Nungnga marjanji halak naung marhasohotan lao marsihaholongan. Alai boasa boi gabe dang marsipakulingan nasida saleleng piga-piga jam manang piga-piga ari? Olo do ra didok roha ni nasida “pinomatna dang gabe marbadai be hami”. Alai sebenarna dang sae masalah molo dang marsipakulingan nasida, gariada gabe dang tabo be pakkilalaan ni nasida.

Balas dendam. Adong suami manang istri na so mamangkulingi pasanganna lao balas dendam. Misalna, adong ma sahalak suami na mambahen rencana liburan di ari Minggu alai dang jolo makkatai tu istrina. Dung diboto istrina i, gabe muruk ma ibana tu suamina. Jala didok ibana ma lomo-lomo ni suamina i do mambahen keputusan. Didok suamina ma na mura istrina tersinggung. Dung i lao ma istrina jala jut ma rohana. Gabe dang olo be ibana makkatai. Didok rohana ma, “Ikkon hubahen do haccit roham ala nungnga haccit rohakku dibaen ho.”

Asa saut na di rohana. Adong muse na hohom tu dongan saripena asa saut na di rohana. Misalna, adong suami istri na mambahen rencana lao liburan. Lomo do roha ni istrina asa dohot natua-tuana. Alai dang setuju suamina, didok ibana ma, “Tu ho do au mangoli, dang tu natua-tuam.” Jadi dang dipakkulingi ibana istrina asa diihutton istrina hatana jala saut na di rohana.

Memang porlu do hohom satokkin asa unang sai jut rohamuna jala gabe marbada hamu. Adong do manfaatna molo dibahen hamu songon i. Alana Bibel pe mandok, “adong do tikkina hohom.” (Parjamita 3:7) Alai molo dang marsipakkulingan hamu holan lao balas dendam manang asa saut na di rohamuna, dang boi sae parsoalanmuna i jala dang saling mangargai be hamu. Songon dia ma carana asa unang masa i tu hamu?

Na parjolo porlu do diingot hamu, dang boi sae masalahmuna molo dang marsipakkulingan. Puas do ra pakkilalaanmuna molo sai sip hamu tu pasanganmuna ala boi balas dendam jala saut na di rohamuna. Alai ingot ma, nungnga marjanji hamu lao makkaholongi dongan saripemuna. Jala adong do cara na undenggan lao pasaehon masalah.

Pikkirhon ma perasaan ni pasanganmuna. Didok do di Bibel, “dang parmuruk” halak na parholong i. (1 Korint 13:4, 5) Jadi unang ma pittor muruk hamu molo didok dongan saripemuna, “Dang hea ditangihon ho au” manang “Torus do ho terlambat.” Alai coba ma attusi maksud ni hatana i. Misalna molo didok ibana, “Dang hea ditangihon ho au” boi do artina “Hira dang adong diargai ho pandapothu.”—Prinsip ni Bibel: Poda 14:29.

Lambok makkatai. Boi do gabe balga sada masalah molo dang hatop dipasae. Alai adong do na boi diulahon lao pasaehon i. Songon dia ma carana? Bukku Fighting for Your Marriage mandok, “Lambok ma hamu makkatai jala argai ma pandapot ni dongan saripemuna. Boi do i mambahen dame pakkilalaan jala pasohon parbadaan. Biasana, holan i do na porlu”.—Prinsip ni Bibel: Poda 26:20.

Sada tim do hamu. Bibel mandok, “Ikkon dipikkirhon ganup halak do aha na penting di halak na asing, unang ma holan na penting di dirina sandiri na dipikkirhon.” (1 Korint 10:24) Tikki adong masalah, ingot ma sada tim do hamu dohot pasanganmuna. Jadi ikkon kerjasama do hamu lao pasaehon masalah i, dang na gabe marbada. Molo taingot i, gabe dang mura haccit rohatta, dang marbada, manang dang marsipakkulingan.—Prinsip ni Bibel: Parjamita 7:9.

Molo dang marsipakkulingan hamu dohot pasanganmuna, maralo do i tu prinsip ni Bibel na mandok, “Ikkon haholonganmuna do istrimuna songon makkaholongi dirimuna. Jala ikkon sangap do bahenon ni istri tu suamina.” (Epesus 5:33) Denggan do molo dibaen hamu perjanjian dohot dongan saripemuna asa unang gabe dang marsipakkulingan tikki adong masalah.