1, 2. Boasa ingkon talatik halak na baru asa boi mandapot tugas teokratis?

MARSITUTU do Jesus marbarita na uli. Alai, dilehon do tingkina mangalatik siseanna. Dipatudu Jesus do cara mangajar jala mangurupi naposo ni Debata. Angka siseanna pe marsiajar do asa boi songon parmahan na mamparrohahon birubiruna. (Mat. 10:5-7) Nang pe ringgas si Pilippus marbarita, dilatik do angka boruna marbarita. (Ul. 21:8, 9) Saonari pe, ringkot do hita mangalatik dongan na asing. Boasa?

² Di huria na adong di liat portibi on, godang do halak na baru marsiajar na so tardidi dope. Porlu do nasida dilatik. Ingkon taurupi do nasida mangantusi boasa ringkot manjaha jala marsiajar Bibel sahalakna. Porlu do hita mangalatik nasida mangajar dohot marbarita na uli. Donganta baoa na baru tardidi, porlu dilatik asa boi gabe parhobas dohot sintua di huria. Sude hita boi mangurupi nasida.​—Poda 4:2.

3, 4. (a) Songon dia do si Paulus paboahon pangkorhon ni parsiajaran Bibel tu ulaon marbarita na denggan? (b) Andorang so tajujui parsiajar Bibel asa marsiajar Bibel sahalakna, aha do na ingkon taulahon?

³ Sude naposo ni Jahowa ingkon manjaha jala marsiajar Bibel asa mamboto lomo ni roha ni Debata. Dipatorang si Paulus do taringot on tu angka dongan di Kolosse, ”Ndang mansohot nang hami tumangiangkon hamu, jala mangido, asa digohi di hamu pantas ni roha mananda lomo ni rohana.” Boasa ringkot di nasida manjaha jala marsiajar Bibel? On mambahen nasida marbisuk jala mangantusi songon dia ”marparange na tama di Tuhan i”. On pe mangurupi nasida mangulahon ”nasa ulaon na denggan” na dihalomohon Jahowa, tarlumobi ulaon marbarita na uli. (Kol. 1:9, 10) Alani i, tingki taajari sasahalak, taurupi ma nasida mangantusi ringkot ni manjaha jala marsiajar Bibel asa boi mangulahon lomo ni roha ni Jahowa.

⁴ Molo ndang marsiajar Bibel hita, ndang boi taurupi parsiajar Bibel mangantusi ringkot ni marsiajar Bibel sahalakna. Alai, molo tajaha Bibel jala tarimangi, on mangurupi hita di ulaon marbarita dohot di parngoluonta. Umpamana, tingki adong sungkunsungkun na maol alusan, boi ma taalusi sian Bibel. Manang, tingki tajaha taringot Jesus, si Paulus, dohot na asing na tongtong marhiras ni roha marbarita, dijujui ma hita asa tongtong marhiras ni roha nang pe adong ambatambat. Tingki tapaboa tu na asing taringot na taparsiajari sian Bibel jala songon dia i mangurupi hita, on manjujui nasida lam ringgas marsiajar Bibel jala nasida pe mandapot laba songon na tadapot.

5. Paboa ma songon dia mangurupi parsiajar Bibel asa ringgas marsiajar Bibel sahalakna.

⁵ Sungkunsungkun do ra rohamu, ’Songon dia ma ahu mangajari parsiajar Bibel asa taratur marsiajar Bibel sahalakna?’ Boi do hamu patuduhon cara paradehon parsiajaran Bibel. Molo adong tudutudu manjaha hatorangan di lampiran sian buku Aha do na Diajarhon Bibel tu Hita?, jala jujui ma ibana manjaha i dohot ayat na disurat di paragraf i. Dung i, patudu ma cara paradehon siulason  di parpunguan asa boi mangalehon alus. Jujui ma ibana manjaha Joujou Paboahon dohot Sadarlah! Paboa ma cara mamangke Watchtower Library manang PERPUSTAKAAN ONLINE Joujou Paboahon laho mandapot alus ni sungkunsungkun taringot Bibel. Molo diulahon ibana marragam cara laho marsiajar Bibel, las ma rohana jala marhiras ni roha marsiajar Bibel.

6. (a) Songon dia do hita mangurupi parsiajar Bibel asa lomo rohana marsiajar Bibel? (b) Aha do na diulahon parsiajar Bibel molo dihaholongi ibana Hata ni Debata?

⁶ Tingki mangajari sasahalak, urupi ma ibana mangantusi ringkot ni marsiajar Bibel asa lam mananda Jahowa. Unang ma paksa ibana marsiajar, alai patudu ma cara asa lomo rohana marsiajar Bibel. Lam godang na binotona sian Bibel, sarupa ma pangkilalaanna songon panurat buku psalmen na mandok, ”Alai anggo ahu - untungku do hasolhoton tu Debata; haposanku do hubahen Tuhan Jahowa.” (Ps. 73:28) Urupan ni Jahowa do halak na naeng maraleale tu Ibana.

7. Songon dia do Jesus mangalatik parbarita na uli najolo? (Ida gombar di mula ni parsiajaran.)

⁷ Tatiru ma cara ni Jesus mangalatik siseanna. Ditogihon Jesus do siseanna marbarita na uli, jala diida nasida do cara ni Jesus mangajar. Tangkas do dipaboa Jesus tu nasida tudutudu laho marbarita na uli. (Mateus, bindu 10) ^[1] (Ida catatan.) Nang pe saotik tingkina, alai diajari Jesus do siseanna asa boi mangajarhon hasintongan tu na asing. (Mat. 11:1) Taida ma dua cara laho mangurupi halak na baru penyiar tingki marbarita na uli.

8, 9. (a) Songon dia do Jesus mangkatai tu sasahalak tingki marbarita na uli? (b) Songon dia do hita mangurupi penyiar na baru asa martungkar pingkiran dohot parjabu songon na diulahon Jesus?

⁸ Martungkar pingkiran dohot halak. Ndang holan di jolo ni natorop Jesus marbarita. Alai, jotjot do ibana marbarita tu sasahalak, jala lambok do ibana tingki pasahathon barita i. Umpamana, martungkar pingkiran do ibana dohot borua na mambuat aek sian sumur di jonok ni huta Sikar. (Joh. 4:5-30) Martungkar pingkiran do Jesus dohot si Mateus Lepi, pemungut pajak, jala ditogihon do ibana asa gabe siseanna. Ditangihon ibana do Jesus jala ditamue do Jesus dohot na asing. Disi, mangkatai ma Jesus dohot torop halak.​—Mat. 9:9; Luk. 5:27-39.

⁹ Lambok do Jesus tingki mangkatai tu si Natanael, nang pe leas roha ni  si Natanael mangida halak sian Nasaret. Ala lambok Jesus, muba ma roha ni si Natanael mangida Jesus na sian Nasaret. Lomo ma roha ni si Natanael diajari Jesus. (Joh. 1:46-51) Sian on taboto, molo lambok hita mangkatai, lomo ma roha ni halak manangihon hita. ^[2] [Ida catatan.] Tingki talatik na asing mangulahon on, lam lomo ma roha ni nasida marbarita na uli.

10-12. (a) Songon dia do Jesus patuduhon lambok ni roha tingki marbarita na uli? (b) Songon dia do hita mangurupi penyiar na baru asa lam tu dengganna mangajarhon hasintongan?

¹⁰ Ajari ma halak na olo manangihon. Godang do ulaon ni Jesus. Alai molo adong halak na olo manangihon ibana, lomo do rohana mangajari nasida. Umpamana, sada tingki, torop halak marpungu di topi ni tao laho manangihon Jesus. Hundul ma Jesus dohot si Petrus di parau, jala sian i ma ibana mangajari natorop i. Dung i, diajari ibana ma muse si Petrus. Dibahen Jesus do tanda halongangan, gabe boi ma si Petrus mandapot godang dengke. Didok ibana ma tu si Petrus, ”Mulai saonari sijala jolma na ma ho.” Dung i, ”ditarik nasida angka paraunasida i tu duru, ditadingkon nasida ma saluhutna” jala diihuthon ma Jesus.​—Luk. 5:1-11, Bibel siganup ari.

¹¹ Lomo do roha ni si Nikodemus marsiajar tu Jesus. Alai, ala anggota sintua ni malim ibana, mabiar do ibana molo diida halak ibana mangkatai tu Jesus. Alani i, tingki borngin ma ibana manjumpangi Jesus. Nang pe songon i, ndang dipalao Jesus ibana. Dipaboa Jesus do hasintongan tu ibana. (Joh. 3:1, 2) Lomo do roha ni Jesus mangajarhon hasintongan jala patoguhon haporseaon ni halak. Songon i ma nang hita, rade ma hita manjumpangi halak di tingki na pas di nasida, jala mangurupi nasida marsiajar Bibel.

¹² Tingki rap marbarita hita dohot penyiar na baru, taurupi ma ibana manjumpangi muse angka na olo manangihon. Tatogihon ma ibana laho manjumpangi muse manang tingki manguluhon parsiajaran Bibel. Botoonna ma cara manguluhon parsiajaran Bibel, jala hilalaonna ma las ni roha mangurupi sasahalak marsiajar hasintongan taringot Jahowa. Lam marhiras ni roha ma ibana manjumpangi muse jala manguluhon parsiajaran Bibel. Gabe sabar ma nasida jala ndang marmetmet ni roha tingki ndang boi manjumpangi parjabu muse.​—Gal. 5:22; ida ma kotak ” Marsitutu do Ibana”.

13, 14. (a) Songon dia do pandapotmuna taringot halak na disurat di Bibel na mangkaringkothon halak na asing? (b) Songon dia do hamu mangurupi angka na poso manang penyiar na baru patuduhon holong tu dongan sahaporseaon?

¹³ Dihalomohon Jahowa do naposoNa asa masihaholongan jala masiurupan. (Jaha Lukas 22:24-27; 1 Petrus 1:22.) Dipaboa di Bibel,  dilehon Jesus do sude na adong di ibana, dohot ma i hangoluanna, laho mangurupi jolma. (Mat. 20:28) Si Dorkas, ”sumurung mangulahon na denggan dohot mambahen asi ni roha”. (Ul. 9:36, 39) Si Maria, rade do ”loja mangula” tu haporluon ni angka dongan na di Rom. (Rom 16:6, Bibel siganup ari) Songon dia do hita mangurupi na asing asa mangantusi ringkot ni mangurupi angka dongan di huria?

¹⁴ Tatogihon ma penyiar na baru mangida donganta na marsahit manang donganta na matua. Molo pas dihilala hamu, boi do togihononmu ianakhonmuna. Angka sintua boi do manogihon na poso manang penyiar laho paradehon sipanganon tu donganta na matua, manang padengganhon angka na sega di jabunasida. Tingki diida na poso manang penyiar na baru songon dia angka dongan masiurupan, tiruon ni nasida ma i. Umpamana, donganta baoa na poso, taronjar laho mangurupi angka dongan na adong di inganan na pinjil. Ala jotjot ibana ditogihon sahalak sintua mangida angka dongan na tading di inganan na pinjil.​—Rom 12:10.

15. Boasa ringkot angka sintua mamparrohahon hamajuon ni donganta baoa di huria?

¹⁵ Dilehon Jahowa do tanggung jawab tu baoa laho mangajarhon Bibel di huria. Alani i, ringkot do angka baoa marsiajar songon dia marjamita na denggan. Molo hamu sahalak sintua, tangihon ma tingki parhobas marjamita jala urupi ma nasida asa lam tu dengganna marjamita. (Neh. 8:8) ^[3]—Ida catatan.

16, 17. (a) Hamajuon aha do na diida si Paulus sian si Timoteus? (b) Songon dia do sintua mangalatik angka dongan na laho gabe sintua di huria?

¹⁶ Ringkot do mangalatik donganta baoa asa boi denggan manguluhon huria. Dilatik si Paulus do si Timoteus jala dijujui do ibana mangalatik na asing. Didok si Paulus, ”Margogo ma ho marhitehite asi ni roha ni Kristus Jesus! Jadi ma binegem sian ahu di adopan ni torop sitindangi, i ma pasahat tu halak haposan, angka na tau mangajari na asing.” (2 Tim. 2:1, 2) Ala sahalak sintua jala apostel do  si Paulus, godang na diparsiajari si Timoteus sian ibana. Umpamana, songon dia asa lam denggan marbarita dohot mangurupi angka dongan di huria.​—2 Tim. 3:10-12.

¹⁷ Leleng do si Paulus raphon si Timoteus, laho mangurupi si Timoteus asa lam denggan manguluhon huria. (Ul. 16:1-5) Molo angka sintua manogihon parhobas laho manggembalahon dongan na asing, na maniru si Paulus do nasida. Boi do tiruon ni parhobas cara ni sintua mangajari na asing, asa boi patuduhon holong, sabar, jala mangasahon Jahowa tingki manguluhon birubiruNa.​—1 Ptr. 5:2.

18. Boasa mansai ringkot mangalatik halak na asing di ulaon marbarita?

¹⁸ Saonari, godang do halak na baru na porlu dilatik asa lam denggan marbarita na uli. Angka donganta baoa pe porlu dilatik asa boi manguluhon huria. Lomo do roha ni Jahowa asa sude naposoNa dilatik, jala dilehon do tu hita hak na sumurung mangurupi nasida. Marsitutu ma hita mangalatik na asing, songon na diulahon Jesus dohot si Paulus. Ingkon talatik do sude halak, alana godang dope na laho taulahon di ulaon marbarita andorang so ro dope ajal ni hasiangan on.

19. Boasa pos rohanta marlaba do sude na taulahon laho mangalatik na asing di ulaon marbarita?

¹⁹ Ndang mura mangalatik penyiar na baru. Alai, pos ma rohanta na urupan ni Jahowa dohot Jesus do hita asa denggan mangalatik nasida. Las ma rohanta tingki taida halak na talatik marsitutu jala marhiras ni roha di huria dohot di ulaon marbarita. (1 Tim. 4:10) Alai, hita pe ingkon marsitutu do patoguhon partondionta, lam denggan marparange, jala lam solhot tu Jahowa.