “di mula ni mulana”. (1 Musa 1:1) Dang adong dipaboa Bibel secara spesifik nungnga sadia leleng adong tano dohot alam semesta on.

Dang adong didok di Bibel leleng ni sude na ditoppa di tano on, i ma 6x24 jom. Memang di 1 Musa didok do molo planet Bumi dohot sude isina ditoppa saleleng onom ari. Adong do halak menganggap onom ari penciptaan i sarupa tu 6x24 jom. Alai marasing-asing do arti ni hata “ari” na di Bibel, boi do jangka waktuna massai leleng. Misalna didok do di bagasan ‘sadari’ jangka waktu na dipakke Debata Jahowa * lao manoppa sude na di “langit dohot tano on”. (1 Musa 2:4) Jadi hata “ari” di penciptaan na onom ari boi do massai leleng jangka waktuna, dang 6x24 jom.

Dang adong dipaboa di Bibel molo makhluk hidup i dang boi berubah sian tikki tu tikki. Di bukku 1 Musa dipaboa do molo binatang na ditoppa i “marragam”. (1 Musa 1:24, 25) Hata “marragam” na di Bibel i dang sarupa tu hata “spesies” di istilah biologi jala hata on luas do lapatanna. Alani i, sada ‘ragam’ ni makhluk hidup boi do mencakup godang spesies manang jenis. Jala hatorangan on patuduhon sada ‘ragam’ ni makhluk hidup na mangolu di lingkungan na sarupa boi do menghasilkan variasi dohot spesies na berbeda-beda sian tikki tu tikki.

 Boha do menurut hamu?

Sian hatorangan na di ginjang i, boi ma taida adong do dipatorang di Bibel secara sederhana taringot mula ni alam semesta on, situasi ni tano on parjolo sahali, jala songon dia hangoluan di tano on. Jala akurat do hatoranganna i. Attong menurut hamu, adong do dipaboa di Bibel ise sasittongna na manoppa i sude? Encyclopædia Britannica mandok, “Hangoluan on terjadi sian sada sumber kekuatan na massai hebat jala sesuai do i tu hasil penemuan ni akka ilmuwan di jaman modern.” *