1, 2. (a) Aha do na porlu taboto asa boi mambahen kesimpulan na denggan, jala boasa? (b) Aha do na laho taulas?

PORLU do taboto cara mamastihon hatorangan na tabege asa boi mambahen kesimpulan na denggan. (Poda 3:21-23; 8:4, 5) Alani i, ingkon talului ma angka bukti sian hatorangan na tabege i. Alana, lomo do roha ni Sibolis dohot angka halak di portibi on manggugai pingkiranta. (Eps. 5:6; Kol. 2:8) Jala didok do di Poda 18:13, “Manang ise na mangulak hata, so jolo sahat ditangihon, otona do i, jala parohon haurahon.”

² Di parsiajaran on, taboto ma annon aha na boi mambahen hita maol mandapot hatorangan na sintong jala mambahen kesimpulan na denggan. Jala taparsiajari ma taringot prinsip ni Bibel dohot angka contoh na boi mangurupi hita songon dia mamastihon hatorangan.

3. Boasa ingkon taingot na didok di Poda 14:15? (Ida gombar di mula ni parsiajaran.)

³ Saonari, mura do mangalului hatorangan. Umpamana, sian internet, TV, dohot na asing. Ra, godang do  e-mail (surat elektronik), SMS, manang carita na tadapot sian angka dongan. Ala ndang marnasae carita i, jadi ingkon manat ma hita. Ra ala las ni rohana, olo do dipasahat donganta sada carita tu hita, hape ndang diboto ibana molo carita i ndang sintong be. Prinsip ni Bibel na dia do boi mangurupi hita? Poda 14:15 mandok, “Halak na oto marhatutuhon luhut hatahata, alai anggo halak na bisuk i, ditimbang do langkalangkana.”

4. Sian Pilippi 4:8, 9 aha na boi mangurupi hita laho mamillit na tajaha, jala boasa ringkot mamboto hatorangan na sintong? (Ida kotak “ Piga-Piga na Diparade Laho Mangurupi Hita Mamboto Angka Hatorangan na Sintong”.)

⁴ Asa boi tabahen haputusan, ingkon tadapot do bukti sian hatorangan i. Alani i, ingkon manat ma hita mamillit na laho tajaha. (Jaha Pilippi 4:8, 9.) Unang ma suda tingkinta ala mangida na so tutu di internet manang manjaha e-mail na paboahon gosip. Tarlumobi, unang ma tajaha carita sian halak na murtad na dibahen di internet. Alana, lomo do roha ni nasida mambahen gale haporseaonta. Jadi, hatorangan na so sintong boi do mambahen hita marjea jala mangaliluhon hita.​—1 Tim. 6:20, 21.

5. Aha do hatorangan na so denggan na dibege halak Israel, jala aha ma akibatna di nasida?

⁵ Molo tahaporseai carita na so sintong boi do i parohon jea. Umpamana, di tingki ni si Musa adong 12 mata-mata na lao tu Tano na Dijanjihon. Dung i mulak ma na sampulu mata-mata i, jala paboahon hatorangan na so denggan. (4 Mus. 13:25-33) Ditamba-tambai nasida do hatorangan taringot Tano na Dijanjihon, gabe mabiar ma angka naposo ni Jahowa. (4 Mus. 14:1-4) Boasa? Ra ala godang do sian mata-mata i paboahon hatorangan na sarupa. Jadi, ndang olo be nasida manangihon hatorangan na denggan sian mata-mata na dua nai. (4 Mus. 14:6-10) Ndang mangasahon Jahowa be nasida jala pintor porsea ma nasida tu hatorangan na so denggan i.

6. Boasa ndang pola songgot rohanta tingki tabege hatorangan na so denggan taringot naposo ni Jahowa?

⁶ Didok do Sibolis “na manudu angka donganta”. (Pgk. 12:10) Alani i, ingkon manat ma hita tarlumobi tingki adong tabege hatorangan na so denggan taringot naposo ni Jahowa. Jala, Jesus pe pasingothon na laho dipatubu-tubu angka na marsogo ni roha ma “hata na  so tutu” taringot hita. (Mat. 5:11) Jadi, molo tongtong taingot sipasingot i, gabe ndang songgot be rohanta tingki adong tabege hatorangan na so denggan taringot naposo ni Jahowa.

7. Aha do na ingkon taingot molo naeng mangirim e-mail manang SMS?

⁷ Lomo do rohamuna mangirim e-mail manang SMS tu angka dongan? Tingki dibege hamu adong carita na menarik manang na terbaru, pintor hatop do hamu paboahon i tu halak? Alai, tingki so di ulahon hamu i, sungkun ma dirimuna, ‘Tutu do carita on? Nga hupastihon na sasintongna?’ Molo ndang pos rohamuna tu carita i boi do gabe pararathon gabus hamu. Jadi molo ndang diboto hamu carita na sasintongna, unang ma paboa tu na asing, pintor hapus ma!

8. Aha do na di ulahon angka na marsogo ni roha tu Sitindangi, jala songon dia hita boi mangadopi i?

⁸ Jolo rimangi ma pangkorhon ni hatorangan sian e-mail manang SMS na laho dibagihon hamu. Alana boi do i parohon jea tu na asing. Umpamana, di piga-piga luat diorai pamarenta do ulaonta. Jala dibahen na marsogo ni roha do gabus laho pabiar-biarhon hita manang mambahen hita curiga tu angka donganta. Songon i ma na masa di Uni Soviet najolo. Disi adong polisi sian KGB (Komisi Keamanan Soviet). Didok polisi i do tu donganta molo piga-piga sintua di huria, nunga kaluar sian organisasi ni Jahowa. * Ala pintor porsea tu hatorangan i gabe sega do  haporseaon ni nasida. Godang do na kaluar sian organisasi ni Jahowa. Alai ndang sadia leleng adong do na mulak tu organisasi, alai na deba nai ndang. (1 Tim. 1:19) Songon dia do asa unang masa i tu hita? Pasiding ma carita na so sintong dohot hatorangan na so denggan. Jadi molo ndang jolo tadapot hatorangan na sintong taringot na tabege, unang ma pintor porsea hita.

9. Aha do muse na mambahen hita gabe maol mandapot hatorangan na sintong?

⁹ Sipata adong do tabege carita na so adong buktina. Manang carita na hurang buktina. On ma na boi mambahen hita gabe maol mandapot kesimpulan na sintong. Jadi unang ma porsea tu carita na hurang buktina! Alani i, songon dia ma carana asa unang dioto-otoi hita?​—Eps. 4:14.

10. Boasa naeng marporang halak Israel dohot angka haha anggina? Jala aha do na mangurupi nasida pasidingkon i?

¹⁰ Taparsiajari ma pengalaman ni halak Israel na tading di sabola barat ni Sunge Jordan. On masa di ngolu ni si Josua. (Jos. 22:9-34) Dibege nasida ma barita molo halak Israel sabola timur Jordan pajongjongkon langgatan na balga di jonok ni sunge i. Tutu do nian barita i, alai ndang diboto halak i dope sude hatoranganna. Gabe dirimpu halak Israel na di sabola barat ma naung mangalo halak Israel na di sabola timur tu Jahowa. Jadi naeng diporangi nasida ma halak i. (Jaha Josua 22:9-12.) Alai andorang so i, disuru nasida ma piga-piga baoa mangalului hatorangan na sintong. Tutu do pandapot ni nasida i? Sasintongna, ndang na langgatan tu debata na so sintong na dibahen halak Israel na di sabola timur i. Alai langgatan tu Jahowa do. Jadi ala sabar do halak Israel na di sabola barat mangalului hatorangan na sintong, ndang jadi be nasida marporang. Jala marlas ni roha ma halak i.

11. (a) Aha do na masa tu si Mepiboset? (b) Dung diboto si Daud na sasintongna aha do na diulahon ibana?

¹¹ Ra di sada tingki boi do gabe hansit rohanta ala adong halak na mandok na paroa-roahon hita. Ingot ma pengalaman ni si Mepiboset. Burju do Raja Daud tu ibana jala dilehon do sude arta ni ompungna si Saul tu ibana. (2 Sam. 9:6, 7) Alai ndang leleng adong ma na paroa-roahon si Mepiboset tu si Daud. Ndang jolo dilului si Daud hatorangan na sintong. Pintor dibuat ibana do sude arta ni si Mepiboset. (2 Sam. 16:1-4) Alai dung mangkatai muse si Daud tu si Mepiboset, diboto ibana ma nga sala ibana. Jadi dipaulak ibana ma deba arta ni si Mepiboset. (2 Sam. 19:25-30) Sasintongna molo sabar si Daud mangalului hatorangan na sintong, ndang susa si Mepiboset.

12, 13. (a) Aha do na diulahon Jesus tingki diparoa-roa ibana? (b) Aha ma na taulahon molo adong na paroa-roahon hita?

¹² Aha do na boi diulahon hamu molo sasahalak pararathon gabus taringot hamu? Parrohahon ma na masa tu Jesus dohot Johannes Pandidi. (Jaha Mateus 11:18, 19.) Ndang olo Jesus pasudahon tingki dohot gogona holan  laho patorangkon na sintong do ibana. Aha ma na diulahon ibana? Dijujui ibana do angka halak asa mangalului hatorangan na sintong. Lomo do rohana asa diparrohahon nasida ulaonna dohot ajaranna. Didok, “tarida do bisuk sian parniulaonna.”​—Mat. 11:19.

¹³ Adong na boi taparsiajari sian pengalaman ni Jesus. Sipata adong do ra halak na paroa-roahon hita. Jala gabe marsak ma hita alani i. Alai, molo tongtong taulahon na denggan, botoon ni nasida ma na sasintongna. Sian contoh ni Jesus i taboto ma, pangalahonta na denggan, boi do patuduhon sala do hata ni halak na paroa-roahon hita.

14, 15. Boasa ndang boi hita mangasahon pingkiranta sandiri?

¹⁴ Ala mardosa dope hita, gabe maol ma hita mangalului hatorangan na sintong. Manang, ala nunga leleng hita gabe Sitindangi gabe marbisuk ma hita, jala diargai halak ala denggan mambahen haputusan. Alai boi do i gabe parohon jea tu hita?

¹⁵ Boi. Alana, gabe paposhu ma hita tu dirinta sandiri. Gabe didok rohanta ma sai sintong do pandapotta. Tabahen ma kesimpulan hape ndang taboto dope na sasintongna. Bahaya do on! Alana, tangkas do dipaboa di Bibel unang marpangunsandean tu pingkiranta sandiri.​—Poda 3:5, 6; 28:26.

16. Paboa ma situasi na masa tu si Tom.

¹⁶ Umpamana, adong ma sahalak donganta naung leleng gabe sintua. Goarna si Tom. Laho ma ibana tu restoran jala diida ibana ma sintua na asing, i ma si John, rap hundul dohot sahalak borua. Ndang istrina borua i. Alai rap mengkel do nasida jala marsihaolan. Gabe holsoan ma si Tom. Didok roha ni si Tom ma, ‘Na naeng sirang do si John dohot istrina? Songon dia ma annon ianakhonna?’ Hea do si Tom mangida situasi sisongon i. Molo hamu gabe si Tom, songon dia do pangkilalaanmu?

17. Sian situasi i, aha ma muse na diboto si Tom, jala aha ma parsiajaranna tu hita?

¹⁷ Alai, adong do buktina molo si John ndang be satia tu istrina? Ndang leleng ditelepon si Tom ma si John. Dung i, diboto ibana ma molo borua i ito ni si John do hape. Si John dohot itona i nunga leleng ndang pajumpang. Alai holan satongkin do nasida boi mangkatai tingki i. Jadi lao ma nasida tu restoran, alai ndang dohot istri ni si John. Dung diboto si Tom hatorangan i, las do rohana ala ndang sanga dipaboa ibana i tu manang ise pe. Aha ma parsiajaranna tu hita? Nang pe nunga leleng hita gabe Sitindangi ingkon tongtong do talului hatorangan na sintong asa boi mambahen kesimpulan.

18. Aha do na mambahen hita gabe porsea tu hatorangan na so denggan taringot donganta?

 ¹⁸ Ra maol do hita marpingkiran positif tu sahalak donganta ala adong na so tahalomohon sian ibana. Alai, molo songon i do hita gabe mura ma hita curiga. Jala, molo tabege adong hatorangan na so denggan taringot ibana, olo do gabe tahaporseai i nang pe ndang adong buktina. Aha ma parsiajaranna tu hita? Molo tapaloas pingkiran na negatif masuk tu rohanta, boi do gabe manguhumi hita hape ndang taboto na sasintongna. (1 Tim 6:4, 5) Unang ma adong pingkiran na negatif songon late ni roha dohot sogo ni roha di rohanta. Taingot ma, lomo do roha ni Jahowa asa tahaholongi angka donganta jala tasalpuhon hasalaan ni nasida.​—Jaha Kolosse 3:12-14.

19, 20. (a) Prinsip na dia ma na boi mangurupi hita laho mamastihon hatorangan na sintong? (b) Aha do na laho taulas di parsiajaran na mangihut?

¹⁹ Saonari, maol do mandapot jala mamastihon hatorangan na sintong. Ala somalna ndang sude hatorangan na tabege i tutu. Jadi aha ma na boi mangurupi hita? Prinsip na adong di Bibel! Umpamana, molo adong halak na pintor mangalusi hape ndang dibege dope na sasintongna, didok do i halak na oto. (Poda 18:13) Asing ni i, dijujui do hita asa mamastihon sude hatorangan na tabege. (Poda 14:15) Jala nang pe nunga leleng hita gabe sisomba Jahowa, unang ma paposhu hita tu diri sandiri. (Poda 3:5, 6) Molo taingot angka prinsip i, boi ma hita mandapot hatorangan na sintong. Boi ma sintong kesimpulanta jala denggan ma hita mambahen keputusan.

²⁰ Alai adong do na asing na boi mambahen hita maol mamboto na sasintongna. Ala mardosa dope hita, somal dope hita manguhumi halak sian na taida. Alani i, di parsiajaran na mangihut, taulas ma aha na mambahen hita gabe manguhumi halak. Jala songon dia carana pasidingkon i.